Dual PanelHolong ni Atei ni Naibata bani Bangsa-Ni Sipardousa
1“Sanggah danak Israel, holong do atei-Hu hu bani; hun Masir do Hudilo anak-Ku.
2Lambin Hudilo sidea, lambin daohni do sidea laho hun Bangku. Sai manggalang do sidea bani Baal, anjaha manutung dahupa bani gana-gana.
3Ahu do na mangajar Efraim mardalan, Huabing do sidea bani tangan-Ku, tapi seng ibotoh sidea, Ahu do na pamalum sidea.
4Hutogu-togu do sidea marhitei tali idop ni uhur, marhitei panrahut holong; Ahu do na pahampungkon pasangan bani tangkuhuk ni sidea, Hupaunduk do diringku bani sidea, anjaha Hubere do sidea mangan.
5Maningon mulak do sidea hu tanoh Masir, anjaha Assur do gabe raja bani sidea, halani lang ra sidea mulak hu Bangku.
6Halani ai roh ma podang mandorab huta-huta ni sidea, iparseda ma pating-pating ni horbangan ni sidea, anjaha iboiskon sidea ibagas benteng-bentengni.
7Mandatei do bangsang-Ku mulak hu Bangku. Age pe adong na dilo-dilo bani sidea, seng tarjongjongkonsi be.
8Sonaha ma panadingkon-Ku bam, ale Efraim? Sonaha ma parpaturut-Ku bam, ale Israel? Ija ma ra Ahu mambahen bam songon na bani Adma? Ija ma ra Ahu mambahen bam songon na bani Seboim? Marulak-ulakan do uhur-Hu ibagas, nahit do holong ni atei-Hu.
9Seng dalankonon-Ku ringis-Ku na gajag in, seng be parsedaon-Ku Efraim. Ai Naibata do Ahu, sedo jolma, ai ma Na Mapansing ai i tongah-tongahnima, seng roh be Ahu mamboiskon.
10Irikkonon ni sidea do Jahowa, maraum do Ia songon singa; tongon, maraum do Ia, anjaha marrohan ma anakni hitir-hitir hun hasundutan.
11Marrohan do sidea meper-eper songon manuk-manuk hun Masir, anjaha songon asas hun Assur; paulakon-Ku do sidea marianan bani rumah ni sidea,” nini Jahowa.
12(12-1) “Ilioti Efraim do Ahu marhitei ladung anjaha ginompar ni Israel marhitei pangoto-otoion. Anjaha Juda pe marbalik do humbani Naibata ampa humbani Na Mapansing in, hatengeran ni uhur in.