Dual PanelParmompo ni si Isak
1Ia si Abraham domma ubanon, domma sayur matua, anjaha ipasu-pasu Jahowa do ia bani haganup.
2Dob ai ihatahon si Abraham ma bani jabolonni, situanan i rumahni, na manramotkon ganup na dong bani, “Mahua nahkon ma tanganmu i toruh ni binongeihu,
3ase hupabija ho hubani Jahowa, Naibata ni nagori atas pakon tanoh on, paboa na so bulih buatonmu humbani boru ni halak Kanaan, panginsolatankin, bahen parinangon ni anakkin,
4tapi maningon laho do ho hu tanoh hagodanganku pakon hubani hade-hadengku, laho manririd bahen parinangon ni anakkin, si Isak.”
5Jadi nini jabolonni ai ma dompaksi, “Naha, porini lang marosuh puang-puang ai mangirikkon ahu hu nagori on, boi do boanonku anakmu in mulak hu tanoh habingkatanmu ai?”
6Nini si Abraham ma dompaksi, “Jaga ma, ase ulang iarahkon ho mulak anakkin hujai!
7Jahowa, Naibata ni nagori atas, na mambobahon ahu kaluar hun rumah ni bapa pakon hun tanoh ni hade-hadengku, na mangkatahon ampa na mambijahon bangku sonon, ʻHubani ginomparmu do berehononku tanoh on. Ia ma na marsuruh malekatni mardalan i lobeimu, laho mambuat boru bani anakku hunjai.ʼ
8Tapi anggo lang ra puang-puang ai mangirikkon ho, maluah ma ho humbani bija na hu bangku in, asal ulang iarahkon ho anakkin mulak hujai.”
9Jadi inahkon jabolonni ai ma tanganni hu toruh ni binongei ni si Abraham, tuanni ai, anjaha ibijahon ma pasal ai hu bani.
10Ibuat jabolon ai ma sapuluh unta humbani unta ni tuanni ai, ampa bagei ni ugas-ugas na maharga ni tuanni, dob ai bingkat ma ia, laho hu Mesopotamia, hu huta ni si Nahor.
11Dob ai ipasaran ma unta ai i darat ni huta ai, i lambung ni sada parigi marayak bod ari, bani panorang parroh ni halak parbah.
12Jadi nini ma, “Ham Jahowa, Naibata ni si Abraham tuankai, patongon Ham ma langkahku sadari on, sai patuduhkon ma idop ni uhur-Mu bani si Abraham, tuankai.
13Tonggor ma, jongjong do ahu i lambung ni parigi on, anjaha laho kaluar ma boru ni sinkuta on sihol manahui bah.
14On pe, anggo huhatahon bani sada halak sidea, ʻMahua pateleng ham hudonmu in ase minum ahu,ʼ gabe ibalosi, ʻinum ham ma, hupabosur pe ampa untamu, ai ma namin na tinontuhonmu bani jabolonmu si Isak, ase hubotoh marhitei ai, na dob ibahen ham idop ni uhurmu bani tuankai.ʼ”
15Jadi lape ope torus hatani ai ihatahon, tonggor ma, domma kaluar si Rebekka, boru ni si Betuel, anak ni si Milka, parinangon ni si Nahor, abang ni si Abraham, mangabarai hudonni.
16Jenges tumang do rupani, sada anak boru, na so ongga ope manandai dalahi; tuad ma ia hu parigi ai, igoki ma hudonni, dob ai tangkog ma ia.
17Jadi marlintun ma jabolon ai marayaksi, nini ma, “Mahua bere ham ma bah in otik inumonku humbani hudonmu in.”
18Nini ma mambalosi, “Minum ma ham tuan!” Jadi tarolos ma ia patoruhkon hudonni ai hu tanganni, lanjar ibere ma ia minum.
19Dob salpu ia ibere minum, nini ma, “Hutahui pe bah age bani untamu ronsi sombuh horahni ganup.”
20Dob ai tarolos ma ia manguseihon hudonni ai hu palangka, iulaki ma marlintun hu parigi ai laho manahui bah, jadi itahui ma bah bani ganup untani ai.
21Longang ma dalahi ai mangidahsi, sai sip do ia mardiateihon atap na itumpak Jahowa do langkahni, atap lang.
22Jadi dob bosur minum unta ai, ibuat dalahi ai ma sada anting-anting omas, satongah sekel boratni, pakon saparangguan golang, sapuluh sekel omas boratni.
