Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 28 >> 

Aturan Pasal Pakeian ni Malim

1“Anjaha hatahon ma si Aron abangmin roh hubam, rap pakon sagala anakni ai luar hun tongah-tongah ni halak Israel, laho mambalosi Ahu gabe malim Bangku, ai ma si Aron pakon anakni si Nadab, si Abihu, si Eleasar pakon si Itamar.

2Bahen ma pakean na pansing hubani si Aron abangmin bahen hamuliaon pakon bahen jagar-jagar.

3Hatahon ma hubani haganup halak na pentar maruhur, sagala na dob Hugoki uhurni bani tonduy hapentaran, ase sidea padearhon pakean bani si Aron laho papansingkonsi, ase ia gabe malim Bangku.

4On ma pakean sipadearon ni sidea: Sada tutup tonton, sada baju epod, sada baju pardarat, sada baju parbagas na sinulam, sada gotong pakon sada gondit; maningon sidea do paulihon pakean na pansing bani si Aron abangmin pakon bani anakni in, ase ia gabe malim Bangku.

5Buaton ni sidea ma hujai omas, bonang na mahonda, na gerger anjaha na gerger sahalian pakon hiou silopak na alus na niangkup.

Pakeian Jabatan ni Sintua ni Malim

6Anjaha maningon padearon ni sidea do baju epod ai humbani omas, humbani bonang na mahonda, na gerger pakon na gerger sahalian pakon humbani hiou silopak na alus na niangkup.

7Maningon adong dua tutup abara ni epod ai, na mardomu hubani ujungni na dua ai, ase gabe sada.

8Gondit ni epod na i atas ni ai pe, na gabe panangkut ni ai, maningon sarupa pulunganni anjaha mardomu hujai, humbani omas, humbani bonang na mahonda, na gerger, na gerger sahalian pakon humbani hiou silopak na alus na niangkup.

9Maningon buatonmu do dua mata intan Kerisopras anjaha uhirhononmu hujai goran-goran ni anak ni Israel na sapuluh dua ai,

10onom goran ni sidea ai bani mata intan na sada, anjaha goran na onom nari hubani mata intan na sada nari, mangihutkon partubuh ni sidea.

11Songon tuhang uhir na manguhir tintin tokan, sonai ma uhironmu goran ni anak ni Israel hubani batu na dua ai, anjaha marhait-kait omas bahen inggot.

12Dob ai bahen ma na dua mata intan ai hubani na dua tutup abara ni epod ai bahen batu pardingatan hubani halak Israel; anjaha maningon bobanon ni si Aron i atas ni abarani na dua ai goran-goran ni sidea i lobei ni Jahowa bahen pardingatan.

13Maningon bahenonmu do hait-kaitni humbani omas,

14ampa dua rantei humbani omas pitah, na niangkup songon tali, anjaha haitkon ma rantei na niangkup ai hubani hait-kait ai.

15Anjaha bahenonmu do sada tutup tonton panguhumion, na pinauli jenges; dos songon padearhon epod bahenonmu ai, humbani bonang na mahonda, na gerger ampa na gerger sahalian, pakon humbani hiou silopak na niangkup.

16Maningon marompat suhi do ai anjaha dua lapis, sanjongkal ganjangni anjaha sanjongkal bolagni.

17Maningon tatahkononmu do hujai ompat ristei batu intan. Bani ristei parlobei, batu intan sardis, topasion pakon samarah;

18bani ristei na paduahon, batu intan rubin, sapir pakon diamant;

19bani ristei na patoluhon, batu intan opal, achat pakon ametis;

20bani ristei na paompatkon, batu intan korisolit, unam, pakon jaspis; maningon marpanangkutan omas bahenon batu intan na tinanahkonni ai.

21Maningon adong sapuluh dua batu margoran bei mangihutkon goran-goran ni anak ni Israel; songon tintin tokan ma ai bani na sapuluh dua marga ai, goran ni sidea bei iuhirhon hujai.

22Anjaha maningon bahenonmu hubani tutup tonton ai rantei songon tali na niangkup humbani omas pitah;

23anjaha bahenonmu do hubani tutup tonton ai dua tintin omas, anjaha nahkon ma na dua tintin ai hubani na dua tampakan ni tutup tonton ai.

24Anjaha maningon nahkononmu do na dua rantei omas ai hubagas na dua tintin na bani ujung ni tutup tonton ai;

25haduasi ujung ni na dua rantei ai maningon haitkononmu do ai hubani na dua hait-kait ai, anjaha nahkononmu do ai hubani tutup abara ni baju epod ai hampit lobei.

26Maningon bahenonmu do dua tintin omas anjaha nahkon ma ai bani na dua ujung ni tutup tonton ai, bani topini hampit bagas padompak pakon baju epod ai.

27Ambah ni ai maningon bahenonmu ope dua tintin omas sinahkononkon hubani na dua tutup abara ni baju epod ai, hampit toruh, dompak lobei, tongon bani pardomuanni, i atas ni gondit ni baju epod ai.

28Anjaha maningon sangkutkonon ni sidea do tutup tonton ai rap pakon tintinni ai hubani tintin ni baju epod ai marhitei bonang na mahonda, ase longkot ai i atas ni gondit ni baju epod ai anjaha ase ulang boi sirang tutup tonton ai humbani baju epod ai.

29Jadi sonai ma bahenon ni si Aron goran-goran ni Israel i atas ni pusu-pusu ibagas tutup tonton panguhumion ai, anggo laho ia masuk hubagas ianan na pansing ai, bahen pardingatan tongtong i lobei ni Jahowa.

30Anjaha maningon bahenonmu do hubagas tutup tonton panguhumion ai Urim pakon Tumim, maningon i atas ni pusu-pusu ni si Aron do ai anggo masuk ia hu lobei ni Jahowa; sonin ma tongtong boanon ni si Aron panguhumion ni halak Israel i atas ni pusu-pusu i lobei ni Jahowa.”

Baju Pardarat ni Epod

31“Anjaha maningon bahenonmu do baju pardarat ni epod ai, humbani bonang na mahonda ganup.

32I tongah-tongahni ma parborgokanni, martopi na tinonun inggot songon topi ni baju partohonan, ase ulang ra marigat.

33Maningon bahenonmu hu rambuni ai inggot, buah ni dalima humbani bonang na mahonda, na gerger anjaha na gerger sahalian pakon giring-giring omas i tongah-tongahni ai inggot,

34giring-giring omas sada, dob ai buah ni dalima, giring-giring omas sada, dob ai buah ni dalima, sonai ma inggot bani rambu ni baju pardarat ai.

35Maningon sorungkonon ni si Aron baju-baju ai anggo marugas ia, ase tarbogei sora ni giring-giring ai sanggah masuk ia hu lobei ni Jahowa, hubagas ianan na pansing ai ampa sanggah luar ia, ase ulang matei ia.

Tutup Pardompakan

36Maningon paulionmu homa sada tutup pardompakan humbani omas pitah, anjaha uhirhononmu hujai songon panguhiron bani tintin tokan: Pinapansing bani Jahowa.

37Anjaha maningon longkotkononmu do ai marhitei bonang na mahonda hubani gotong ai; maningon i lobei ni gotong ai do ai.

38Maningon bani pardompakan ni si Aron ma ai, ase boi si Aron mamorsan hahurangan ni ganup galangan na pansing, na dob pinapansing ni halak Israel gabe sibere-bere na pansing ni sidea; maningon totap ma ai i pardompakanni ase dapotan idop ni uhur halak Israel i lobei ni Jahowa.

39Maningon paulionmu do baju parbagas ai humbani hiou silopak na alus, anjaha sada gotong humbani hiou silopak na alus bahenonmu, tapi anggo gonditni maningon humbani na tinonun do bahenonmu.

Pakeian ni Malim Ari-ari

40Bani anak ni si Aron pe maningon paulionmu do baju-baju parbagas, gondit pakon tangkuluk bahen hamuliaon pakon pajagarhon.

41Maningon sorungkononmu do ai hubani si Aron abangmin pakon hubani sagala anakni na rapkonsi, anjaha maningon minakanmu do sidea, gokanmu tangan ni sidea anjaha papansingonmu sidea ase sidea gabe malim Bangku.

42Anjaha bahenonmu do bani sidea saluar humbani hiou silopak na alus manrongkob daging ni sidea na talar olat ni ulu ni towod ronsi binongei ganjangni.

43Maningon pakeion ni si Aron pakon anakni ai do ai laho masuk sidea hubagas lampolampo partumpuan ai atap laho dohoran ni sidea anjapanjap ai sihol marugas bani ianan na pansing ai, ase ulang marsalah sidea gabe matei sidea. Ai ma aturan na hot sadokah ni dokahni bani halak Israel ronsi ginompar ni sidea i pudini.”


  Share Facebook  |  Share Twitter

 <<  Keluaran 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran