Dual PanelBalos ni Naibata na Parlobei bani si Job:; Hagogohon-Ni Ibagas na tinompa-Ni ampa Ibagas Parmuduon-Ni
1Dob ai roh ma balos ni Naibata hubani si Job marhitei habahaba, nini ma,
2“Ise do in, na sihol pagolap uhur ni Naibata marhitei hata na so marpanimbangion?
3Mahua gonditi ma binongeimu songon dalahi, ase husungkun ho, anjaha ajari ma Ahu.
4Ija do ho, sanggah Hubahen onjolan ni dunia on? Patugah ma Bangku, anggo na maruhur do ho.
5Ise do na mambahen sibaranni? Ai lang ibotoh ho do gakni ai! Ise do na pagistang tali panibar i atasni?
6I atas aha do ipajonam tiang partunggulni, anjaha ise do na patibal batu parsuhini,
7sanggah rap mandoding bintang sogod-sogod anjaha marolob-olob ganup anak ni Naibata?
8Ise do na manutup laut bani labah, sanggah pultak bahni hun partapaan,
9sanggah Hujadihon hombun gabe hiouni, pakon hagolapan gabe hiou ampanni?
10Sanggah na Hutontuhon parbaloganni, anjaha na Hubahen ransang-ransang ampa labahni,
11anjaha ningku, ʻSibar jon do ho bulih roh, seng bulih lopusanmu, anjaha ijon do maningon marsaran gunsang ni gilumbangmu!ʼ
12Ongga do ho sadokah goluhmu mangkatahon siang ari, barang patugahkon hubani sibalik huning iananni,
13ase ijolom ujung ni tanoh on, anjaha iusir hunjai halak parjahat?
14Salih ma ai songon tanoh halampung na hona tokan, anjaha iset songon hiou.
15Itarik do humbani halak parjahat haliharon ni sidea, anjaha iponggolhon tangan na mangondam.
16Ongga do ho masuk hu sombul ni laut, anjaha ongga idalani ho tondolan ni luhung ai?
17Ongga do ididah ho buha labah ni hamatean, atap ongga do ididah ho horbangan ni halotiron?
18Ongga do tartatap ho habolagon ni dunia on, patugah, anggo ibotoh ho do ganupan ai.
19Ija do dalan laho hu ianan ni haliharon, anjaha ija do ianan ni hagolapan,
20ase boi boanonmu ai mulak bani iananni, anjaha ibotoh ho do dalan laho hu rumahni?
21Ibotoh ho do hap ai, ai ijia do ho tubuh, anjaha domma buei bilangan ni ari-arimu!
22Domma ongga ho hu kamar panimpanan ni salju, anjaha domma ongga ididah ho gudang ni sira-sira,
23na Hutagangi bani panorang hasosakan, bani panorang marsimunsuhan ampa porang?
24Ija do dalan hu ianan parbolahan ni logou, barang ianan parserakan ni logou hapoltakan hu tanoh in?
25Ise do mambahen bondar bani bah udan, anjaha ise do mambahen dalan bani hilap,
26laho mangarbahi tanoh na so marisi jolma, ampa halimisan na so marisi jolma,
27laho pabosur tanoh dorging-dorging anjaha horah-horah, anjaha mambahen martumbor poyon-poyon na maratah?
28Naha, ai marbapa do udan, anjaha ise do na manubuhkon tektek ni namur?
29Ise do na manubuhkon es, anjaha ise do na manjadihon salju?
30Gabe mapir do bah ai songon batu, anjaha sisik ni luhung ai marhimpang.
31Mangasup do ho mamudun tali ni bintang hala, barang mangkarhari tali ni bintang pariama?
32Boi do paluaronmu bintang na marlinang-linang bani panorangni bei, barang boi do togu-toguonmu bintang gipul ampa anakni?
33Ibotoh ho do undang-undang ni langit? Ho do na manontuhon kuasani i tanoh on?
34Boi do pagijangonmu soramu das hu hombun ai, anjaha ra do udan mapor mambalosi ho?
35Ai ho do marsuruh, ase laho hilap ai, anjaha ihatahon bam, ʻTonggor ma, andon ma hanami roh!ʼ
36Ise do na mannahkon hapentaran ibagas hombun ai, anjaha ise do na mambere uhur bani hombun na marganjang ai?
37Ise do na boi mamilangi hombun ai marhasoman hapentaran, anjaha boi manguseihon gusi ni langit ai,
38sanggah mapir tanoh ai songon bosi, anjaha rapat bei ulbakni?
39Ai ho do na marburu sipanganon ni singa boru-boru, barang na pabosurhon lohei ni anak ni singa,
40sanggah modom sidea ibagas liangni, barang sanggah mangonggopi ibagas naporon?
41Ise ma na pasirsirhon sipanganon bani kawak, sanggah siok-siok anakni hubani Naibata, sanggah mordong ia halani seng dong sipanganon?”