Alkitab Mobile SABDA
[VER] : [SIMALUNGUN]     [PL]  [PB] 
 <<  Ayub 41 >> 

Biak ni Buaya

1(40-25) Tumaram ma boi toguonmu buaya marhitei hail, barang odohkononmu dilahni bani tali?

2(40-26) Tumaram ma boi halihironmu igungni marhitei hotang, barang tupukonmu huyumni bani hail bosi?

3(40-27) Tumaram ma ia ninuhurmu ra mambahen pangindoan bam, barang marhata na lamlam bam?

4(40-28) Tumaram ma ra ia marpadan pakon ho, gelah ra ia lalab jadi jabolonmu?

5(40-29) Tumaram ma boi parguro-gurohononmu ia songon manuk-manuk, barang tambatkononmu ia bahen guro-guro ni borumu?

6(40-30) Tumaram ma ra halak pardengke mantiga-tigahonsi? Barang ra ma halak partiga-tiga marbagi ai?

7(40-31) Mangasup do ho manomtomkon lombing hubani hulingkulingni, barang uluni bani pantom-pantom?

8(40-32) Lajou ma sahali manangkapsi! Ingat ma parporanganni! Tontu lang be ra ho manlajousi.”

Sambatni Pasal Buaya ai

9(41-1) Tonggor ma, labuh do pangarapanmai, mangidahsi pe domma malitonduy ho.

10(41-2) Ise pe lang na pag mangkeheisi; i lobei-Hu ise na tahan jongjong?

11(41-3) ise ma na dob mamberehon Bangku, ase hubalas ai bani? Haganup na i toruh ni langit, Ahu do simadasi.

12(41-4) Seng pasipon-Ku pasal pagorini ai, barang gogohni na surung ai, barang potongan ni badanni ai.

13(41-5) Ise ma na ongga mananggali pakeianni? Ise ma na pag manroroh hubagas iponni sidua baris ai?

14(41-6) Ise ma na ongga mambuha osangni ai? Jangin do inggot iponni ai.

15(41-7) Gurungni tarjadi humbani gantar na patitir, marrapat-rapat songon na tinokan.

16(41-8) Rapat do na sada bani na sada nari, logou pe seng siat hun holangkolangni.

17(41-9) Ganup longkot bani na legan, marsirapitan seng hasirangan.

18(41-10) Anggo marbarsi ia kaluar sinalsal, anjaha matani songon salibon ni sibalik huning.

19(41-11) Humbani babahni kaluar rigapan na marjilam-jilam, anjaha abab mandarat hunjai.

20(41-12) Humbani bungbung ni igungni kaluar timus, songon humbani hudon na gurgur, na ginorgoran marhitei ranggas-ranggas.

21(41-13) Hosahni boi pagara arang, anjaha gajag ni apuy kaluar humbani babahni.

22(41-14) Marianan do hagogohon bani tangkuhukni, anjaha songgot-songgot mardalan i lobeini.

23(41-15) Sibuk ni badanni toguh, songon na tinuang bani, seng tardugur.

24(41-16) Mapir do atei-ateini songon batu, mapir tene songon batu ni pandudaan na partoruh.

25(41-17) Anggo hehe ia bajoraon do halak na garang, malitonduy halani biarni.

26(41-18) Podang pe lang tolap bani, age tanja, gijig-gijig atap anak ni panah pe.

27(41-19) Doskon anggala do ietong bosi, anjaha tombaga doskon hayu masik-masik.

28(41-20) Seng maporus ia bahenon ni anak ni panah, doskon anggala do bani batu ni umbalang.

29(41-21) Doskon hayu ni omei do ihira antuk-antuk, anjaha itatawai do parngingis ni tanja.

30(41-22) Boltokni doskon sanga-sanga na marot, anjaha bogasni ibagas hubang doskon bogas ni gareta pardogei.

31(41-23) Bah na i toruh gurgur ibahen songon bah na ibagas hudon, anjaha laut ai doskon serek panlompahan ni tambar.

32(41-24) Limbasni i pudini mirlak-irlak itadingkon, anjaha doskon uban sisik ni bah ai idahon.

33(41-25) Seng dong usihanni anggo i darat, na tinompa na so marhabiaran do ia.

34(41-26) Mapas uhurni mangidah sagala na gijang, ia do raja bani sagala binatang panoroh.”


  Share Facebook  |  Share Twitter

 <<  Ayub 41 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel