Dual PanelSahap ni si Elihu na Paduahalihon:; Seng Anjai Lang Pintor Pambahenan ni Naibata
1Dob ai nini si Elihu ma use,
2“Bogei nasiam ma hatangku, nasiam siparuhur, anjaha nasiam na pentar-pentar, tangihon nasiam ma!
3Pinggol do sipareksa hata, songon langit-langit na mandai sipanganon.
4Na sintong ai ma pilih hita banta; rap manandai ma hita barang aha na dear.
5Ai nini si Job do, ʻBujur do ahu, tapi seng bujur pambahen ni Naibata bangku.
6Age pe bujur ahu parladung do ahu ihira; seng hatambaran be ugahku, age seng marsalah ahu.ʼ
7Tor ise ma dalahi songon si Job, na manibur apas-apas songon bah,
8na mardalan saodoran pakon halak sihorjahon na so sintong, anjaha na marparsaoran pakon halak parjahat?
9Ai nini do, ʻSeng adong gunani bani sada dalahi, margoluh na madear ia i lobei ni Naibata.ʼ
10Halani ai, tangihon nasiam ma ahu, nasiam halak na maruhur, pantang do hatahononkon, Naibata mambahen hajahaton, Pargogoh Na So Tarimbang mangkorjahon hagedukon.
11Tapi romban hubani pambahenan ni jolma do ibalaskon hu bani, anjaha romban hubani dalan ni ganup halak ihonahon bani.
12Tongon tene, seng anjai lang sintong pambahenan ni Naibata, anjaha seng anjai papeolon ni Pargogoh Na So Tarimbang hasintongan.
13Ise nani siondoskon tanoh on Bani, anjaha ise do na pajonamkon ganup dunia on?
14Anggo porini tubuh uhur-Ni mangimbang jolma, itarik use tonduy-Ni ampa hosah-Ni,
15mintor rotap ma hosah ni ganup na manggoluh, anjaha mulak bani orbuk jolma in.
16Anggo maruhur ham, bogei ma on, tangihon ham ma na huhatahon on,
17ʻMintor tarbahen sada halak, na magigi bani uhum ma manrajai? Mintor tarpapai ham ma Ia, parpintor anjaha Pargogoh Na So Tarimbang in?ʼ
18Ia, na boi mangkatahon bani sada raja, ʻHo na so margagan!ʼ bani halak na sangap, ʻHo halak parjahat!ʼ
19Ia, na so sitonggor jumbak bani raja-raja, na so mangkira sangapan na bayak humbani na musil, ai jadi-jadian ni tangan-Ni do ganupan ai.
20Sompong matei sidea, tongah borngin. Isonggoti bangsa ai, gabe masab sidea, isontapkon do halak na gogoh, seng pala marhasoman tangan.
21Ai itulimati panonggor-Ni do dalan ni ganup jolma, anjaha ididah do sagala langkah-langkahni.
22Seng dong na golap barang na lotir; na tarbahen parponopan ni halak sihorjahon hajahaton.
23Ai seng dong ibuhul ari bani jolma, laho hu paruhuman i lobei ni Naibata.
24Ia do na manripuki halak na markuasa, lang pala palobei ipareksa, anjaha ipabangkit halak na legan bahen gantihni.
25Halani torang do ibotoh pambahenan ni sidea, idabuhkon do sidea borngin, gabe maripuk ma sidea.
26Ibogbog do sidea halani hajahaton ni sidea, bani ianan na boi idahon ni halak,
27halani itundali sidea Ia, anjaha seng iparuhurhon sagala dalan-Ni,
28laho mambalaskon bani sidea doruh-doruh ni halak na musil, ai itangihon do doruh-doruh ni halak na masombuh.
29Anggo sip Ia, ise boi mansalahkon? Anggo iponopkon bohi-Ni, ise ma na mangindahi-Si? Ijagai do sada bangsa atap sada halak,
30ase ulang halak parjahat manrajai, gabe hona sidingni bangsa ai.
31Sonon ma patut hatahonon ni halak bani Naibata, ʻGijang hinan do uhurhu, seng bangku be mangkorjahon hasamboron,
32ajarhon Ham ma bangku na so dapot uhurhu hinan; anggo marsalah ahu, seng bahenonku be ai.ʼ
33Ningon romban hubani pingkiranmu gakni namin Ia mambalas, halani na tinulakmu ai Ia? Ham do na maningon manontuhon, sedo ahu, anjaha na binotohmu, ai ma hatahon ham!
34Halak na maruhur hatahononni ma bangku, anjaha halak na pentar, na manangar ahu, hatahononni ma,
35ʻSeng maruhur si Job na marsahap ai, seng marpanimbangion hatani ai.ʼ
36Dear namin tarlajou si Job ronsi ujungni, halani songon parjahat do ia na marbalos ai.
37Halani itambahi ope hajungkaton bani dousani ai, marhilei do ia i tongah-tongahta, anjaha buei sahap-sahapni dompak Naibata.”