Dual PanelPasal Tahun Sabat ampa Tahun Parolob-oloban
1Nini Jahowa ma hubani si Musa i atas ni Dolog Sinai,
2“Hatahon ma hubani halak Israel, anggo masuk ma hanima hu tanoh sibereon-Kai bennima, maningon marparsaranan Sabat do tanoh ai bani Jahowa.
3Ibagas onom tahun boi do tidahanmu jumamu, anjaha ibagas onom tahun boi do paborsihonmu ranting ni hayu anggurmu, anjaha ipatumpu buahni,
4tapi papitu-tahunkon maningon marparsaranan Sabat do tanoh ai, ai ma Sabat bani Jahowa; seng bulih tidahanmu jumamu atap paborsihonmu ranting ni hayu anggurmu.
5Ia sagak ni pariamamu seng bulih pariamaonmu, anjaha buah ni hayu anggur na so pinaborsihmu pe, seng bulih patumpuonmu; tahun parsaranan Sabat do in bani tanoh in.
6Ia gogoh ni tanoh in sadokah tahun parsaranan Sabat ai, gabe sipanganon ma ai bennima, bam ampa bani jabolonmu dalahi ampa bani jabolonmu naboru, sonai homa bani halak gajianmu ampa bani halak dagang na marianan i lambungmu;
7dihut do pinahanmu ampa binatang na adong i tanohmu gabe sipangan gogoh ni tanoh in.
8Anjaha maningon hiraonmu do bam pitu tahun Sabat, ai ma pitu hali pitu tahun; ase dokah ni na pitu tahun Sabat ai, ai ma ompat puluh siah tahun.
9Jadi pahataonmu ma tarompit partingting ai, bani ari sapuluh bulan pitu; bani ari pardearan do pahataonmu tarompit ai bani sab tanohmu.
10Maningon papansingonmu do tahun palimapuluhkon ai, anjaha tingtingkononkon haluahon i tanoh in, bani haganup na marianan ijin, maningon tahun parolob-oloban do in bennima. Mulak ma ijai hanima ganup hu parbagiananni anjaha ganup hanima hubani sindohorni.
11Tahun parolob-oloban do tahun palimapuluhkon ai bennima; bani panorang ai seng bulih hanima manabur sonai homa mamariamai sagak-sagakni, atap mambuat buah anggur humbani hayu anggur na so pinauli-uli ai.
12Ai tahun parolob-oloban do ai, maningon pansing do ai bennima. Ia sipanganonnima, ai ma gogoh ni ladang na sonin-sonin tubuh.
13Bani tahun parolob-oloban ai, maningon mulak do hanima ganup hu parbagiananni bei.
14Anggo ijual ho atap aha bani hasomanmu atap iboli ho atap aha humbani hasomanmu, ulang ma adong na marsisedaan bennima.
15Marguru hubani bilangan ni tahun dob salpu tahun parolob-oloban ai do ho mamboli sibolionmu humbani hasomanmu, anjaha marguru hubani bilangan ni pariama do jualonni ai bam.
16Anggo buei ope tahunni maningon pabanggalon do bolini, tapi anggo otik mando tahunni maningon paotikon do bolini, ai marguru hubani buei ni pariama do jualonni ai bam.
17Seng bulih marsisedaan hanima, tapi maningon marhabiaran do hanima bani Jahowa; ai Ahu do Jahowa Naibatanima.
18Halani ai horjahon hanima ma titah-Ku, anjaha ramotkon hanima ma paraturan-Ku anjaha dalankon domu hujai, gabe sonang ma hanima marianan i tanoh in.
19Bereon ni tanoh in ma buahni, gabe bosur hanima, anjaha marsonang-sonang hanima marianan ijai.
20Ra ninuhurnima, ʻAha ma panganonnami bani tahun papituhon ai? Ai seng bulih manabur hanami, anjaha seng bulih patumpuonnami gogohni.ʼ
21Pasogopon-Ku do pasu-pasung-Ku bennima bani tahun paonomkon ai, ase ibere ai gogohni sungkup tolu tahun.
22Anggo manabur hanima bani tahun paualuhkon panganonnima ope omei usang, das bani tahun pasiahkon, paima roh omei bayu, panganonnima do usangni ai.
23Seng bulih jualon tanoh ai sipatei-patei, ai Ahu do simada tanoh ai, ia hanima halak dagang anjaha panginsolat do hanima i lambung-Ku.
24Bani haganup tanoh parbagianannima ai, maningon palopasonnima do tobuson tanoh.
25Anggo gabe miskin hasomanmu sabangsa, gabe ijual sabagian humbani parbagiananni, jadi na dohor hu bani ma roh manobus na dob jinual ni saninani ai.
26Tapi anggo dong sada halak, na so adong sipanobus ai bani, hape lambin marpansarian do ia gabe jumpahsi partobusni ai,
27jadi parkirahononni ma tahun-tahun dob panjualan ai, anjaha teba-teba ni ai ipaulak ma hubani halak panjualanni ai, ase mulak use ai gabe parbagiananni.
28Tapi anggo seng sungkup jumpahsi na sabuei ni partobusni ai, jadi tading ibagas tangan ni sipamboli ai ma na jinualni ai das bani tahun parolob-oloban ai; bani tahun parolob-oloban ai maluah ma ai, mulak hubani simada ai hinan.
