Alkitab Mobile SABDA
[VER] : [SIMALUNGUN]     [PL]  [PB] 
 <<  Imamat 16 >> 

Ari Pardearan na Banggal

1Dob ai marsahap ma Jahowa hubani si Musa, dob matei anak ni si Aron na dua ai, sanggah na roh ai sidea hun dohor hu lobei ni Jahowa gabe matei,

2nini Jahowa ma hubani si Musa, “Hatahon ma hubani si Aron, abangmai, ase ulang tongtong ia masuk hubagas ianan na mapansing in, hubagas hirei-hirei ni langkop pardearan in, na i atas ni poti in, ase ulang matei ia; ai ibagas hombun in do Ahu talar i atas ni langkop pardearan in.

3Tapi sonon ma parmasuk ni si Aron hubagas ianan na mapansing in, ʻMarhitei sada anak ni lombu bahen galangan pardearan ampa marhitei sada anak ni biribiri tunggal bahen galangan situtungon.ʼ

4Maningon pakeionni do baju-baju linnen parbagas na mapansing ai, anjaha saluar linnen ai ma na marrungkub hatalanjangonni ai; margondit ma ia marhitei gondit linnen ai, anjaha ipargotong ma gotong linnen ai; pakean na mapansingdo ai, maningon parlobei maridi do ia ase boi pakeionni ai.

5Dob ai maningon buatonni do humbani tumpuan ni halak Israel dua hambing tunggal bahen galangan pardousaon ampa sada biribiri tunggal bahen galangan situtungon.

6Igalangkon si Aron ma lombu ai bahen galangan halani dousani sandiri, laho mambahen pardearan bani dirini sandiri ampa bani parrumahni.

7Dob ai ibuat ma hambing tunggal na dua ai, anjaha ipajongjong ma ai i lobei ni Jahowa, bani labah ni lampolampo partumpuan ai.

8Idabuh si Aron ma ruji-ruji pasal hambing tunggal na dua ai, sada ruji-ruji bani Jahowa anjaha ruji-ruji na sada nari bani Asasel (tonduy na jahat i halimisan).

9Igalangkon si Aron ma hambing tunggal na hona ruji-ruji ai bani Jahowa, bahen galangan pardousaon,

10tapi anggo hambing tunggal na hona ruji-ruji ni Asasel ai, maningon manggoluh do pajongjongon ai i lobei ni Jahowa laho mambahen pardearan marhitei ai, dob ai paluahon ma ai hubani Asasel, na i halimisan.

11Igalangkon si Aron ma galangan lombu pardousaon na bani ai, laho mambahen pardearan bani sandiri ampa bani parrumahni; maningon sayatonni do galangan lombu pardousaon na bani ai.

12Dob ai ibuat ma sada batil pardahupaan gok narnar na gara humbani anjapanjap ai na i lobei ni Jahowa, ampa dua nangging dahupa na misbou, na lumat niduda, anjaha iboan ma ai hubagas, hu pudi ni hirei-hirei ai;

13inahkon ma dahupa ai bani apuy ai i lobei ni Jahowa, ase irungkub timus ni dahupa ai langkob pardearan ai, na i atas ni hasaksian ai, ase ulang matei ia.

14Ibuat ma deba daroh ni lombu ai anjaha ipispiskon ma ai marhitei jari-jarini bani lobei-lobei ni langkob pardearan ai, anjaha pitu hali do pispiskononni daroh ai marhitei jari-jarini, bani lobei-lobei ni langkob pardearan ai.

15Dob ai isayat ma galangan hambing pardousaon ai, na bani bangsa ai, anjaha iboan ma darohni ai hubagas hirei-hirei ai, anjaha ibahen ma bani darohni ai, songon na binahenni ai bani daroh ni lombu ai; ipispiskon ma ai hubani langkob pardearan ai ampa i lobei ni langkob pardearan ai.

16Sonai ma bahenonni pardearan bani ianan na mapansing ai, halani habutakon ni halak Israel, halani panlanggaron ni sidea ampa haganup dousa ni sidea; anjaha sonai ma homa bahenonni hubani lampolampo partumpuan ai, na marianan rap pakon sidea, i tongah-tongah ni habutakon ni sidea ai.

17Sahalak pe seng bulih adong ibagas lampolampo partumpuan ai, sanggah na masuk ai ia laho mambahen pardearan ibagas ianan na mapansing ai ronsi na luar ia use. Sonai ma pajongjongonni pardearan bani dirini ampa bani parrumahni ampa bani haganup tumpuan ni halak Israel.

18Anjaha maningon luar do ia hu anjapanjap ai, na i lobei ni Jahowa, maningon bahenonni do homa pardearan pasal ai; ibuat ma deba humbani daroh ni lombu ai ampa humbani daroh ni hambing tunggal ai, anjaha ilapuhon ma ai hu tanduk ni anjapanjap ai inggot.

19Ipispiskon ma deba hujai humbani daroh ai marhitei jari-jarini pitu hali, laho manguras ampa papansingkon ai humbani habutakon ni halak Israel.

20Anjaha anggo domma salosei ibahen pardearan bani ianan na mapansing ai ampa bani lampolampo partumpuan ai ampa bani anjapanjap ai, ihatahon ma na mamboan hambing tunggal ai hu lobeini,

21anjaha itampeihon si Aron ma tanganni haduasi bani ulu ni hambing tunggal na manggoluh ai, laho paporsankon hubani haganup hajahaton ni halak Israel, ampa haganup panlanggaron ni sidea, haganup tene dousa ni sidea, maningon nahkononni do ai bani ulu ni hambing tunggal ai, anjaha isuruh ma sada halak na dob sirsir hinan manogu hambing tunggal ai hu halimisan.

22Hambing tunggal ai ma na mamorsan hajahaton ni sidea hu tanoh na malungun; dob ai ipaluah ma hambing tunggal ai i halimisan.

23Dob ai masuk ma si Aron hu lampolampo partumpuan ai, itanggali ma pakean linnen ai, na pinakeini sanggah masuk ia bani ianan na mapansing ai, lanjar itadingkon ma ijai;

24dob ai paridionni ma dirini ibagas bah bani ianan na mapansing, anjaha ipakei ma pakeanni ari-ari, anjaha dob luar ia, igalangkon ma galangan situtungon bani dirini sandiri ampa galangan situtungon bani bangsa ai, laho mambahen pardearan bani sandiri ampa bani bangsa ai.

25Ia taboh-taboh ni galangan pardousaon ai maningon tutungonni do ai i atas ni anjapanjap ai.

26Halak sitogu hambing tunggal ai hu Asasel, maningon susionni do pakeanni anjaha iparidi dirini ibagas bah, anjaha dob ai pe ase bulih masuk ia hubagas parsaranan ai.

27Ia lombu galangan pardousaon ai ampa hambing galangan pardousaon ai, na dob binoan ai darohni ai hubagas, laho mambahen pardearan ibagas ianan na mapansing ai, maningon boanon do ai hu darat ni parsaranan ai, anjaha hulingkuling ampa juhutni ampa kotoranni ai maningon bois do ai tutungon ibagas apuy.

28Anjaha halak na manutung ai, maningon susionni do pakeanni anjaha paridionni dirini ibagas bah, anjaha dob ai boi ma ia masuk hubagas parsaranan ai.

29Anjaha gabe paraturan ma on bennima ronsi sadokah ni dokahni. Bulan pitu ari sapuluh maningon do marpuasa hanima, anjaha seng bulih horjahononnima atap horja aha pe, age pangisi ni tanoh in hinan, atap halak dagang pe na manginsolat i tongah-tongahnima;

30ai bani ari ai do ibahen pardearan bennima laho manguras hanima; maningon taruras do hanima humbani haganup dousanima i lobei ni Jahowa.

31Gabe ari Sabat na mapansing tumang ma in bennima, anjaha maningon marpuasa do hanima; gabe paraturan ma in sadokah ni dokahni.

32Ia sidalankon pardearan na sonai ai, ai ma malim na dob niminakan anjaha na dob pinabangkit gabe malim manggantih bapani, anjaha maningon pakeionni do pakean linnen na mapansing ai.

33Ia do mambahen pardearan bani ianan na mapansing ai; maningon bahenonni do homa pardearan bani lampolampo na mapansing ai ampa bani anjapanjap ai, anjaha sonai homa bani malim-malim ai ampa haganup bangsa na i kuria ai.

34On ma gabe paraturan bennima ronsi sadokah dokahni, ai ma mambahen pardearan bani bangsa Israel sahali ibagas satahun. Jadi ibahen si Aron ma, songon na pinarentahkon ni Jahowa hubani si Musa.”


  Share Facebook  |  Share Twitter

 <<  Imamat 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel