Dual Panel5. Galangan bani Ari Raya Partarompitan
1Bani ari sada bulan pitu maningon pamasaonnima do bennima sada tumpuan na mapansing; seng bulih horjahononnima ijai age aha horja ari-ari, ari partarompitan do ai bennima.
2Maningon galangkononnima do ijai sada anak ni lombu, sada biribiri tunggal, pitu anak ni biribiri na marumur satahun, sagala na so martikas, bahen galangan situtungon, uap na misbou bani Jahowa;
3sonai homa itak na lumat, na niagu pakon minak bahen galangan sipanganon, tolu parsapuluh efa antup ni lombu ai, dua parsapuluh antup ni biribiri tunggal ai;
4anjaha saparsapuluh antup ni ganup biribiri na pitu ai;
5rap pakon hambing tunggal sada bahen galangan pardousaon, mambahen pardearan bennima;
6sobali galangan situtungon bani poltak ni bulan rap pakon galangan sipanganonni, tambah ni galangan situtungon na manongtong rap pakon galangan sipanganonni ampa galangan siinumonni, romban hubani aturanni, bahen uap na misbou, galangan apuy bani Jahowa.
6. Galangan bani Ari Raya Pardearan
7Bani ari sapuluh bani bulan pitu maningon pamasaonnima do bennima sada tumpuan na mapansing, anjaha maningon paundukonnima do uhurnima ijai, horja aha pe lang boi horjahononnima ijai.
8Maningon galangkononnima do ijai sada anak ni lombu, sada biribiri tunggal, pitu anak ni biribiri na marumur satahun, sagala na so martikas, bahen galangan situtungon, uap na misbou bani Jahowa,
9rap pakon itak na lumat, na niagu pakon minak, bahen galangan sipanganon, tolu parsapuluh efa antup ni lombu ai, dua parsapuluh antup ni biribiri tunggal ai,
10anjaha saparsapuluh antup ni ganup anak ni biribiri na pitu ai;
11sonai homa sada hambing tunggal bahen galangan pardousaon sibahen pardearan ai, tambah ni galangan situtungon na manongtong rap pakon galangan sipanganonni, ampa galangan siinumonni.
7. Galangan bani Ari Parlampolampoan
12Bani ari sapuluh lima bulan pitu maningon pamasaonnima do bennima sada tumpuan na mapansing, age sada horja ari-ari seng bulih horjahononnima ijai, maningon marari-raya hanima bani Jahowa pitu ari dokahni;
13anjaha maningon galangkononnima do sapuluh tolu anak ni lombu, dua biribiri tunggal, sapuluh ompat anak ni biribiri na marumur satahun, sagala na so martikas, bahen galangan situtungon, sada galangan apuy, uap na misbou bani Jahowa;
14rap pakon itak na lumat, na niagu pakon minak, bahen galangan sipanganon tolu parsapuluh efa antup ni ganup anak ni lombu na sapuluh tolu ai, dua parsapuluh bani ganup biribiri tunggal na dua ai,
15anjaha saparsapuluh antup ni ganup anak ni biribiri na sapuluh ompat ai;
16sonai homa sada hambing tunggal bahen galangan pardousaon tambah ni galangan situtungon na manongtong rap pakon galangan sipanganonni ampa galangan siinumonni.
17Anjaha bani ari paduahon: Sapuluh dua anak ni lombu, dua biribiri tunggal sapuluh ompat anak ni biribiri na marumur satahun, na so martikas,
18rap pakon galangan sipanganonni pakon galangan siinumonni antup ni anak ni lombu ai, antup ni biribiri tunggal pakon antup ni biribiri ai, marguru hubani bilanganni bei, romban hubani aturanni;
19sonai homa hambing tunggal bahen galangan pardousaon, tambah ni galangan situtungon na manongtong rap pakon galangan sipanganonni ampa galangan siinumonni.
20Anjaha bani ari patoluhon: Sapuluh sada anak ni lombu, dua biribiri tunggal, sapuluh ompat anak ni biribiri na marumur satahun, na so martikas,
21rap pakon galangan sipanganonni pakon galangan siinumonni, antup ni lombu ai, antup ni hambing tunggal pakon anak ni biribiri ai, marguru hubani bilanganni bei, romban hubani aturanni,
22sonai homa sada hambing tunggal bahen galangan pardousaon, tambah ni galangan situtungon na manongtong rap pakon galangan sipanganonni pakon galangan siinumonni.
23Anjaha bani ari paompatkon: Sapuluh anak ni lombu, dua biribiri tunggal, sapuluh ompat anak ni biribiri na marumur satahun, na so martikas,
24rap pakon galangan sipanganonni pakon galangan siinumonni, antup ni lombu ai, antup ni biribiri tunggal pakon antup ni anak ni biribiri ai, marguru hubani bilanganni bei, romban hubani aturanni;
25sonai homa sada hambing tunggal bahen galangan pardousaon, tambah ni galangan situtungon na manongtong rap pakon galangan sipanganonni pakon galangan siinumonni.
26Anjaha bani ari palimahon: Siah anak ni lombu, dua biribiri tunggal, sapuluh ompat anak ni biribiri na marumur satahun, na so martikas,
27rap pakon galangan sipanganonni pakon galangan siinumonni, antup ni anak ni lombu ai, antup ni biribiri tunggal pakon antup ni anak ni biribiri ai, marguru hubani bilanganni bei, romban hubani aturanni;
28sonai homa sada hambing tunggal bahen galangan pardousaon, tambah ni galangan situtungon na manongtong rap pakon galangan sipanganonni ampa galangan siinumonni.
29Anjaha bani ari paonomkon: Ualuh anak ni lombu, dua biribiri tunggal, sapuluh ompat anak ni biribiri na marumur satahun, na so martikas,
30rap pakon galangan sipanganonni pakon galangan siinumonni, antup ni anak ni lombu ai, antup ni biribiri tunggal pakon antup ni anak ni biribiri ai, marguru hubani bilanganni bei, romban hubani aturanni;
31sonai homa sada hambing tunggal bahen galangan pardousaon, tambah ni galangan sipanganonni na manongtong rap pakon galangan sipanganonni ampa galangan siinumonni.
32Anjaha bani ari papituhon: Pitu anak ni lombu, dua biribiri tunggal, sapuluh ompat anak ni biribiri na marumur satahun, na so martikas,
33rap pakon galangan sipanganonni pakon galangan siinumonni, antup ni anak ni lombu ai, antup ni biribiri tunggal pakon antup ni anak ni biribiri ai, marguru hubani bilanganni bei, romban hubani aturanni;
34sonai homa sada hambing tunggal bahen galangan pardousaon, tambah ni galangan situtungon na manongtong rap pakon galangan sipanganonni ampa galangan siinumonni.
35Anjaha bani ari paualuhkon, ijai ma pamasaon partumpuan ai, age sada horja ari-ari seng bulih horjahononnima ijai,
36tapi maningon galangkononnima do sada anak ni lombu, sada biribiri tunggal, pitu anak ni biribiri na marumur satahun, na so martikas, bahen galangan situtungon, galangan apuy, uap na misbou bani Jahowa,
37rap pakon galangan sipanganonni ampa galangan siinumonni, antup ni lombu ai, antup ni biribiri tunggal pakon antup ni anak ni biribiri ai, marguru hubani bilanganni bei, romban hubani aturanni;
38sonai homa sada hambing tunggal bahen galangan pardousaon, legan ni galangan situtungon na manongtong rap pakon galangan sipanganonni pakon galangan siinumonni.
39On ma galangan sigalangkononnima bani Jahowa bani ari rayanima, tambah ni bagah-bagahnima pakon sibere-bere niojur ni uhurnima, bahen galangan situtungon, galangan sipanganon, galangan siinumon pakon galangan pardameian bennima.
40Dob ai ipadas si Musa ma hubani halak Israel haganup na dob tinonahkon ni Jahowa hubani si Musa.