Dual PanelHata ni si Sopar na Paduahon:; Seng Dokah Hasangapon ni Halak na Ilat Podas do Magou
1Dob ai nini si Sopar na hun Naama ma mambalosi,
2“Iojur pingkiranku do ahu marbalos, anjaha margilumbang do ai ibagas diringku.
3Ai hubogei do pangajaran na pahirihon ahu, tapi marbalos do tonduy ai ibagas uhurhu, nini,
4ʻAi seng ibotoh ho, humbani sapari nari ope, singgan ni dong jolma inahkon i atas tanoh on,
5paboa tongkin tumang do surak-surak ni halak parjahat, anjaha tongkin tumang malas ni uhur ni halak silupahon Naibata?ʼ
6Age pe ronsi langit naik gijang ni uhurni, anjaha uluni das bani hombun na i atas ai,
7maningon masab do ia songon ginagatni sandiri sadokah ni dokahni, halak na ongga mangidahsi, mangkatahon, ʻAi ija do ia?ʼ
8Songon nipi do ia habang, gabe seng jumpah be; masab do ia songon panonggoran borngin.
9Mata na ongga mangidahsi, seng idahonni be ia, anjaha iananni hinan pe seng idahonni be ia.
10Anakni pe maningon mangindo holong atei ni halak na musil, anjaha tanganni sandiri paulakkon na nirampokni.
11Age pe gok hagogohon hinan holiholini, maningon tibal do ai holi rapkonsi ibagas orbuk.
12Age pe tobu hajahaton ai ibagas pamanganni, anjaha iponopkon ai i toruh ni dilahni,
13isimpan pe ai, anjaha seng ra ia palahohon ai, iongom-ongom pe ai ibagas pamanganni,
14salih do na pinanganni ai ibagas boltokni, jadi bisa ni ulog darih ibagas dirini.
15Habayakon na dob binondutni ai, lang boi lang utahkononni use, Naibata sandiri padaratkon ai hun bagas boltokni.
16Domma ionsop bisa ni ulog darih, gabe dilah ni ulog darih mamunuhsi.
17Seng bulih ia mangkamalaskon minak na buei, barang manisan atap dadih na mabaor songon bah.
18Maningon paulakonni buah ni na hinalojahonni, seng bulih bondutonni ai; humbani untung ni partiga-tigaonni, seng jumpahan malas ni uhur ia hunjai.
19Halani na dob pinisatni anjaha ipaturutni sonin halak na musil, anjaha na nirampasni rumah, na so pinaulini.
20Ai seng ra sombuh uhur hautni ai, anjaha seng tarpaluahsi dirini marhitei artani ai.
21Haganup do ibangkuhon hisapni ai, halani ai seng totap hauntunganni.
22Age pe bayak tumang ia, sai tarsosak do ia, anjaha mangonai do bani hamagouan na gok.
23Laho manggoki boltokni ai, suruhon ni Naibata do bani gajag ni ringis-Ni ai, anjaha iudankon do ai bahen sipanganonni.
24Maluah pe ia humbani sinjata bosi, sai na tolpuson ni sior tombaga do ia,
25mandarat do sior ai humbani gurungni, ujungni ai mandarat humbani poguni; sogop do bani hagobiron.
26Lotir ni na lotir ipasirsir mamboiskon artani; apuy na so nipagara ni jolma mambondutsi, aha na teba ibagas lampolamponi bois mosog.
27Patalaron ni langit ai do hajahatonni, anjaha tanoh on jongjong mangimbangsi.
28Maningon bobanon ni halak do arta na ibagas rumahni, masab ganup bani ari panringison ni Naibata.
29Ai ma rupei ni halak parjahat humbani Naibata, tean-teanan na tinontuhon ni Naibata bani.