Dual PanelLumba-lumba Dompak na Marnaibata na Legan ampa Goluh na So Porman
1Dob ai marsahap ma Jahowa hubani si Musa, nini ma,
2“Hatahon ma hubani halak Israel, barang ise humbani halak Israel atap humbani halak dagang pe, na marianan i Israel, na mangondoskon sada humbani anakni hubani Molok, maningon marutang hosah do ia; maningon dangguran ni parnagori in do ia bani batu.
3Ahu sandiri mandompakkon bohing-Ku manlawan halak ai, anjaha siapkonon-Ku do ia hun tongah-tongah ni bangsani, halani na binereni ai sada humbani anakni hubani Molok, gabe ipabutak ianan-Ku na mapansing in anjaha ipahiri goran-Ku na mapansing in.
4Anggo ipakulah bangsa parnagori in lang ididah halak ai, sanggah na iondoskon ai sada humbani anakni hubani Molok, anjaha seng ipamatei ia,
5jadi dompakkonon-Ku ma bohing-Ku dompak halak na sonai ai ampa dompak sindohorni, anjaha siapkonon-Ku do sidea hun tongah-tongah ni bangsani, ia ampa haganup halak na mangirikkonsi, na marbangkis bani Molok.
6Anggo adong halak na laho marsungkun hubani halak paniaran atap hubani halak sipartondung, marondos ia bani sidea, dompakkonon-Ku do bohing-Ku dompak halak ai, anjaha siapkonon-Ku do ia hun tongah-tongah ni bangsani.
7Halani ai manguras ma hanima anjaha pansing ma, ai Ahu do Jahowa Naibatanima.
8Ramotkon hanima ma titah-Ku, anjaha horjahon hanima ma ai; Ahu do Jahowa, na papansingkon hanima.
9Ai ganup halak, na mamapai bapani atap inangni maningon pamateon do; bapani ampa inangni do na pinapaanni, marsapata hu bani ma darohni.
10Anggo marbangkis sada dalahi ampa parinangon ni halak na legan, maningon haduasi do bunuhon, siparbangkis ai ampa na binangkisan ai.
11Anggo adong halak na mangkasomani na binuat ni bapani modom, na manalangi bapani do ia ai; maningon bunuhon do sidea haduasi, marsapata hubani sidea ma darohni.
12Anggo ihasomani sada halak parumaenni modom, haduasi sidea maningon bunuhon do; habadoron do na nidalankon ni sidea ai, marsapata hubani sidea ma daroh ni sidea.
13Anggo adong sada dalahi na marjolmahon dalahi, hagigi do na hinorjahon ni sidea na dua ai; maningon bunuhon do sidea, marsapata hubani sidea ma daroh ni sidea.
14Anggo ibuat sada dalahi sada naboru ampa inangni ai homa, hajahaton do ai; maningon tutungon ia ampa naboru na dua ai ibagas apuy, ase ulang masa pambahenan hasamboron i tongah-tongahnima.
15Anggo adong sada dalahi na marsaor ampa sada pinahan, maningon bunuhon do ia anjaha pinahan ai maningon siapkononnima do.
16Anggo adong sada naboru na mandohori pinahan, laho pasaorhon dirini hujai, maningon bunuhonmu do naboru ai rap pakon pinahan ai; maningon bunuhon do sidea, marsapata hubani sidea ma darohni.
17Anggo adong na mambuat botouni, ai ma boru ni bapani atap boru ni inangni, gabe marsaor sidea, habadoron do ai, anjaha maningon bunuhon do sidea i lobei ni ginompar ni bangsani; marsaor do ia ampa botouni, ia ma na manaronkon hajahatonni ai.
18Anggo rap modom sada halak ampa sada naboru, sanggah parroh ni pantang ni hiouni siganup bulan, anjaha marsaor ia pakonsi, gabe ipatalag na niabitanni ai anjaha naboru ai pe ra pasalangon ia, maningon haduasi do sidea siapkononkon hun tongah-tongah ni bangsani.
19Seng bulih ho marsaor ampa sanina ni inangmu, atap ampa namborumu ai na mansalangi na saboltok do ai; maningon mangonai do bani sidea hajahaton ni sidea.
20Anggo adong sada dalahi na marsaor ampa jolma ni sanina ni bapani, na pabutakkon podoman ni bapani ai do ia ai; mangonai do bani sidea dousa ni sidea ai, maningon matei popor do sidea.
21Anggo adong sada halak na mambuat jolma ni saninani, habadoron do ai, saninani do na pinabadorni ijai, seng anjai adong dakdanak bani sidea.
22Halani ai maningon ramotkononnima do titah-Ku ampa paraturan-Ku, anjaha dalankononnima do ai; ase ulang hona utahkon hanima ibahen tanoh sipadasonkai bennima, gabe ianan bennima.
23Anjaha ulang ma marparlahou hanima domu hubani hasomalan ni bangsa parbegu, siusiron-Kai hun lobei-lobeinima; ai ai do haganup ihorjahon sidea, ase magigi Ahu mangidah sidea.
24Tapi hu bennima Ningku do, ʻHanima do sitean tanoh ni sidea ai; Ahu do na manlayak-layakkon ai bennima, gabe siteanon bennima, ai ma tanoh habaoran ni dadih ampa manisan ni huramah. Ahu do Jahowa, Naibatanima, na papuligkon hanima humbani bangsa-bangsa.ʼ
25Halani ai maningon bahenonnima do parleganan ni pinahan na pansing humbani na butak, ampa manuk-manuk na pansing humbani na butak, ase ulang butak dirinima marhitei pinahan, manuk-manuk atap marhitei haganup na manjulur i atas tanoh in, na dob hupapulig paboa butak do ai bennima.
26Maningon pansing do hanima Bangku, ai na pansing do Ahu Jahowa, anjaha Ahu do na papulig hanima humbani bangsa-bangsa, ase Ahu simada hanima.
27Sada dalahi atap sada naboru, na gabe paniaran atap sipartondung, maningon bunuhon do sidea. Maningon matei pargijigon do sidea bani batu, marsapata bani sidea ma daroh ni sidea.”