Dual PanelIakui Apostel na Legan do Ambilan Na Madear na Binoan ni si Paulus bani Halak Sipajuh Begu-begu
1I pudini ai, dob salpu sapuluh ompat tahun, tangkog ma ahu use hu Jerusalem rap pakon si Barnabas; anjaha huboan do homa si Titus.
2Tapi mangihutkon pangungkabon do na tangkog ai ahu. Anjaha hupatorang ma bani sidea Ambilan Na Madear na huambilankon bani halak sipajuh begu-begu, tarlobih ma ai hubani na sangap-sangap ai, ase ulang soya parlintunonku hu lobeian on age na dob in.
3Gari si Titus, hasomankin, halak Gorik in, seng ipaksa ase tarsunat.
4Tapi adong do deba sanina na so haru sanina, na pasamak-samakkon dirini, na roh masuk bannami, laho manggompangi hamardekaon na adong bannami ibagas Jesus Kristus, laho patunduk hanami bani parjabolonon.
5Tapi tongkin pe lang tunduk hanami bani sidea, ase totap bani nasiam hasintongan ni Ambilan Na Madear in.
6Tapi sidea na marsangap ai (atap ise sidea hinan, seng penting bangku ai, ai seng sididah bohi Naibata), seng adong itambahi sidea bani na adong bangku hinan.
7Tapi suharni ai do, ididah sidea do, na dob iondoskon do bangku Ambilan Na Madear hubani halak na so marsunat, songon si Petrus hubani halak na marsunat.
8Ai Ia, na pabangkitkon si Petrus gabe apostel bani halak na tarsunat, lanjar Ia do pabangkitkon ahu bani halak na so marsunat.
9Anjaha dob ididah sidea idop ni uhur na dob binere bangku, ai ma si Jakobus, si Kepas ampa si Johannes, na songon tiang iahap hasoman, gabe ijabattangani sidea ma ahu pakon si Barnabas, ai ma tanda ni parsaoran, paboa hanami hubani sipajuh begu-begu, tapi sidea hubani na marsunat,
10asal ma iingat hanami halak na masombuh; anjaha saud do huporluhon mandalankon ai.
Ihata si Paulus si Petrus Halani Hasintongan ni Ambilan Na Madear
11Tapi sanggah roh si Kepas hu Antiokia, dumpar do hulawan ia, halani torang adong salahni.
12Ai paima roh piga-piga halak suruhan ni si Jakobus, rap mangan do ia pakon sipajuh begu-begu, tapi dob roh sidea, surut ma ia anjaha ipaholang ma dirini, halani biar ni uhurni bani sidea na marsunat ai.
13Anjaha halak Jahudi na legan ai pe dihut do marsipahulah-hulah, pala do age si Barnabas dihut bani hasipahulah-hulahon ni sidea ai.
14Tapi dob huidah, na so pintor be langkah ni sidea domu hubani hasintongan ni Ambilan Na Madear in, ningku ma dompak si Kepas i lobei ni sidea haganup, “Anggo ham, sada halak Jahudi, manggoluh mangihutkon adat ni sipajuh begu-begu, sedo adat ni Jahudi, sonaha ma boi paksaonmu halak sipajuh begu-begu, mangihutkon adat Jahudi?
15Halak Jahudi do hanami mangihutkon partubuh, sedo pardousa humbani sipajuh begu-begu.
16Tapi ibotoh hanami do, na so dapotan hapintoron jolma marhitei na mangkorjahon titah, tapi marhitei haporsayaon bani Jesus Kristus do. Halani ai, hanami pe, marhaporsayaon do bani Kristus Jesus, ase ipintori hanami marhitei haporsayaon bani Kristus, sedo marhitei na mangkorjahon titah, ai marhitei na mangkorjahon titah, seng adong na dapotan hapintoron.
17Tapi anggo pardousa do jumpah age hanami, na sihol pintor marhitei Kristus, ai lang juakjuak ni dousa ma age Kristus? Lang ale!
18Tapi anggo hupauli use na dob huparseda, hupajongjong do diringku sipanlanggar.
19Ai domma matei ahu bani titah in marhitei titah in, ase manggoluh ahu bani Naibata. Rapkon Kristus in do ahu tarsilang.
20Seng be ahu na manggoluh in nuan, tapi Kristus do manggoluh ibagas ahu. Ia manggoluh pe ahu nuan ibagas daging, ai ma manggoluh ibagas haporsayaon bani Anak ni Naibata, na mangkaholongi ahu anjaha na mamberehon diri-Ni mangkopkop ahu.
21Seng hutulak idop ni uhur ni Naibata, ai ambit adong hapintoron marhitei titah, soya ma parmatei ni Kristus.”