Dual PanelDoding Puji-pujian ni Israel
1Jadi ijia idodingkon si Musa pakon halak Israel ma doding on bani Jahowa, nini sidea ma, “Mandoding ma ahu bani Jahowa, ai marmulia tumang do Ia; huda pakon na mangajaksi isampakkon do hubagas laut.
2Jahowa do hagogohonku pakon dodingku, anjaha Ia do hatuahon bangku; Ia do Naibatangku, pasangaponku ma Ia, Naibata ni bapangkin, patimbulonku ma Ia.
3Puanglima do Jahowa, Jahowa do goran-Ni.
4Isampakkon do gareta porang ni Parao pakon balani hubagas laut; anjaha mogap do puanglima pilihanni ibagas Laut Sigerger.
5Isangkobi bah do sidea; mogap do sidea songon batu hu toruh.
6Marmulia marhitei hagogohon do tangan siamun-Mu, Ham Jahowa; tangan siamun-Mu in do, Ham Jahowa, manropuki munsuh in.
7Marhitei hatimbulon ni hasangapon-Mu iraseihon Ham do na manlawan Ham; ipadalan Ham do ringis-Mu mamboiskon sidea songon anggala.
8Marhitei hosah ni igung-Mu bongbong bah in, jongjong gilumbang songon dingding, himpang sagala bah luhung i tongah-tongah ni laut.
9Nini munsuh ai, ʻHuayak, hutangkap ma; bagionku ma taban, sombuh uhurhu mangidah sidea; sintakonku ma podangku, boiskonon ni tanganku ma sidea.ʼ
10Iombuskon Ham hosah-Mu, gabe ilangkobi laut sidea; mogap sidea songon simbora hubagas bah na majangin.
11Ise ma songon Ham, ale Jahowa, i tongah-tongah ni sagala naibata? Ise ma na songon Ham, marmulia ibagas hapansingon, jombut ibagas pambahenan sipujion, na mambahen halongangan?
12Dob ipagostong Ham tangan-Mu siamun, ibondut tanoh in ma sidea.
13Ibobahon Ham do marhitei habujuron-Mu bangsa na tinobus-Mu, itogu-togu Ham do sidea marhitei hagogohon-Mu hubagas ianan hapansingon-Mu.
14Ibogei sagala bangsa ma in, gabe gobir sidea; godor ma pangisi ni tanoh Palistim.
15Tarsonggot ma ijia sagala raja ni Edom, hitir-hitir parkuasa ni Moab; mabiar ganup pangisi ni Kanaan.
16Madabuh ma hubani sidea songgot-songgot pakon biar; halani hinatimbul ni tangan-Mu, jonong sidea songon batu, paima mandipar bangsa-Mu ale Jahowa, paima mandipar bangsa na tinobus-Mu.
17Ipamasuk Ham do sidea anjaha isuan Ham do sidea hu dolog Parbagianan-Mu; ianan na pinauli-Mu Jahowa, bahen hundulan-Mu, ianan hapansingon na ipasuk tangan-Mu, ale Tuhan.
18Jahowa do na manrajai ronsi sadokah ni dokahni.”
19Ai sanggah na bongkot huda ni Parao rap pakon gareta porangni ampa na mangajaksi hubagas laut ai, ipasuang Jahowa ma bah ni laut ai, manlangkobi sidea; tapi mardalan bani na horah do halak Israel i tongah-tongah ni laut ai.
20Dob ai roh ma si Miryam sada nabi puang-puang, botou ni si Aron, ibuat ma sada husapi bani tanganni; anjaha luar ma ganup puang-puang mangirikonsi marsijolom husapini anjaha manortor.
21Jadi mandoding ma si Miryam marsibalos-balosan pakon sidea, “Mandoding ma nasiam bani Jahowa, ai marmulia tumang do Ia; isampakkon do huda pakon na mangajaksi hubagas laut.”
Mara pakon Elim
22Dob ai ihatahon si Musa ma halak Israel bingkat hun Laut Sigerger, jadi laho ma sidea hu halimisan Sur; tolu ari ma sidea mardalan i halimisan, anjaha seng jumpahan bah sidea.
23Dob ai das ma sidea hu Mara, tapi seng tarinum sidea bah hun Mara, mapaet do ai; halani ai do ase igoran ia Mara.
24Jadi marungut-ungut ma bangsa ai dompak si Musa, nini ma, “Aha ma siinumonnami?”
25Dob ai doruh-doruh ma ia hubani Jahowa, gabe ipatuduh ma bani sada hayu; igijigkon ma ai hubagas bah ai, gabe matobu ma bah ai. Ijai ma ibere bani sidea sada titah pakon aturan, anjaha ijai ma sidea ilajou,
26nini ma, “Anggo bujur itangihon ho hata ni Jahowa Naibatamu, anjaha ihorjahon ho na pintor bani uhur-Ni, iparimbagaskon ho titah-Ni, anjaha ilahoi ho sagala aturan-Ni, seng pamasaon-Ku bam age sada naborit, na Hupamasa ai bani Masir, ai Ahu do Jahowa panambarimu.”
27Dob ai das ma sidea hu Elim; adong do ijai bah tubuh sapuluh dua ampa pitu puluh kambona kurma; jadi marsaran ma sidea ijai i lambung ni bah ai.