29Anggo ijual sada halak rumahni ibagas sada huta sipartembok, bulih do tobusonni ai ibagas na satahun ai dob ijual ai; ibagas na satahun ai do marhak ia manobus ai.
30Anggo seng itobus ai bani na satahun ai, patei ma rumah na ibagas huta sipartembok ai bani sipamboli ai torus ronsi bani ginomparni; age bani tahun parolob-oloban ai, seng mulak ai.
31Tapi anggo rumah-rumah na ibagas huta, na so martembok ope inggotni ai, hiraon do ai masuk bani ladang ni nagori ai, boi do tobuson ai, anjaha maningon mulak do ai bani tahun parolob-oloban.
32Tapi anggo pasal huta-huta ni halak Levi, ai ma rumah-rumah na ibagas huta parbagianan ni sidea ai, bulih do tobuson ni malim ai bani sagala panorang.
33Anggo adong sada halak Levi na so mandalankon panobusion ai, jadi rumah na ibagas huta parbagiananni, na dob jinualni ai, mulak do ai bani tahun parolob-oloban, ai rumah-rumah na ibagas huta ni halak Levi, parbagianan ni sidea do ai i tongah-tongah ni halak Israel.
34Tapi anggo sampalan, na masuk hubani huta ni sidea ai, seng bulih jualon ai, ai parbagianan ni sidea do ai lalab.
35Anggo lambin miskin hasomanmu sabangsa i lambungmu, anjaha seng tarsarihonsi be dirini i lambungmu, maningon tolonganmu do ia, ase age pe halak dagang ia atap panginsolat pe, boi manggoluh i lambungmu.
36Seng bulih buatonmu humbani bunga ni duit atap untung na banggal, tapi maningon marhabiaran do ho bani Naibatamu, ase boi manggoluh hasomanmu i lambungmu.
37Seng bulih papinjamkononmu duitmu marbunga hu bani, barang pahudungkononmu bani omeimu laho mambuat untung hunjai.
38Ai Ahu do Jahowa, Naibatanima, na dob mambobahon hanima luar hun tanoh Masir, laho mamberehon bennima tanoh Kanaan, ase Ahu gabe Naibatanima.
39Anggo lambin miskin hasomanmu sabangsa i lambungmu, pala ijualhon dirini bam, seng bulih songon jabolon ia pahorjahononmu;
40maningon songon halak sipangan gaji atap panginsolat do ia i lambungmu. Das bani tahun parolob-oloban ai do ia pambalosi bam,
41dob ai maningon maluah sonin do ia laho humbam, ia rap pakon dakdanakni, mulak hubani sindohorni, mulak hubani parbagianan ni ompungni.
42Ai sidea pe juakjuak do, na dob Huboan luar hun tanoh Masir; seng bulih jualon sidea songon jabolon.
43Seng bulih maborattu panrajaionmu bani, tapi maningon habiaranmu do Naibatamu.
44Anggo sihol do marjabolon dalahi atap marjabolon naboru, bulih do bolionmu sidea humbani parbegu na marianan inggot hanima.
45Bulih do homa bolionnima humbani halak panginsolat, na manginsolat i tongah-tongahnima, humbani ginompar ni sidea na marianan i tongah-tongahnima, na dob tubuh i tanohnima; sidea ai bulih do hanima simadasi.
46Bulih do sidea pateankononnima bani anaknima i pudinima, bulih do parjabolononnima sidea tongtong. Tapi samah-samah saninanima, halak Israel, seng bulih makorastu hanima marsirajaan.
47Anggo lambin bayak sada halak dagang atap panginsolat i lambungmu, hape anggo saninamu lambin miskinni do i lambungni, gabe ijualhon dirini bani halak dagang atap panginsolat na i lambungmai, barang hubani ginompar ni halak dagang ai,
48bulih do ia tobuson dob jinualhonni ai dirini. Sahalak humbani saninani bulih do manobussi,
49barang parbapaonkonni barang parsaninaonkonni bulih do tobusonni ia, atap sindohor na legan humbani pangkuni, bulih do tobusonni ia; atap anggo lambin bayak ia, bulih do tobusonni dirini.
50Tapi maningon bahenonni do parkiraan hubani na mambolisi ai, humbani tahun dob ijualhon dirini hu bani das hu tahun parolob-oloban ai, anjaha partobusni ai maningon domu do ai hubani bilangan ni tahun ai; maningon songon sipangan gaji do parkirahononkon dokahni ai i lambungni.
51Anggo buei ope tahunni, maningon domu hujai paulakonni partobusni humbani bolini ai hinan.
52Tapi anggo otik mando tahunni paima jumpah tahun parolob-oloban ai, maningon bahenonni do age parhiraanni ai pakonsi; domu hubani horjani ibagas tahun pangkorjaonkonni ai do paulakonni partobusni.
53Maningon songon halak gajian do ia i lambungni tahun hu tahun; seng bulih makorastu panrajaionni bani i lobeinima.
54Tapi anggo seng hona tobus ia marhitei dalan na sonai, maningon maluah do ia rap pakon anakni bani tahun parolob-oloban ai.
55Ai juakjuak do Bangku halak Israel; juakjuak do sidea, na dob Hubobahon luar hun tanoh Masir; Ahu do Jahowa Naibatanima.”