Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 24 >> 

Parpadanan ni Jahowa hubani Israel

1Dob ai nini ma dompak si Musa, “Tangkog ma hanima hubani Jahowa, ho pakon si Aron, si Nadab pakon si Abihu, ampa sipitupuluh halak pangituai ni Israel, anjaha mandaoh-daoh ma hanima marsombah hu Bangku.

2Si Musa tumang boi mandohori Jahowa, tapi na legan in ulang ma idohori, anjaha bangsa in pe seng bulih tangkog rap pakonsi.”

3Dob ai roh ma si Musa, ipajojor ma hubani bangsa ai ganup hata ni Jahowa pakon ganup paraturan-paraturan ai. Jadi sahata ma ganup bangsa ai mambalosi, nini sidea ma, “Ganup hata na pinatugah ni Jahowa sai na bahenonnami do.”

4Jadi isuratkon si Musa ma ganup hata ni Jahowa. Girah ma ia puho patarni ai, ipauli ma sada anjapanjap i bona ni dolog ai pakon sapuluh dua tugu mangihutkon marga ni Israel na sapuluh dua ai.

5Dob ai isuruh ma garama humbani halak Israel, ase igalangkon sidea galangan situtungon pakon lombu bahen galangan pardearan bani Jahowa.

6Ibuat si Musa ma satongah daroh ai, ibahen ma ai hubagas batil, anjaha na satongah nari hu anjapanjap ai do ipispiskon.

7Dob ai ibuat ma pustaha parpadanan ai, ibasahon ma ai i lobei ni bangsa ai, jadi nini sidea ma, “Ganup na hinatahon ni Jahowa, sai na bahenonnami anjaha tangihononnami do.”

8Ibuat si Musa ma daroh ai, ipispiskon ma hu bangsa ai, anjaha nini ma, “Tonggor ma, on ma daroh parpadanan na pinatotap ni Jahowa hubani nasiam romban hubani haganup hata nongkan.”

9Dob ai tangkog ma si Musa pakon si Aron, si Nadab pakon si Abihu ampa pangintuai ni halak Israel na pitu puluh halak ai,

10gabe ididah sidea ma Naibata ni Israel; adong do i toruh ni Nahei-Ni songon batu intan Sapir tompani anjaha songon langit na lihar rupani.

11Anjaha seng isurdukkon tangan-Ni hubani pangintuai ni halak Israel. Ikawahkon sidea ma Naibata, dob ai mangan anjaha minum ma sidea.

Iulaki si Musa Tangkog hu Dolog

12Dob ai nini Jahowa ma hubani si Musa, “Tangkog ma ho hu Bangku, hu atas dolog on, paima ma ijin, ase Hubere bam batu panuratan na marisi titah pakon paraturan na dob Husurati, sipodahkononmu bani sidea.”

13Jadi marugas ma si Musa pakon si Josua juakjuakni ai, gabe tangkog ma si Musa hu Dolog ni Naibata.

14Nini ma dompak pangintuai ai, “Tading ma nasiam ijon paima mulak hanami bani nasiam; anjaha tonggor ma, rap pakon nasiam do si Aron pakon si Hur; barang ise na marparkara, hubani sidea ma ia laho.”

15Jadi tangkog ma si Musa hu dolog ai, anjaha irungkub hombun ai ma dolog ai.

16Sogop ma hamuliaon ni Jahowa hu atas Dolog Sinai, anjaha irungkub hombun ma dolog ai onom ari dokahni; bani ari papituhon idilo ma si Musa humbagas hombun ai.

17Songon apuy na marjimbur do rupa ni hamuliaon ni Jahowa i pakpak ni dolog ai ididah halak Israel.

18Jadi masuk ma si Musa hubagas hombun ai laho tangkog hu dolog ai. I dolog ai ma si Musa ompat puluh ari ompat puluh borngin dokahni.


  Share Facebook  |  Share Twitter

 <<  Keluaran 24 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran