Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 23 >> 

Titah Pasal Parsaoran hubani Hasoman Jolma

1“Seng bulih pararatonmu barita ladung; anjaha seng bulih urupanmu parsalah gabe saksi hagedukon.

2Seng bulih irikkononmu tahi ni halak simbuei laho manjahati, anjaha seng bulih manaksii ho bani sada paringoran, taruyun bani halak simbuei, laho papeolhon uhum.

3Na miskin pe seng bulih apitanmu bani paringoranni.

4Anggo jumpah ho lombu ni munsuhmu atap halodeni kahou, maningon mulak toguonmu ai hu bani.

5Anggo ididah ho halode ni halak na mangkagigihon ho tibal halani sibobanonni, seng bulih paturutonmu tibal, maningon pajongjongonmu do in rap pakon sibobanonni.

6Seng bulih papeolonmu uhum bani halak na miskin na i tongah-tongahmu ibagas parkarani.

7Paholang dirimu hun hata ladung, anjaha ulang bunuh halak na bujur pakon parpintor, ai seng ra Ahu mamintori halak parjahat.

8Seng bulih jaloonmu sisip, ai papitung na marpangidah do sisip, anjaha papeol parkara ni halak parpintor.

9Seng bulih hilangonmu halak dagang, ai ibotoh hanima do uhur ni halak dagang, ai halak dagang do hanima hinan i tanoh Masir.

Paraturan Pasal Sabat pakon Pesta-pesta

10Onom tahun dodot tidahanmu tanohmu, anjaha patumpuonmu gogohni,

11tapi papitu-tahunkon maningon pahalongonmu anjaha patalunonmu, ase boi panganon ni na miskin ni bangsamu hunjai, anjaha na tinebahon ni sidea boi panganon ni binatang na i ladang. Sonai ma homa bahen hu pohon anggurmu pakon hubani hayu jetunmu.

12Ibagas na onom ari ma horjahon horjamu, tapi bani ari papituhon maningon marsaran ho, ase boi manggompang lombumu pakon halodemu, anjaha pahosahkon anak ni jabolonmu pakon halak dagang.

13Parimbagaskon hanima ma haganup na hupatugah bannima. Seng bulih ingat-ingatonnima goran ni naibata na legan, anjaha seng bulih bogeion na sonai ai hun pamangannima.

14Tolu hali ibagas satahun maningon marpesta ho Bangku.

15Maningon dalankononmu do pesta ruti na so niigaran; pitu ari dokahni panganonmu ruti na so niigaran, songon na dob hutonahkon bam, bani panorang na dob tinontuhon bani bulan Abib, ai bani bulan ai do ho luar hun tanoh Masir. Ise pe lang bulih mangidah bohing-Ku anggo lumei do tanganni.

16Sonai homa pesta pariama, limbuah ni na hinorjahonmu, na tinidahkonmu hu juma, ampa pesta patumpuhon gogoh ni juma bani ujung ni tahun, dob ipatumpu ho na hinorjahonmu hun juma.

17Tolu hali ibagas satahun maningon taridah sagala dalahi i lobei ni Jahowa.

18Seng bulih galangkononmu daroh ni galangan-Ku rap pakon ruti na so niigaran, anjaha seng bulih tebaan taboh-taboh ni pestang-Ku ronsi patarni.

19Maningon boanonmu do limbuah ni tanohmu hu rumah ni Jahowa Naibatamu. Seng bulih lompahonmu anak ni hambing ibagas dadih ni indungni.

Bagah-bagah Pasal Pangondingi ni Naibata i Tongah Dalan Laho hu Tanoh Kanaan

20“Tonggor ma, sai suruhon-Ku do malekat sada i lobeimu, ase iparorot ho i tongah dalan, anjaha ibobahon ho das hu ianan na dob Hupasirsir bam.

21Sai jaga ma dirimu i lobeini, anjaha tangihon sorani, ulang lawan ia, ai seng marpangulaki uhurni bani panlanggaronnima, ai ibagas dirini do goran-Ku.

22Tapi anggo pongkut itangihon ho sorani anjaha ihorjahon ho ganup na huhatahon, jadi Ahu ma gabe munsuh ni munsuhmu ampa imbang ni imbangmu,

23ai mardalan ma malekat-Kin i lobeimu anjaha ibobahon ho masuk hu tanoh ni halak Amori, Heti, Peresi, Kanaan, Hewi pakon Jebusi, anjaha ripaskonon-Ku ma sidea.

24Sabonar ulang ma ho marsombah hubani naibata ni sidea, atap ibalosi ho sidea, atap ibahen ho romban hubani horja ni sidea, tapi maningon sasapkononmu do sidea anjaha maningon ropukanmu do gana-gana na pinasuk ni sidea.

25Maningon balosannima do Jahowa Naibatanima, jadi pasu-pasuonni ma rutimu pakon bahmu anjaha padaohon-Ku ma naborit-naborit hun tongah-tongahnima.

26Ulang ma adong na saburan rudang barang na lambang i tanohmu; sai na gokan-Ku do bilangan ni ari-arimu.

27Sai na suruhon-Ku do panonggoting-Ku i lobeimu, anjaha palutuon-Ku sagala bangsa siparayakonnima, anjaha bahenon-Ku do maporus sagala munsuhmu humbam.

28Anjaha suruhon-Ku ma uhum hamagouan i lobeimu, ase ipabali halak Hewi, Kanaan pakon Heti hun lobeimu.

29Seng ibagas satahun pabalion-Ku sidea hun lobeimu, ase ulang gabe halimisan tanoh in, anjaha manggargar binatang harangan manunsahi ho.

30Marnunut pe pabalion-Ku sidea hun lobeimu, paima manggompari ho anjaha bagionmu tanoh on.

31Anjaha bahenon-Ku ma parbalogan ni tanohmu hun Laut Sigerger das hu laut ni halak Palistim, anjaha hun halimisan das hu bah Eprat; ai ondoskonon-Ku do pangisi ni tanoh ai hu tanganmu, ase ipabali ho sidea hun lobeimu.

32Seng bulih pajongjong padan ho pakon sidea barang naibata ni sidea.

33Seng bulih marianan sidea i tanohmu, ase ulang mardousa ho dompak Ahu ibahen sidea; ai anggo ibalosi ho naibata ni sidea, sai na gabe tirangkap ma ai bam.”


  Share Facebook  |  Share Twitter

 <<  Keluaran 23 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran