Alkitab Mobile SABDA
[VER] : [SIMALUNGUN]     [PL]  [PB] 
 <<  Filemon 1 >> 

Tabi bani si Pilemon

1Hun bani si Paulus, na tartutup halani Kristus Jesus, ampa si Timoteus, sanina in, hubani si Pilemon, na hinaholongan ampa hasoman sahorjanami,

2ampa hubani si Appia, botounami, ampa hubani si Arkippus, hasomannami maruntol, ampa hubani kuria na martumpu i rumahmu:

3Idop ni uhur ma bani nasiam ampa damei humbani Naibata Bapanta, ampa humbani Tuhan Jesus Kristus.

Holong ampa Haporsayaon ni si Pilemon

4Mangkatahon tarima kasih do ahu tongtong bani Naibatangku, siap hudingat ham bani tonggongku.

5Ai hubogei do holong ni uhurmu ampa habujuronmu bani Tuhan Jesus pakon dompak haganup halak na mapansing.

6Anjaha hutonggohon do, ase parsaoranmu ibagas haporsayaon in mangkorhon panandaion ma in bani haganup na madear na adong banta ibagas Kristus.

7Holongmu ai, ham saninangku, ihorhon do bangku buei malas ni uhur ampa apoh-apoh, ai ipahinsah ham do uhur ni halak na mapansing in.

Pangindoan Pasal si Onesimus

8Halani ai, age pe barani do namin ahu ibagas Kristus, mamarentahkon bamu mambahen na patut,

9tapi dearan ma halani uhur holong ahu mangindo bamu, ahu, si Paulus, sada halak na dob matua, na targari nuan halani Kristus Jesus.

10Ase huelek-elek ma ham pasal si Onesimus (na marguna), anakku ibagas Kristus, na hutubuhkon sanggah na tartutup on ahu.

11Seng marguna hinan ia bamu, tapi sonari marguna ma bamu age bangku.

12Husuruh do ia mulak bamu, tampuk ni atei-ateihu do ia.

13Sihol do namin jolomanku ia, ase gantihmu ia laho patorsa-torsahon ahu, na tartutup on halani Ambilan Na Madear in.

14Tapi seng ra ahu mambahen age aha pe, anggo seng humbani dear ni uhurmu, ase ulang ma songon paksaan dear ni layakmu, tapi humbani rosuh ni uhurmu ma.

15Ra, ase sirang pe ia tongkin hun bamu, ase lalab do ia bamu,

16seng be songon sada jabolon, tapi lobih ma humbani jabolon, ai ma sanina na hinaholongan, tarlobih hu bangku, tontu lobihan ma bamu, ibagas daging ampa ibagas Tuhan in.

17Ase anggo huanmu do ahu ihira ham, jalo ham ma ia songon ahu.

18Tapi, anggo adong salahni atap utangni bamu, hu bangku ma ai parkirahon ham.

19Ahu, si Paulus, manuratkon on marhitei tanganku sandiri. Ahu ma manggalar ai; seng pala tarsingatanku, na marutang do ham namin pasal dirimu hu bangku.

20Ham saninangku, sihol do hun bamu maruntung ahu ibagas Tuhan in; pahinsah ham ma uhurhu ibagas Kristus.

Hata Parujungan

21Tenger do uhurhu, sanggah na manurat on, balosanmu do na hupindohon, lobih tene humbani na huhatahon.

22Ambah ni ai pasirsir ham ma ianan bangku, ai mangarap do ahu, halani tonggo nasiam bereon-Ni do mulak ahu bani nasiam.

23Manongos tabi bamu, si Epapras, hasomanku tartutup ibagas Kristus Jesus,

24sonai homa si Markus, si Aristarkus, si Demas ampa si Lukas, hasomanku sahorja.

25Ihasomani idop ni uhur ni Tuhan Jesus Kristus ma tonduy nasiam.


  Share Facebook  |  Share Twitter

 <<  Filemon 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel