Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 26 >> 

Lampolampo na Pansing

1“Ia lampolampo ai maningon bahenonmu do humbani sapuluh tirei; humbani hiou silopak na alus, na niangkup pakon humbani bonang na mahonda, na gerger ampa na gerger sahalian; bahen ma ai margombaran herub na tinonunkon.

2Ganjangni sada tirei dua puluh ualuh asta, bolagni ompat asta; sisada sibaran do ganup tirei ai.

3Lima tirei ai ipadomu ma na sada hubani na sada nari; na lima nari use ipadomu na sada hubani na sada nari.

4Anjaha bahenonmu do tali panangkutan na mahonda hu bibir ni tirei na parlobei ai bani pardomuanni, lanjar sonai do bahenonmu bibir ni tirei na paduahon ai bani pardomuanni.

5Lima puluh tali panangkut bahenonmu bani tirei na sada, anjaha lima puluh tali panangkut bahenonmu bani ujung ni tirei ai bani pardomuanni na paduahon ai; patontang ma tali panangkut ai, na sada hubani na sada nari.

6Anjaha maningon bahenonmu do lima puluh hait-kait omas laho padomuhon tirei na sada hubani hasomanni marhitei hait-kait ai, gabe jadi sada lampolampo ma ai.

7Bahen ma homa tirei humbani ambulu ni hambing sinahkonon i atas ni lampolampo ai; sapuluh sada tirei sisonai bahenonmu.

8Ganjang ni sada tirei tolu puluh asta, bolagni ompat asta; sisada sibaran do tirei na sapuluh sada ai.

9Anjaha padomuonmu do pulig lima tirei, pulig na onom tirei nari, anjaha maningon lompitonmu do tirei na paonomkon sangkan i lobei ni lampolampo ai.

10Maningon bahenonmu do lima puluh tali panangkutan bani bibir ni tirei na parujung bani pardomuanni, anjaha lima puluh tali panangkutan bani bibir ni tirei na sada nari, bani pardomuanni na paduahon.

11Maningon bahenonmu do lima puluh hait-kait tombaga, anjaha haitkononmu ma hait-kait ai hubani tali panangkutan ai laho padomuhon lampolampo ai gabe sada.

12Anjaha bagian na teba humbani tirei ni lampolampo ai, sisatongah ni tirei na teba ai, gantung i pudi ni lampolampo ai ma ai.

13Anjaha saasta bani na salopah, saasta bani na salopah nari humbani na teba bani ganjang ni tirei ni lampolampo ai maningon gantung ma ai i lambung ni lampolampo ai; bani na salopah on ampa na salopah nari, laho manutup ai.

14Pauli ma sada tutup ni lampolampo ai humbani bobak ni biribiri na pinagerger anjaha i atas ni ai tutup humbani bobak ni hambing.

Papan ni Lampolampo

15Pauli ma papan ni lampolampo ai humbani hayu nangka, jongjong.

16Sapuluh asta ganjang ni papan ai, anjaha tongah dua asta bolag ni sada papan.

17Maningon mardua pasi ganup papan ai, ase boi parapaton na sada hubani na sada nari; maningon sonai ma ganup papan ni lampolampo ai bahenonmu.

18Pauli ma papan bani lampolampo ai; dua puluh papan hampit dangsina.

19Bahen ma ompat puluh onjolan pirak i toruh ni na dua puluh papan ai, dua onjolan i toruh ni sada papan bani pasini na dua ai; pakon dua onjolan i toruh ni papan na legan bani pasini na dua ai;

20anjaha bani na salopah nari na hampit utara dua puluh papan,

21rap pakon onjolan pirak na ompat puluh ai, dua onjolan bei i toruh ni sada papan.

22Hubani pudi-pudi ni lampolampo ai hampit hasundutan bahen ma onom papan.

23Dua papan maningon bahenonmu hu suhi-suhi ni lampolampo ai hampit pudi.

24Maningon dua lapis ma ai hun toruh, tapi mardomu i atas marhitei sada langgu, sonai ma haduasi bani na dua suhi-suhi ai.

25Ase maningon adong ualuh papan rap pakon onjolan pirakni, sapuluh onom bueini; dua onjolan bei i toruh ni sada papan.

Ransang ni Lampolampo

26Anjaha maningon bahenonmu do ransangni humbani hayu nangka, lima hubani papan na salopah ni lampolampo ai,

27lima hubani papan na salopah nari ni lampolampo ai, anjaha lima hubani papan bani pudi-pudi ni lampolampo ai hampit hasundutan.

28Ransang partongah-tongah, na bani parsitongahan ni papan ai, maningon torus hun suhi-suhi na sada hu suhi-suhi na sada nari.

29Maningon lapisonmu do papan ai pakon omas, pinggol-pinggolni pe humbani omas do bahenonmu ase hujai ipamasuk ransang ai; ransang ai pe maningon lapisonmu do pakon omas.

30Maningon pajongjongonmu do lampolampo ai usih hu bani tiruan na nididahmu i dolog ai.”

Tirei ni Lampolampo

31“Dob ai maningon bahenonmu do sada tirei humbani bonang na mahonda, na gerger pakon na gerger sahalian pakon humbani hiou silopak, na alus na niangkup; margombaran herub bahenonmu ai, na tinonunkon jenges hujai.

32Maningon bahenonmu do ompat tiangni humbani hayu nangka na nilapis pakon omas, marhait-kait omas, anjaha ipajongjong i atas ni ompat onjolan pirak.

33Maningon gantungkononmu do tirei ai hampit toruh bani hait-kait ai, anjaha pamasuk ma hujai, hubagas tirei ai, poti parpadanan ai; anjaha tirei ai ma parholangan bennima i holangkolang ni na pansing pakon ianan sipansingan ai.

34Anjaha nahkon ma langkob pardearan ai hu atas ni poti parpadanan ai ibagas ianan sipansingan ai.

35Tapi anggo meja ai i darat ni tirei ai do bahenonmu, anjaha parsuluhan ai bani lopah ni lampolampo ai hampit dangsina tontang ni meja ai; ase hampit utara ma bahenonmu meja ai.

36Anjaha maningon bahenonmu do homa tirei bahen tutup ni labah ni lampolampo ai humbani bonang na mahonda, na gerger, na gerger sahalian pakon humbani kain linnen alus na niangkup, na tinonunkon.

37Anjaha maningon bahenonmu do lima tiang humbani hayu nangka hubani tirei ai anjaha lapisonmu pakon omas; hait-kaitni omas, anjaha tuang ma lima onjolanni humbani tombaga.”


  Share Facebook  |  Share Twitter

 <<  Keluaran 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel