Dual PanelSahap ni si Job na Parpudi \@(sambatni)\@: Seng Tardadap Jolma Hapentaran ai
1“Tongon, adong do tambang pirak, pakon ianan papitahkon omas.
2Hun bagas tanoh do ibuat bosi, anjaha batu ilobur mambuat tombaga.
3Hagolapan ai pe talu do ibahen jolma, ipareksa do das hubani sibagasan batu na ponop ibagas na golap ampa ibagas na lotir sahalian.
4Ihurak sidea do lubang hu toruh, na daoh sirang humbani ianan ni jolma; gantung sidea seng marsidogei-dogeian, daoh humbani jolma mambung-ambung sidea.
5Ia tanoh, harohan ni sipanganon do in, tapi partoruhni ai marbalik ibahen songon pambahen ni apuy.
6Marisi mata intan sapir do batu-batuni ampa marisi omas homa.
7Dalan hujai seng ibotoh manuk-manuk panoroh, anjaha seng ididah mata ni haluhuy ianan ai.
8Seng ongga idogei nahei ni binatang ai, anjaha seng ibontas singa.
9Dolog batu pe ijolom tangan ni jolma do, anjaha marbalik onjolan ni dolog ibahen.
10Ituhak do dalan ibagas dolog batu, anjaha matani mangidah ganup barang na maharga.
11Ibongbong do sumbul ni bah, anjaha na ponop sahalian ipadarat bani na lihar.
12Tapi hapentaran ai ija do boi jumpahon ai? Anjaha ija do nani ianan ni pangarusion?
13Seng ibotoh jolma in dalan hujai, anjaha seng jumpah ai i tanoh ni halak na manggoluh on.
14Nini luhung, ʻSeng ibagas ahu ia.ʼ Laut mangkatahon, ʻSeng i lambungku ia.ʼ
15Seng tarboli ai age marhitei omas pitah, anjaha pirak pe seng boi pakeion pambolini.
16Seng tarboli ai bani omas Opir, barang bani batu soham atap sapir pe.
17Omas barang kasa seng boi bahenon hadosanni, anjaha seng boi tukaran ai bani barang omas na majenges.
18Seng tarpados simatah pakon kristal hujai; harganan do hapentaran ase mutiha.
19Batu intan na hun Etiopia pe seng tarpados hujai, anjaha seng tarasam ai bani omas pitah.
20Hunja do anggo sonai harohan ni hapentaran ai? Anjaha ija do ianan ni pangarusion?
21Lingod do ai humbani panonggor ni ganup halak na manggoluh, anjaha ponop humbani manuk-manuk na i awang-awang.
22Nagori toruh pakon hamatean mangkatahon, ʻDomma ibogei hanami namin burintikni.ʼ
23Naibata do na mambotoh dalan hujai, anjaha Ia do na mambotoh iananni.
24Ia do na manatap ronsi ujung ni dunia on, anjaha ididah do ganup na itoruh ni langit.
25Sanggah na binahen-Ni ai timbangan ni logou, anjaha tinontuhon-Ni ai ukuran ni bah,
26sanggah binahen-Ni ai aturan pasal udan, anjaha itontuhon pardalan ni hilap,
27ijai do ai ididah anjaha ipatorang, ipajonam anjaha itulimati.
28Tapi anggo bani jolma in, sonon do nini, ʻTonggor ma, biar mangidah Jahowa do hapentaran, anjaha surut humbani hajahaton do pangarusion.ʼ”