Alkitab Mobile SABDA
[VER] : [SIMALUNGUN]     [PL]  [PB] 
 <<  Ibrani 6 >> 

Hasedaon ni Halak na Marbalik humbani Haporsayaon

1Halani ai tadingkon hita ma lobei podah pamungkah pasal Kristus, anjaha toruskon hita ma hubani podah bani halak na dob matoras. Ulang be naulaki pauli onjolan pasal na paubahkon uhur humbani horja hamatean ampa na mangkaporsayai Naibata,

2podah pasal pandidion ampa na manampeihon tangan, pasal parpuhoon ni halak na dob matei ampa paruhuman sisadokah ni dokahni.

3Anjaha bahenonta do ai, anggo ilopas Naibata.

4Ia sidea, na dob ongga santorap ipalihar, idai sibere-bere parnagori atas ai, gabe parrupei bani Tonduy Na Pansing,

5na dob idai hata na mantin na humbani Naibata ampa hagogohon ni dunia simagira,

6anggo marbalik sidea, sabonar na so tarpabayu be sidea, ase mubah use, ai na dob mangulaki mamparsilangkon Anak ni Naibata do sidea ijai anjaha ipabador, gabe hamagouan ni sidea sandiri.

7Ai tanoh, na mangonsop bah udan, na sai roh hujai, anjaha itubuhkon suan-suanan na marguna bani na mangkorjahonsi, ai do na dapotan pasu-pasu humbani Naibata,

8tapi tanoh na manubuhkon hupihupi ampa duri-duri, seng na marguna ai, sipapaan ma ai podas, anjaha mosogkonon bani ujungni.

Golpa-golpa ase Totap Marsijoloman bani Bagah-bagah ai

9Tapi age pe sonai hatanami, nasiam na hinaholongan, tenger do uhurnami sidearan ai do bani nasiam, ai ma na mamboan hu haluahon.

10Ai sedo na geduk Naibata, gabe lupa Ia bani pambahenan nasiam ampa bani holong ni uhur nasiam, na pinatuduhkon nasiam bani goran-Ni, marhitei pangidangi nasiam hinan ampa sorani bani halak na mapansing in.

11Tapi ipindo uhurnami do, ase ganup ma nasiam patuduhkon porlu ni uhur na sonai, ai ma marsijoloman botul bani pangarapan in ronsi ujungni,

12ase ulang gabe rayohan nasiam, tapi tiru nasiam ma sidea, sitean bagah-bagah ai, marhitei na marhaporsayaon ampa marsabar ni uhur.

13Ai sanggah na mambere bagah-bagah-Ni Naibata bani si Abraham, halani seng dong be sibanggalhononni parbijaan-Ni, hubani siri-Ni sandiri do Ia marbija,

14nini, “Tongon pasu-pasuon-Ku do ho, anjaha tongon pabueion-Ku tumang do ho.”

15Jadi, halani sabar ia paima-imahon, gabe dapotsi do bagah-bagah ai.

16Ia jolma, sibanggalhonni do ibahen parbijaanni, anjaha bija ai do mangujungi sagala parsalisihan lanjar songon jaminan do ai.

17Halani ai, Naibata pe, bija do ipakei manjamin, laho patuduhkon bani sitean bagah-bagah ai sura-sura-Ni na so ra mubah ai,

18ase marhitei na adong banta dua fakta na so mubah-ubah in, ibagas ai seng boi Naibata marladung, adong do banta apoh-apoh na margogoh, banta na marhaporusan hujai laho marsijoloman hubani pangarapan na i lobeita ai.

19Ia pangarapan in, ai ma songon sauh bani tonduyta, na totap anjaha na toguh, na masuk das hubagas hirei-hirei ai.

20Hujai do masuk, gabe parlobeita, Jesus, na dob gabe Sintua ni Malim sadokah ni dokahni, mangihutkon aturan ni si Melkisedek.


  Share Facebook  |  Share Twitter

 <<  Ibrani 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel