Alkitab Mobile SABDA
[VER] : [SIMALUNGUN]     [PL]  [PB] 
 <<  Efesus 3 >> 

Paulus, Apostel bani Sipajuh Begu-begu

1Halani ai, ahu si Paulus, na tarrantei halani Kristus Jesus, halani nasiam sipajuh begu-begu.

2Tontu domma ibogei nasiam pasal jabatan mandalankon idop ni uhur ni Naibata, na dob pinadas-Ni ai hu bangku, laho paturei-tureihon nasiam.

3Marhitei pangungkabon do ipabotohkon bangku rusia ai, songon na dob husuratkon hinan otik pasal ai.

4Bani na mambasa ai, boi ma botohon nasiam sonaha pangarusionku bani rusia ni Kristus.

5Seng ipabotohkon ope ai bani anak ni jolma bani sundut sapari, tapi domma ipatalar ai nuan bani apostel-Ni na pansing in ampa nabi-nabi-Ni ibagas Tonduy,

6paboa dihut halak sipajuh begu-begu hasoman panean anjaha hasoman saangkula anjaha hasoman parrupei bani bagah-bagah na ibagas Kristus Jesus marhitei Ambilan Na Madear in.

7Na dob gabe siparugas ni ai do ahu domu hubani idop ni uhur na binere ni Naibata hu bangku, domu hubani pangkorhon ni hagogohon ni ai.

8Hu bangku, sietekan humbani haganup halak na mapansing in, ibere idop ni uhur on, ai ma mangambilankon bani sipajuh begu-begu habayakon ni Kristus na so tardadap in,

9anjaha patorangkon sonaha dalan parsaud ni rusia ai, na ponop humbani mulani ibagas Naibata, Sitompa haganup,

10ase ipatandahon ma sonari marhitei kuria in buei ni masam ni hapentaron ni Naibata bani siparrajai anjaha na markuasa i nagori atas,

11domu hubani na sinurahon-Ni humbani mula ni mulani, gabe ipasaud ibagas Kristus Jesus, Tuhanta in.

12Marhiteihon-Si jumpah hita do hinsah ni uhur ampa dalan masuk ibagas tenger ni uhur halani haporsayaon Bani.

13Halani ai, hupindo ma bani nasiam, ase ulang mandolei nasiam mangidah sitarononku mangkopkop nasiam, ai hasangapon nasiam do in.

Tonggo ni si Paulus Mangkopkop na Niajaranni

14Halani ai, manrogop do ahu i lobei ni Bapa in.

15Marpanggorani hu Bani do sagala bapa ni bangsa-bangsa, na i nagori atas age na i tanoh on,

16ase, domu hubani habayakon ni hasangapon-Ni in, ibere gogoh ampa kuasa marhitei Tonduy-Ni bani jolma parbagas nasiam,

17ase marianan Kristus marhitei haporsayaon ibagas uhur nasiam, gabe totap nasiam marurat anjaha maronjolan bani holong,

18ase boi nasiam rap pakon haganup halak na pansing in mangarusi sonaha ganjangni ampa bolagni, bagasni ampa gijangni,

19anjaha mananda holong ni uhur ni Kristus, na mangatasi sagala pangarusion, ase das ma bani nasiam haganup hagogok ni Naibata.

20Tapi tarbahen-Si do lobih humbani na pinindonta barang na piningkiranta, domu hubani hagogohon na marhorja ibagas hita.

21Bani ma hasangapon ibagas kuria in ampa ibagas Kristus marsundut-sundut ronsi sadokah ni dokahni. Amen.


  Share Facebook  |  Share Twitter

 <<  Efesus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel