Dual PanelPasal Bagah-bagah ampa Parsapuluhan
1Dob ai roh ma hata ni Jahowa hubani si Musa,
2“Hatahon ma hubani halak Israel, anggo adong sada halak na mambagahkon jolma bani Jahowa, maronjolan hubani pangasammu,
3jadi asam ma sada dalahi na marumur dua puluh tahun das hu onom puluh tahun lima puluh sekel pirak, domu hubani sekel na bani ianan na mapansing in.
4Tapi anggo naboru do ai, tolu puluh sekel ma pangasammu bani.
5Anggo marumur halak ai lima tahun das hubani dua puluh tahun, asam ma sada dalahi dua puluh sekel anjaha naboru sapuluh sekel.
6Anggo marumur halak ai sabulan das hubani lima tahun, asam ma ia lima sekel pirak anggo dalahi, tapi anggo naboru do tolu sekel pirak ma.
7Anggo marumur halak ai onom puluh tahun barang i atas ni ai, asam ma ia sapuluh lima sekel pirak anggo dalahi, tapi anggo naboru do sapuluh sekel pirak ma.
8Tapi anggo miskintu do sada halak laho manggalar domu hubani pangasammu, jadi iboan ma halak na binagahkon ai hu lobei ni malim, ase malim ai ma mambahen asam bani; hubani na boi bahenon ni siparbagah-bagah ai do asamon ni malim ai ia.
9Anggo pinahan do ai, na targalangkon halak ai bani Jahowa, haganup na ginalangkon ni halak ai bani Jahowa pansing do.
10Seng bulih gantihonni atap pasamboronni ai, na madear gantih ni na bajan, barang na bajan gantih ni na madear, tapi anggo sihol do tukaronni pinahan hubani pinahan, jadi haduasi ma ai gabe papansingon bani Jahowa.
11Tapi anggo pinahan na butak do ai, na so bulih galangonkon bani Jahowa, maningon boanonni do ai hu lobei ni malim,
12anjaha malim ai ma mangasam ai, domu hubani dearni ampa na hurangni; pangasam ni malim ai do na saud.
13Tapi anggo sihol tobusonni ai, maningon tambahkononni do hujai saparlima ni pangasamon ai.
14Anggo ipapansing sada halak rumahni bani Jahowa, jadi asamon ni malim ma ai domu hubani dearni atap hurangni; sonin pangasam ni malim ai, sonai ma totap.
15Tapi anggo sihol tobuson ni halak na mapansing ai do rumahni ai, maningon tambahkononni do hujai saparlima ni pangasamon ai, dob ai ia ma use simada ai.
16Anggo ipapansing sada halak sabagian humbani tanoh parbagiananni bani Jahowa, jadi domu hubani bonihni do asamonmu ai; anggo sada homer bonihni, jadi lima puluh sekel pirak ma ai.
17Anggo humbani tahun parolob-oloban nari do ia papansingkon ladangni ai, jadi totap ma songon pangasammu.
18Tapi anggo dob tahun parolob-oloban do ia papansingkon ladangni ai, jadi itimbang malim ai ma argani domu hubani bilangan ni tahun na tading ai das hu tahun parolob-oloban ai, anjaha oruan ma domu hujai humbani pangasamon na dob binahenmai.
19Tapi anggo sihol tobuson ni halak na papansingkon ai ladang ai, maningon tambahkononni do hujai saparlima ni pangasammu hinan, ase bani use ai.
20Tapi anggo seng sihol be uhurni manobus ai, lambin ijual tene ladang ai bani halak na legan, seng bulih be tobusonni ai.
21Ia ladang ai, anggo maluah ma ai bani tahun parolob-oloban, pansing bani Jahowa ma ai, songon ladang na hona haram; gabe parbagianan ni malim ma ai.
22Anggo ipapansing sada halak bani Jahowa sada ladang na binolini, ase sedo parbagiananni ai,
23jadi paretongkonon ni malim ai hubani nasa buei ni pangasamon das hu tahun parolob-oloban ai, anjaha maningon bereon ni halak ai do bani ari ansa buei ni pangasamon ai songon sibere-bere na mapansing bani Jahowa.
24Bani tahun parolob-oloban maningon mulak do juma ai hubani halak pambolianni ai, bani halak siparhak ijai mangihutkon parbagianan hinan.
25Ganup pangasamon ai maningon domu do ai hubani sekel na bani ianan na mapansing ai, dua puluh gera sada sekel.
26Tapi bunga tubuh ni pinahan, na dob Jahowa simadasi halani parlobei tubuh, ise pe lang bulih marbagah-bagahkon ai, atap lombu atap biribiri pe ai, Jahowa do simada ai.
27Anggo pinahan na butak do ai, maningon tobusonni do ai marguru hubani pangasammu, anjaha tambahkononni do saparlimani; anggo seng itobus, jadi ijual ma ai domu hubani harga pangasamon ai.
28Tapi haganup na dob hona haram, na pinapansing ni halak bani Jahowa marhitei na mangkaramkon ai, humbani ugasni, atap jolma pe ai, atap pinahan atap juma humbani parbagiananni, seng bulih jualon atap tobuson be ai; ai sagala na dob hinaramkon pansing tumang do ai bani Jahowa.
29Anggo adong sada jolma, na dob pinapansing marhitei na mangkaramkon ai, seng bulih tobuson ia, maningon pamateon do ia.
30Haganup parsapuluhan ni tanoh in, humbani gogoh ni tanoh atap humbani buah ni hayu pe, Jahowa do simada ai, na dob pinapansing do ai bani Jahowa.
31Tapi barang ise na sihol manobus parsapuluhanni, maningon tambahkononni do hujai saparlima ni hargani.
32Sagala parsapuluhan ni lombu atap biribiri, sagala parsapuluhan ni pinahan, na montas hun toruh ni simambu ni parmahan, na pinapansing do ai bani Jahowa.
33Seng pala pareksaon ai atap na jenges do atap na bajan, anjaha homa seng bulih tukaron ai. Anggo adong halak na manukar ai, gabe haduasi ma pinahan ai papansingon, seng bulih tobuson ai.”
34Ai ma titah, na binere ni Jahowa hubani si Musa i atas ni Dolog Sinai.