Dual PanelSahap ni si Elihu na Patoluhon:; Marguna do Habujuron bani Jolma, Tapi bani Naibata?
1Dob ai nini si Elihu ma use,
2“Ai sintong ma ai ninuhurmu? Nimu, ʻMarhapintoran do ahu i lobei ni Naibata,ʼ
3gabe isungkun ham, ʻAha ma gunani ai bangku? Aha ma hasurunganku anggo seng mardousa ahu?ʼ
4Ahu, ahu ma mambalosi ham, ampa huan-kuanmu na rapkon ham.
5Mangkawah ma ham dompak langit, anjaha idah ham ma hombun ai, na gijangan ase ham.
6Anggo mardousa ham, aha do na binahenmu bani Naibata? Anggo lambin bueini panlanggaronmu, aha ma ibahen ham Bani?
7Anggo pintor ham, aha pamberemu Bani? Atap aha dong ijalo hun bamu?
8Bani jolma na songon ham tumang mangonai hajahatonmu, anjaha bani anak ni sada jolma marguna hapintoronmu.
9Doruh-doruh do namin halak binahen ni buei ni pangarsikon, anjaha doruh-doruh do sidea mangindo pangurupion halani kuasa ni halak na sangap-sangap.
10Tapi seng dong na mangkatahon, ʻIja do Naibata Sitompa ahu, na mambere doding bangku borngin,
11na mangajari hita lobihan humbani binatang na i tanoh on, anjaha na papentar hita lobihan humbani manuk-manuk na i awang-awang?ʼ
12Dilo-dilo pe sidea, tapi seng ibalosi, halani hajungkaton ni halak parjahat.
13Tongon, seng itangihon Naibata dilo-dilo na lumei, seng ikawahkon Pargogoh Na So Tarimbang in na sonai ai.
14Lambin naha ma anggo ihatahon ham, seng ididah ham Ia? Botoh ham ma, domma das i lobei-lobei-Ni parkaramu. Paima ham ma putusan-Ni.
15Sonari, halani seng marbalos ope Naibata ibagas ringisni, anjaha seng sadiha ipardiatei ope salah,
16ibuha si Job do pamanganni mangkatahon hata na lumei, anjaha ipabuei sahap-sahap na so marpanimbangion.