23Dob ai nini ma, “Atene, boru ni ise do ham? Mahua patugah ham ma bangku! Adong do gatni ianan parbornginan i rumah ni bapanta bennami?”
24Nini ma mambalosi, “Boru ni si Betuel do ahu, anak ni si Milka, na tinubuhkonni bani si Nahor.”
25Ambah ni ai ihatahon naboru ai ma, “Anggala ni omei ampa gagaton pe, buei do bennami, parbornginan pe adong do.”
26Jadi ipaunduk dalahi ai ma dirini marsombah hubani Jahowa,
27nini ma, “Pinuji ma Jahowa, Naibata ni si Abraham; lang alang idop ni uhur pakon habujuronni hubani tuanku.”
28Dob ai marlintun ma naboru ai laho patugahkon hata ai hu rumah ni inangni.
29Adong do sada botou ni si Rebekka, si Laban goranni. Jadi marlintun ma si Laban hu darat manjumpahkon dalahi ai hu parigi nongkan ai.
30Jadi dob iidah anting-anting ai pakon golang na i tangan ni botouni ai, anjaha dob ibogei hata ni si Rebekka, botouni ai, na mangkatahon, “Sonon-sonon do hata ni halak ai bangku,” mintor laho ma ia marayak dalahi ai, anjaha tonggor ma, jongjong ope ia i lambung ni untani, dohorhon parigi ai.
31Dob ai ihatahon ma, “Eta hita laho, ham na pinasu-pasu ni Jahowa! Mase ma sai jongjong ham i darat on? Domma pala huatur rumah, sonai homa ianan ni unta in.”
32Jadi iarahkon ma dalahi ai hu rumah, itanggali ma palana ni unta ai, ibere ma anggala ampa gagaton bani unta ai, sonai bah pamurihi ni naheini pakon nahei ni hasomanni ai;
33dob ai inahkon ma sipanganon hu lobeini. Tapi nini ma, “Seng mangan ope ahu, anggo lape husahapkon hatangkon. Anggo sonai, hatahon ma!” nini.
34Jadi nini ma, “Jabolon ni si Abraham do ahu.
35Tongon ipasu-pasu Jahowa do tuankai, jadi gabe bayak do ia; ibere Naibata do bani biribiri pakon lombu, pirak pakon omas, jabolon dalahi ampa jabolon naboru, unta pakon halode.
36Ambah ni ai, itubuhkon si Sarah parinangon ni tuankai do sada anak bani tuanku, bani panorang hatuaonni; bani do iberehon ganup na dong ni tuankai.
37Dob ai ipabija tuankai ma ahu, nini, ʻLang bulih buatonmu humbani boru ni halak Kanaan, panginsolatankin, bahen parinangon ni anakkin,
38tapi laho ma ho hu rumah ni bapa, parayak ma hasomanku samarga, mambuat parinangon ni anakkin.ʼ
39Ningku ma bani tuanku, ʻSonaha ma, anggo lang ra puang-puang ai mangirikkon ahu?ʼ
40Nini ma dompak ahu, ʻJahowa na hubalosi, Ia do marsuruh malekatni mangkasomani ho ampa manumpak langkahmu, laho mambuat boru bani anakkin humbani hasomanku samarga hun rumah ni bapa.
41Maluah ma ho humbani bijamu hu bangku anggo domma das ho hubani hasomanku samarga; anggo lang ibere sidea puang-puang ai bam, maluah ma ho humbani bijamu hu bangku.ʼ
42Jadi dob das ahu sadari on hu parigi ai, ningku ma: Ham Jahowa, Naibata ni si Abraham, tuankai, sai tumpak Ham ma langkah na hulangkahkon on.
43Tonggor ma, jongjong do ahu i lambung ni parigi on: Anggo adong sada anak boru, na kaluar laho manahui bah, jadi huhatahon bani, ʻBere ham bangku otik bah humbani hudonmu in,ʼ
44jadi ihatahon bangku, ʻinum ma, pakon bani untamu hutahui pe bah, ai ma puang-puang, na dob tinontuhon ni Jahowa bani anak ni tuankai.ʼ
45Lang ope salpu huhatahon hata ai ibagas uhurhu, tonggor ma, kaluar ma si Rebekka mangabarai sada hudon, turun ma ia hu parigi ai manahui bah. Jadi huhatahon ma bani, ʻMahua bere ham ma ahu minum.ʼ
46Jadi tarolos ma ia patoruhkon hudonni humbani abarani, nini ma, ʻMinum ma ham, hupasobur pe pakon untamu on.ʼ Ase minum ma ahu, anjaha ipasobur ma homa unta ai.
47Dob ai husungkun ma ia, ningku ma, ʻBoru ni ise do ham?ʼ Balosni, ʻBoru ni si Betuel do, anak ni si Nahor, tinubuhkon ni si Milka bani.ʼ Dob ai hubahen ma sada tintin hu igungni pakon golang hu tanganni.
48Dob ai mangunduk ma ahu marsombah hubani Jahowa, hupuji ma Jahowa, Naibata ni si Abraham, tuankai, na patongonkon langkahku laho mambuat boru ni abang ni tuanku, bani anakni ai.
49Sonari pe, anggo ra do nasiam patuduhkon idop pakon bujur ni uhur bani tuankai, patugah nasiam ma bangku; anggo lang, patugah nasiam homa bangku, ase hubotoh mandompakkon hu siamun atap hu sambilou.”
50Jadi nini si Laban pakon si Betuel ma mambalosi, “Na roh humbani Jahowa do hata in; seng tarhatahon hanami bam, na bajan atap na madear.
51Tonggor ma, i lobeimu do si Rebekka, buat ma ia anjaha langkahkon ma, ase gabe parinangon ni anak ni tuanmai ia, songon na hinatahon ni Jahowa.”
52Jadi dob ibogei jabolon ni si Abraham hata ni sidea ai, marsombah ma ia bani Jahowa.
53Dob ai ipadarat jabolon ai ma ugas pirak, ugas omas ampa hiou, lanjar ibere ma ai bani si Rebekka; sonai homa bani botouni ampa inangni ibere do ugas maharga.
54Dob ai mangan ampa minum ma sidea, ia pakon hasomanni saodoran, lanjar marborngin ma sidea ijai. Patarni puho ma sidea, jadi nini ma, “Palopas nasiam ma hanami mulak bani tuanku.”
55Tapi nini botou pakon inangni ai ma, “Paturut ma siboru ai tading ijon hira-hira sapuluh borngin nari, ai pe ase laho ho.”
56Dob ai nini ma hubani sidea, “Ulang jolomi nasiam ahu, halani Jahowa do na manumpak langkahku. Palopas nasiam ma ahu laho mulak hubani tuanku.”
57Jadi nini sidea ma, “Anggo sonai, idilo hanami ma siboru ai, ase nasungkun hatani.”
58Idilo sidea ma si Rebekka, ihatahon ma hu bani, “Atene, ra do ho bingkat ampa dalahi on?” Ibalosi ma, “Eak, ra do ahu.”
59Jadi ipaingkat sidea ma si Rebekka, botou ni sidea ai, pakon parorotni rap pakon jabolon ni si Abraham ai ampa hasomanni saodoran.
60Ipasu-pasu sidea ma si Rebekka, anjaha ihatahon ma hu bani, “Gabe ma ham botou, marribu-ribu laksa, anjaha ginomparmu ma simada horbangan ni munsuhni.”
61Dob ai marugas ma si Rebekka pakon parorotni, manaik ma sidea hu atas unta, anjaha iirikkon ma dalahi ai.
62Tapi na roh do si Isak hun parigi Lachai-Roi, ai i Tanoh Dangsina do ia marianan.
63Marayak bod ari laho do si Isak hu juma martonggo; jadi mangkawah ma ia, gabe iidah ma roh unta.
64Mangkawah ma homa si Rebekka, jadi iidah ma si Isak, gabe turun ma ia hun unta ai.
65Nini ma hubani jabolon ai, “Ise do dalahi ai, na mardalan i juma ai, na roh manjumpahkon hita?” Nini jabolon ai ma, “Ai ma da tuanku.” Jadi ibuat ma tudung-tudung na manrungkub bohini ai.
66Dob ai ipajojor jabolon ai ma hubani si Isak ganup na hinorjahonni ai.
67Jadi iarahkon si Isak ma si Rebekka hu lampolampo ni si Sarah, inangni ai; ibuat ma si Rebekka bahen parinangonni, anjaha holong do uhurni mangidahsi. Jadi tarapoh ma uhur ni si Isak bani panading ni inangni ai.