Dual PanelSahap ni Si Bildad; Sintong do Uhum ni Naibata
1Dob ai nini si Bildad na hun Sua ma mambalosi,
2“Sadia dokah on nunutonmu sonai marsahap, anjaha songon logou madoras parsahap ni pamanganmu?
3Mintor ra ma Naibata papeol uhum? Barang ra ma Pargogoh Na So Tarimbang in papeol hapintoron?
4Anggo mardousa anakmu dompak-Si, jadi ihonahon ma bani sidea hajahaton ni sidea ai.
5Anggo ra ho mangindahi Naibata, anjaha mangindo idop ni uhur ho humbani Pargogoh Na So Tarimbang in,
6anggo pitah uhurmu anjaha bonar, sai hehe do Ia manatap ho, pasuangon-Ni do use ianan ni hapintoronmu.
7Age pe etek pamungkahanni, sai banggal tumang do hadoharonmu bani ujungni.
8Mahua papangkei ma sundut na basaia, anjaha pardiateihon ma podah na jumpah ompung ni sidea.
9Ai jolma sinantuari do hita, seng dong na binotohta, anjaha halinoh tumang do ari-arinta i tanoh on.
10Ai lang sidea do siajari ho, na patugahkon bam, anjaha na manluarhon hata podah hun bagas uhur ni sidea?
11Tumaram ma tubuh arung-arung, anggo lang adong paya-paya? Mintor tarbahen ma dulas ganjang poyon-poyon bah, anggo seng dong bah?
12Sanggah martumbor ope, lape isabi, tapi melus do ai, parlobei humbani poyon-poyon na legan.
13Sonai do dalan ni ganup na mangkalupahon Naibata, maningon magou do pangarapan ni halak parjahat.
14Mapuntar do hatengeran ni uhurni, doskon asar ni lawah-lawah do pos ni uhurni.
15Mangunsandei ia bani rumahni, hape seng tahan jongjong ia, marsijoloman ia hujai, hape seng totap.
16Gok gotah do ia namin ibagas milas ni mata ni ari, anjaha manggargar dangkahni i babou ni pohonni.
17Manjulur do andorni bani timbunan batu, anjaha itolpusi longkit-longkit ni batu.
18Tapi anggo niruntun ia humbani iananni, parnalangonni ai ma ia, nini, ʻSeng ongga huidah ho.ʼ
19Tonggor ma, ai ma olob-olob ni goluhni, anjaha humbani orbuk ai martumbor use halak na legan.
20Tonggor ma, seng tumaram ambungkonon ni Naibata halak na daulat maruhur, barang tumpakon-Ni tangan ni parjahat.
21Gok tawa do use pamanganmu bahenon-Ni, anjaha bibirmu gok parolob-oloban.
22Pailaon-Ni do halak na marsogam ni uhur bam, anjaha boiskonon-Ni do lampolampo ni parjahat.”