Dual PanelPasal Parpalitaan Omas
1Dob ai nini Jahowa ma hubani si Musa,
2“Marsahap ma ho hubani si Aron anjaha hatahon ma hu bani, anggo ipagara ho palita ai, maningon hu lobei ni parpalitaan ai marsinalsal palita na pitu ai.”
3Jadi ibahen si Aron ma sonai; hampit lobei ni parpalitaan ai do ipagara palitani, romban hubani tonah ni Jahowa hubani si Musa.
4Sonon do parpaulini bani parpalitaan ai: Itopa do ai humbani omas pitah; age naheini sonai homa bungani, romban hubani tiruan na pinatuduhkon ni Jahowa hubani si Musa, sonai do ipauli parpalitaan ai.
Pamasu-masuon ni Halak Levi
5Dob ai nini Jahowa ma hubani si Musa,
6“Arahkon ma halak Levi hun tongah-tongah ni halak Israel, anjaha urasi ma sidea.
7Anjaha sonon do bahenonmu hubani sidea laho mangurasi sidea, Pispiskon ma hubani sidea bah pangurasion hubani dousa, dob ai suhuron ni sidea ma ganup badan ni sidea, anjaha susionni pakeanni ase borsih sidea.
8Dob ai buaton ni sidea ma sada anak ni lombu rap pakon itak na lumat, na niagu pakon minak bahen galangan sipanganon iringanni ai, dob ai buatonmu ma sada nari anak ni lombu bahen galangan pardousaon.
9Dob ai hatahon ma halak Levi roh hun dohor hu lobei ni lampolampo partumpuan ai, anjaha patumpu ma ganup tumpuan ni halak Israel.
10Anggo domma ipatumpu ho halak Israel hu lobei ni Jahowa, tampeihonon ni halak Israel ma tangan ni sidea hubani halak Levi.
11Anjaha toguon ni si Aron ma halak Levi ai hu lobei ni Jahowa, songon sada galangan sitatangon humbani halak Israel, ase talup sidea mangkorjahon horja ni Jahowa.
12Dob ai nahkonon ni halak Levi ma tangan ni sidea hubani ulu ni lombu ai, anjaha galangkononmu ma na sada bahen galangan pardousaon anjaha na sada nari bahen galangan situtungon bani Jahowa, mambahen pardearan bani halak Levi.
13Dob ai maningon pajongjongonmu halak Levi i lobei ni si Aron pakon anakni ai, laho mangondoskon sidea songon galangan sitatangon bani Jahowa.
14Sonai ma papuligonmu halak Levi hun tongah-tongah ni halak Israel, ase Ahu simada halak Levi.
15Dob ai masuk ma halak Levi ai, ase marugas sidea ibagas lampolampo partumpuan ai, dobkonsi iurasi anjaha iondoskon ho sidea songon galangan sitatangon.
16Ai sibere-bere Bangku do sidea hun tongah-tongah ni halak Israel; ai gantih ni na parlobei hun partapaan, sagala bunga tubuh humbani halak Israel do sidea Hubuat Bangku.
17Ai Ahu do simada ganup bunga tubuh i tongah-tongah ni halak Israel, age na humbani jolma, age na humbani pinahan, singgan ni ari dob Hubunuh bunga tubuh i tanoh Masir, domma Hupapansing sidea Bangku,
18anjaha domma Hubuat halak Levi gantih ni sagala bunga tubuh i tongah-tongah ni halak Israel.
19Domma Hulayak-layakkon halak Levi bahen hasoman ni si Aron pakon anakni ai hun tongah-tongah ni halak Israel laho marugas bani lampolampo partumpuan ai, anjaha mambahen pardearan bani halak Israel, ase ulang masa papa i tongah-tongah ni halak Israel, anggo roh sidea hun dohor bani ianan na pansing ai.”
20Dob ai ibahen si Musa pakon si Aron ampa haganup tumpuan ni halak Israel ma sonai hubani halak Levi romban hubani haganup na tinonahkon ni Jahowa hubani si Musa pasal halak Levi ai, sonai do ibahen halak Israel hubani sidea.
21Dob ai iurasi halak Levi ma dirini bei humbani dousa, anjaha isusi bei ma pakeanni, anjaha iondoskon si Aron ma sidea songon galangan sitatangon i lobei ni Jahowa, anjaha si Aron do mambahen pardearan bani sidea laho papansingkon sidea,
22Dob ai masuk ma halak Levi, laho mandalankon horja ni sidea ibagas lampolampo partumpuan ai i lobei ni si Aron pakon anakni ai; songon na tinonahkon ni Jahowa hubani si Musa pasal halak Levi ai, sonai do ibahen hubani sidea.
Panorang Parugason ni Halak Levi
23Dob ai nini Jahowa ma hubani si Musa,
24“On do na mardomu hubani halak Levi: Singgan ni na marumur dua puluh lima tahun pakon i atasni ai, maningon masuk sidea laho mangkorjahon horja ibagas lampolampo partumpuan ai,
25tapi dob marumur lima puluh tahun, maluah ma sidea humbani horja parugason, seng be marhorja sidea.
26Boi do namin urupan ni sidea anggini marhorja i lampolampo partumpuan ai, laho mangkorjahon sihorjahononkon, tapi seng be bulih sidea marjabatan. Sonai ma bahenonmu hubani halak Levi, pasal sihorjahonon ni sidea.”