Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 10 >> 

Uhum na Paualuhkon: Balang

1Dob ai nini Jahowa ma dompak si Musa, “Laho ma ho marayak Parao, ai domma Hupahengkeng uhurni pakon uhur ni juakjuakni ase boi Hubahen sagala tandangkon i tongah-tongah ni sidea,

2anjaha ase boi pajojoronmu hubani anak pakon pahompumu magira na Hubahen in hubani halak Masir pakon tandang-Ku na Hupajongjong in i tongah-tongah ni sidea, ase ibotoh hanima, Ahu do Jahowa.”

3Jadi laho ma si Musa pakon si Aron marayak Parao, nini sidea ma dompaksi, “Sonon do hata ni Jahowa, Naibata ni halak Heber, ʻSadiha dokah on engkaronmu patoruhkon dirimu i lobei-Hu? Palopas ma laho bangsang-Ku ase isombah sidea Ahu.

4Tapi anggo mangengkar ho manlopas bangsang-Ku laho, tonggor ma, parohon-Ku ma patar balang hu gomgomanmu,

5rungkubonni ma sisik ni tanoh in, gabe seng boi idahon tanoh in; panganonni ma teba-teba ni udan sira-sira in bannima, anjaha gagatonni ma sagala hayunima na dong tubuh i juma,

6gokanni ma rumahmu, rumah ni juakjuakmu pakon rumah ni ganup halak Masir, songon na so ongga ididah bapa pakon ompungnima olat ni na dob adong sidea i tanoh on ronsi nuan.ʼ” Dob ai marhusor ma si Musa lanjar luar hun lobei ni Parao.

7Nini juakjuak ni Parao ma dompaksi, “Sadiha dokah nari gabe siding halak on banta? Lopas ham ma laho halak in, ase isombah sidea Jahowa, Naibata ni sidea in; seng ope iahap ham na dob seda tanoh Masir?”

8Iboan sidea ma si Musa pakon si Aron hu lobei ni Parao. Nini ma dompak sidea, “Laho ma hanima, sombah hanima ma Jahowa, Naibatanima; tapi ise do nani deba na laho in?”

9Nini si Musa ma, “Haganup do hanami sihol laho, na maposo pakon na matua, odor rap pakon anak ampa borunami, biribiri pakon lombunami, halani pesta ni Jahowa do sipestahononnami ai.”

10Nini ma dompak sidea, “Jahowa ma tongon mangkasomani hanima, anggo hulopas hanima rap pakon dakdanaknima laho. Tonggor ma, atap na jahat do sura-suranima?

11Lang sonai, hanima bagian dalahi ma laho marsombah hubani Jahowa, halani sonai do pangindoannima hinan.” Jadi ipalaho ma sidea hun lobei ni Parao.

12Dob ai nini Jahowa ma dompak si Musa, “Pagostong ma tanganmu hu babou ni tanoh Masir parohkon balang, ase naik sidea hu tanoh Masir, anjaha igagati sagala suan-suanan ni tanoh in, sagala teba-teba ni udan sira-sira ondi.”

13Jadi ipagostong si Musa ma tungkotni hu babou ni tanoh Masir, gabe iparoh Jahowa ma logou hun hapoltakan hu tanoh ai layur sadari saborngin; patar ni ai iboban logou na hun hapoltakan ai ma balang ai.

14Jadi naik ma balang ai hu sab tanoh Masir anjaha sogop hu ganup gomgoman ni Masir, buei tumang, seng ongga ope masa balang na sonai i lobei ni ai, anjaha i pudi ni ai pe seng masa be sonai ai.

15Ai irongkob sidea do sisik ni ganup tanoh ai, pala golap tanoh ai ibahen, anjaha ipangan ma ganup suan-suanan ni tanoh ampa ganup buah ni hayu, sagala teba-teba ni udan sira-sira ondi; seng dong be na ratah tading bani hayu atap bani suan-suanan i sab tanoh Masir.

16Jadi tarolos ma Parao mandilo si Musa pakon si Aron, nini ma, “Domma mardousa ahu dompak Jahowa, Naibatanima pakon dompak hanima.

17Ai pe, sasap ma dousangkin age sahali on, anjaha martonggo ma hanima hubani Jahowa, Naibatanima, ase ipadaoh humbangku pitah hamatean on gelah.”

18Jadi luar ma si Musa hun lobei ni Parao, martonggo ma ia hubani Jahowa.

19Jadi iparoh Jahowa ma logou hun hasundutan doras tumang gabe iluahon ma balang ai anjaha isampakkon hu Laut Sigerger; sada balang pe lang tading bani sab gomgoman ni Masir.

20Tapi ipahengkeng Jahowa do uhur ni Parao gabe seng ipalopas laho halak Israel ai.

Uhum na Pasiahkon: Golap Marimpot-impot

21Dob ai nini Jahowa ma dompak si Musa, “Pagostong ma tanganmu dompak langit, ase masa na golap marimpot-impot bani tanoh Masir, ase dadap-dadap halak ibahen na golap ai.”

22Jadi ipagostong si Musa ma tanganni dompak langit, gabe sogop ma na golap marimpot-impot hu sab tanoh Masir tolu ari dokahni.

23Seng ididah atap ise hasomanni anjaha seng dong atap ise na mosor humbani iananni na tolu ari ai; tapi bani ganup halak Israel lihar do bani ianan ni sidea.

24Jadi idilo Parao ma si Musa, nini ma, “Laho ma hanima, sombah hanima ma Jahowa; pitah biribiri pakon lombunima ma na tading, tapi anggo anaknima boi do homa laho rap pakon hanima.”

25Tapi nini si Musa ma, “Ham pe maningon bereonmu do homa hu tangannami galangan sisayaton pakon galangan situtungon, sigalangkononnami hubani Jahowa, Naibatanami.

26Pinahannami pe maningon laho do rap pakon hanami; sada tambirik pe lang tading, ai hunjai do buatonnami sisombahkononnami hubani Jahowa, Naibatanami, anjaha seng ibotoh hanami barang aha sombahkononnami hubani Jahowa paima das hanami hujai.”

27Tapi ipahengkeng Jahowa do uhur ni Parao, gabe seng ilopas sidea laho.

28Dob ai nini Parao ma dompaksi, “Laho ma ho hun lambungkon, jaga ho, seng boi idahonmu be bohingku; ai sadari ididah ho bohingku maningon matei ma ho.”

29Nini si Musa ma, “Songon na hinatahonmu ai ma, seng idahonku be bohimu.”


  Share Facebook  |  Share Twitter

 <<  Keluaran 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel