Dual PanelSahap ni si Elipas \@(Sambatni)\@
1“Dilo ham ma, adong do na sihol mambalosi ham? Hubani ise, humbani halak na pansing ai sihol mangadu-adu ham?
2Tongon, pandoleianni do mamunuh halak na oto, anjaha simburu do pamatei halak na bodoh.
3Huidah do halak na oto manjulur uratni, tapi sompong melus iananni.
4Daoh do anakni humbani hatuahon, hona dogei-dogei sidea i horbangan, anjaha seng dong na paluahkon sidea.
5Halak na loheian do mangankon na sinabini, gari hun tongah-tongah ni rungga-rungga ibuat do ai; anjaha halak na horahan do manginum na dong bani.
6Ai seng humbani orbuk roh ni hasedaon, anjaha seng humbani tanoh roh ni hasunsahan.
7Tapi jolma do na manubuhkon sitaronon, songon dilah ni apuy habang dompak datas.
8Porini ahu, Naibata do hupindahi, hubani Naibata do ondoskononku parniahapanku.
9Ia do sibahen pambahenan na banggal na so tarpareksa, ampa halongangan na so tarhira.
10Ia do sibere udan hu tanoh in, anjaha Ia do sitongos bah hu juma.
11Ia do na patimbulhon halak na musil, anjaha na mangangkat hu hatuahon halak na pusok uhur.
12Ia do parsedahon tahi-tahi ni siparakal-akal, gabe seng manjadi hinorjahon ni tangan ni sidea.
13Ia do manangkap halak na pentar ibagas akal ni sidea sandiri, ibahen soya tahi-tahi ni siparakal-akal.
14Dorabon ni na golap do sidea arian, anjaha dadap-dadap sidea arian songon borngin-borngin.
15Tapi ipaluah do halak na maetek humbani podang, anjaha halak na musil humbani tangan ni halak na gogoh.
16Gabe marpangarapan ma halak na galek, tapi ipasip do halak parjahat.
17Tonggor ma, martuah ma jolma na niajar ni Naibata, halani ai ulang ma teoskon pinsang-pinsang ni Sitimbulan in!
18Ia do mangugahi, lanjar Ia do mambaluti: Ia do mambogbog, lanjar tangan-Ni do pamalumkon.
19Onom hali ho tarsosak, Ia do paluahkon ho: papituhalihon seng mangonai be hamagouan bam.
20Sanggah lohei, Ia do paluahkon ho humbani hamatean, sanggah porang, humbani kuasa ni podang.
21Ondingan-Ni do ho humbani lonsing-lonsing ni dilah, anjaha seng pala habiaranmu hasedaon porini pe roh.
22Tawa do ho mangidah hasedaon ampa lohei, anjaha seng pala habiaranmu binatang na i tanoh in.
23Ai ibagas padan do ho pakon batu na i talun, binatang na i harangan pe mardamei do pakon ho.
24Jadi botohonmu ma, ibagas hasonangan do lampolampomu; anjaha anggo ipareksa ho alamanmu, aha pe lang dong na magou.
25Botohonmu do homa, lambin gargarni do dakdanakmu, anjaha ginomparmu songon suan-suanan na i tanoh in.
26Palobei sayur matua do ho ase surukonmu tanoman, songon omei na sinopouhon bani panorangni.
27Tonggor ma, sonai ma domu hubani pamareksaannami! Tangar ma ai, anjaha paratei-ateihon ma!”