Dual PanelHorja ni Halak Levi Laho Bingkat Bangsa ai
1Dob ai nini Jahowa ma hubani si Musa pakon si Aron,
2“Buat ma bilangan ni anak ni si Kahat hun tongah-tongah ni anak ni si levi, mar sasamarga pakon mar sasaompung,
3singgan ni na marumur tolu puluh tahun pakon i atasni ai das bani na marumur lima puluh tahun, sagala na boi masuk bani horja, ase idalankon horja bani lampolampo partumpuan ai.
4On ma horja ni anak ni si Kahat ibagas lampolampo partumpuan, na pansing sahalian ai.
5Anggo laho bingkat ma tumpuan ai, masuk ma si Aron pakon anakni ai laho paturunkon tirei parholangan ai, anjaha ibalutkon ma poti hasaksian ai hujai.
6Dob ai inahkon sidea ma hu atasni sada tutup humbani bobak ni hambing, anjaha paherbangonni ma i atasni ai sada hiou na mahonda sahalian, anjaha inahkon ma lanja-lanjani ai hujai.
7Anjaha maningon paherbangon ni sidea ma i atasni meja hatibalan ni ruti sigalangonkon ai sada hiou na mahonda, anjaha i atasni ai inahkon ma pinggan batil, mangkuk, pakon serek galangan siinumon; i atasni ai homa ruti sigalangkonon ari-ari;
8i atasni ai maningon paherbangon ni sidea do sada hiou na magerger, anjaha itutupi ma ai bani sada tutup na humbani bobak ni hambing, dob ai inahkon ma hujai lanja-lanjani.
9Anjaha buaton ni sidea ma sada hiou na mahonda, bahen pambaluti ni parpalitaan ai rap pakon palitani pakon panurturini, pangintopini ronsi ganup parminakanni, ai ma parugas na patorsahon parpalitaan ai.
10Nahkonon ni sidea ma ai rap pakon ganup parugasni hubagas sada tutup na humbani bobak ni hambing, anjaha inahkon ma hu atasni sada pangusungan.
11Anjaha hu atas ni anjapanjap omas ai pe maningon paherbangon ni sidea do sada hiou na mahonda, anjaha itutup ma ai bani tutup humbani bobak ni hambing, anjaha inahkon ma hujai lanja-lanjani.
12Buaton ni sidea ma homa ganup parugas tohonan, na pinakei ni sidea ibagas ianan na pansing ai, anjaha ibaluti ma ai bani hiou na mahonda, anjaha itutupi ma ai bani tutup humbani bobak ni hambing, anjaha inahkon ma ai bani sada pangusungan.
13Buaton ni sidea ma abuan ai humbani anjapanjap ai, anjaha ipaherbang ma hu atasni sada hiou na tinubar.
14Inahkon ma hu atasni ganup parugas ni anjapanjap ai, na pinakei marugas ijai: Parapuyan, garpu, suyuk-suyuk ampa mangkuk pamispisan, haganup tene parugas ni anjapanjap ai, anjaha ipaherbang ma i atasni sada tutup humbani bobak ni hambing, anjaha inahkon ma hujai lanja-lanjani.
15Ia dob ibaluti si Aron pakon anakni ai parugas ni ianan na pansing ai, sanggah na laho bingkat tumpuan ai, masuk ma anak ni si Kahat laho mangusung ai. Ai ma siusungon ni anak ni si Kahat humbani lampolampo partumpuan ai.
16Anjaha si Eleasar, anak ni Malim Aron, ia ma haondosan ni minak na bani parpalitaan ai, na misbou-misbou ai, galangan sipanganon ari-ari pakon minak pamminakion, sonai homa tohonan paturei-turei ganup lampolampo ai ronsi ganup isini, age ianan na pansing ia ronsi ganup parugasni.”
17Dob ai nini Jahowa ma hubani si Musa pakon hubani si Aron,
18“Ulang ma lopas hanima bois marga ni ginompar ni si Kahat hun tongah-tongah ni halak Levi,
19tapi sonon ma bahen hanima hubani sidea, ase manggoluh sidea anjaha ulang matei, sanggah na roh sidea hun dohor bani parugas na pansing ai: Si Aron pakon anakni ai ma masuk hubagas laho patuduhon bani sidea horjani pakon siusungon ni sidea.
20Tapi seng bulih masuk sidea hubagas laho mangidah ugas-ugas na pansing ai, age tongkin gelah, ase ulang matei sidea.”
21Dob ai nini Jahowa ma hubani si Musa,
22“Buat ma homa bilangan ni anak ni si Gerson mar sasaompung pakon mar sasamarga,
23singgan ni na marumur tolu puluh tahun pakon i atasni ai ronsi na marumur lima puluh tahun bilangonmu sidea, sagala na boi masuk bani horja ibagas lampolampo partumpuan ai.
24On do tene horja ni ginompar ni si Gerson, ai ma sihorjahonon pakon siusungon ni sidea,
25Sidea do na maningon mangusung parmadani ni lampolampo ai pakon lampolampo partumpuan ai rap pakon langit-langitni pakon tutupni na humbani labah harohan hu lampolampo partumpuan ai,
26pakon tirei ni alaman, pakon tirei tutup ni labah laho hu alaman inggot ni lampolampo ampa anjapanjap ai, ronsi ganup talini, pakon ganup parugas ni tohonan ni sidea; ganup na porlu sibahenon ijai, maningon sidea do mangkorjahon.
27Maningon romban hubani hata ni si Aron pakon anakni ai horjahonon ni anak ni si Gerson ganup horja ai, pasal ganup siusungon ni sidea pakon pasal ganup sihorjahonon ni sidea; anjaha maningon hanima do mangondoskon bani sidea sagala siusungon ni sidea.
28Ai ma horja ni ginompar ni anak ni si Gerson ibagas lampolampo partumpuan ai, anjaha maningon marguru bani si Itamar, anak ni Malim Aron do horjahonon ni sidea ai.
29Anak ni si Merari pe, maningon bilangonmu do, mar sasamarga pakon mar sasaompung,
30singgan na marumur tolu puluh tahun pakon i atasni ai das ronsi marumur lima puluh tahun bilangonmu sidea, sagala na boi masuk marhorja, laho mangkorjahon horja ibagas lampolampo partumpuan ai.
31Anjaha on do siondoskonon siusungon ni sidea, na gabe sihorjahonon ni sidea ganup ibagas lampolampo partumpuan ai: Papan ni lampolampo ai, ransang-ransangni, tiangni pakon onjolanni,
32tiang ni alaman ai inggot pakon onjolanni, pakuni ampa talini, ronsi ganup parugasni ampa ganup sihorjahonon ijai; mangihutkon goranni ondoskononnima parugas ai, laho padaskon bani ganup sidea siusungonni bei.
33Ai ma horja ni ginompar ni si Merari pasal haganup sihorjahonon ni sidea ibagas lampolampo partumpuan ai, marguru hubani si Itamar, anak ni Malim Aron.”
34Jadi ibilangi si Musa, si Aron pakon pambobai ni tumpuan ai ma anak ni si Kahat mar sasamarga pakon mar sasaompung,
35singgan ni na marumur tolu puluh tahun pakon i atasni ai ronsi na marumur lima puluh tahun, sagala na boi masuk marhorja laho mangkorjahon horja ibagas lampolampo partumpuan ai;
36anjaha bilangan ni sidea mar sasamarga dua ribu pitu ratus lima puluh halak do.
37Ai ma bilangan ni ginompar ni si Kahat, sagala na marugas ibagas lampolampo partumpuan ai, na dob binilang ni si Musa pakon si Aron, romban hubani hata ni Jahowa marhitei si Musa.
38Bilangan ni ginompar ni si Gerson, mar sasamarga pakon mar sasaompung,
39singgan na marumur tolu puluh tahun pakon i atasni ai ronsi na marumur lima puluh tahun, sagala na boi masuk marhorja, laho mandalankon horja ibagas lampolampo partumpuan ai;
40bilangan ni sidea mar sasamarga pakon mar sasaompung dua ribu onom ratus tolu puluh halak do bueini.
41Ai ma bilangan ni ginompar ni si Gerson, sagala na marugas ibagas lampolampo partumpuan ai, na dob binilang ni si Musa pakon si Aron romban hubani hata ni Jahowa.
42Bilangan ni ginompar ni si Merari mar sasamarga pakon mar sasaompung,
43singgan ni na marumur tolu puluh tahun pakon i atasni ai, das ronsi na marumur lima puluh tahun, sagala na boi masuk marhorja, laho mandalankon horja ibagas lampolampo partumpuan ai,
44bilangan ni sidea mar sasamarga pakon mar sasaompung tolu ribu dua ratus halak do bueini.
45Ai ma halak na tarbilang humbani ginompar ni si Merari, na dob binilang ni si Musa pakon si Aron, romban hubani hata ni Jahowa marhitei si Musa.
46Sagala na tarbilang ai, na dob binilang ni si Musa pakon si Aron ampa pambobai ni halak Israel, mar sasamarga pakon mar sasaompung,
47singgan ni na marumur tolu puluh tahun pakon i atasni ai das ronsi na marumur lima puluh tahun, sagala na boi masuk mandalankon horja parugason pakon horja mangusung ibagas lampolampo partumpuan ai,
48sidea na tarbilang ai ualuh ribu lima ratus ualuh puluh halak do bueini.
49Romban hubani hata ni Jahowa marhitei si Musa, ipatongon ma bani sidea siugaskononni pakon siusungon ni sidea bei; sonai ma ipatongon bani sidea, songon na tinonahkon ni Jahowa bani si Musa.