Dual PanelSi Isak i Gerar. Bagah-bagah ni Naibata hu Bani
1Dob ai masa ma use lohei i tanoh ai, sobali lohei na parlobei ai, na masa sanggah bani goluh ni si Abraham; jadi bungkas ma si Isak hu Gerar, marayak si Abimelek, raja ni halak Palistim.
2Dob ai ipataridahkon Jahowa ma diri-Ni hu bani, nini ma, “Ulang ma ho tuad hu tanoh Masir, tapi iani ma tanoh sipatugahonku ope hubam.
3Manginsolat ma ho i tanoh on, ase Huhasomani ho, anjaha Hupasu-pasu ho; ai hubam pakon hubani ginomparmu do berehonon-Ku ganup tanoh on, anjaha patotapon-Ku do bija, na Hubijahon hubani si Abraham, bapamu ai.
4Anjaha pabueion-Ku do ginomparmu, songon bintang na i langit, anjaha hubani ginomparmu do berehonon-Ku ganup tanoh on. Ai dapotan pasu-pasu do magira ganup bangsa ni tanoh on marhitei ginomparmu,
5halani itangihon si Abraham do sorang-Ku anjaha ihorjahon uhum-Hu, tonah-Ku, podah-Ku pakon titah-Ku.”
6Ase marianan i Gerar ma si Isak.
Maluah si Rebekka humbani si Abimelek
7Tapi anggo sungkun-sungkun halak parnagori ai pasal parinangonni ai, gabe ihatahon ma, “Botouhu do ia.” Ai mabiar do ia mangkatahon, “Parinangonku do ia,” ase ulang ibunuh parnagori ai ia ninuhurni, halani si Rebekka ai, ai jenges do rupani.
8Hape dob hun dokah ia ijai, itungkir si Abimelek, raja ni halak Palistim ai ma hun jandela, gabe iidah ma marguro-guro si Isak pakon si Rebekka parinangonni ai.
9Jadi idilo si Abimelek ma si Isak, nini ma, “Tonggor ma, parinangonmu do ia hape. Mase ihatahon ho, ʻBotouhu do ia?ʼ” Jadi ibalosi si Isak ma, “Ase ulang matei ahu holi marhiteihonsi, nini uhurhu.”
10Nini si Abimelek ma, “Mase ma sonin ibahen ho bennami? Otik nari mando, ase sihol hasomanan ni sahalak humbani bangsa on parinangonmin, gabe iparoh ho dousa bennami.”
11Dob ai iparentahkon si Abimelek ma hubani haganup bangsa ai, nini ma, “Barang ise na manggeori dalahi on atap parinangonni maningon marutang hosah do ia.”
Habayakon ni si Isak ampa Parlawananni
12Dob ai mardang ma si Isak i nagori ai, jadi jumpahsi ma bani satahun ai saratus hali lompit, ai ipasu-pasu Jahowa do ia.
13Jadi halak na bayak ma ia; lambin dokahni lambin bayak, bayak tumang ma ia.
14Bahat do biribirini pakon lombuni, buei do pakon jabolonni. Jadi subil ma halak Palistim mangidahsi.
15Haganup parigi, na hinurak ni jabolon ni bapani bani goluh ni si Abraham, itambusi halak Palistim ma anjaha igoki bani tanoh.
16Jadi ihatahon si Abimelek ma hubani si Isak, “Laho ma ho hun tongah-tongahnami on, ai daoh do markuasaan ho hun bennami.”
17Jadi bungkas ma si Isak hunjai, ipajongjong ma barung-barungni i Habungan Gerar, lanjar ijai ma ia marianan.
18Dob ai iulaki si Isak ma mangkurak parigi, na hinurak sanggah bani goluh ni si Abraham, bapani ondi, na dob tinambusan ni halak Palistim, dob matei si Abraham, anjaha ibahen ma goranni mangihutkon goran na binahen ni bapani ondi hinan.
19Jadi sanggah na mangkurak ai jabolon ni si Isak i habungan ai, gabe jumpah sidea ma ijai sada parigi na manggoluh.
20Tapi itinggili parmahan na hun Gerar ma parmahan ni si Isak, nini sidea ma, “Hanami do simada bah on.” Jadi ibahen si Isak ma goran ni parigi ai Esek (partinggilan), halani itinggili sidea ia ijai.
21Dob ai ihurak sidea ma use sada sumur na legan, ai pe iparsurai sidea do; jadi ibahen si Isak ma goran ni parigi ai Sitna (parsuraian).
22Jadi bungkas ma ia hunjai, ihurak ma use sada parigi na legan, tapi lang be maringor sidea halani ai; halani ai ibahen ma goran ni ai Rehobot (ianan na lumbang), ai nini: Ai ipalumbang Jahowa do banta, anjaha gargar hita itumpak i tanoh on.
23Dob ai tangkog ma ia hunjai hu Berseba.
24Borngin ni ai roh ma Jahowa marayaksi, nini ma, “Ahu do Naibata ni bapamu si Abraham. Ulang ho mabiar, ai Ahu do hasomanmu; pasu-pasuon-Ku do ho anjaha pabueion-Ku do ginomparmu halani si Abraham jabolon-Kin.”
25Jadi ipauli si Isak ma ijai sada anjapanjap, anjaha ipadilo-dilo goran ni Jahowa. Ipajongjong ma ijai barung-barungni, lanjar ihurak jabolonni ma ijai parigi.
Marpadan si Abimelek pakon si Isak
26Dob ai iparayak si Abimelek ma ia hun Gerar, rap pakon si Ahusat hasomanni ai, ampa si Pihol puanglima ni balani.
27Nini si Isak ma hubani sidea, “Mase ma roh nasiam marayak ahu? Ai lang sogam do uhur nasiam bangku, anjaha domma ipalaho nasiam ahu hun tanoh nasiam?”
28Nini sidea ma mambalosi, “Tangkas do iidah hanami, na ihasomani Jahowa do ho. Halani ai ninuhurnami do, ʻMahua nabahen ma parbulawanan i tongah-tongahta, hanami pakon ho, anjaha mambahen padan ma hanami pakon ho,
29paboa na so bahenonmu na masambor bennami, songon hanami na so mangkahua ho, na pitah mambahen na madear hansa, anjaha na palopaskon ho hinan misir ibagas damei. Sonari na pinasu-pasu ni Jahowa do ho.ʼ”
30Dob ai ipasirsir si Isak ma sipanganon bani sidea, jadi mangan anjaha minum ma sidea.
31Patarni ai girah ma sidea puho, anjaha marbulawan ma sidea. Dob ai ipaingkat si Isak ma sidea ibagas damei.
32Bani ari ai roh ma jabolon ni si Isak patugahkon hubani pasal parigi na dob hinurak ni sidea, anjaha nini ma hu bani: Domma jumpahan bah hanami.
33Jadi ibahen ma goran ni parigi ai Seba. Halani ai Berseba do goran ni huta ai ronsi sadari on.
Mambuat boru si Esau
34Dob marumur si Esau ompat puluh tahun, ibuat ma si Judit, boru ni si Beri, marga Het, pakon si Basmat, boru ni si Elon, marga Het, bahen parinangonni.
35Tapi pusok tumang do uhur ni si Isak pakon si Rebekka ibahen sidea.