Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 29 >> 

Aturan Mangondoskon Jabatan hubani Malim

1“Anjaha on ma partureini bahenonmu hubani sidea laho papansingkon sidea gabe malim Bangku: buat ma sada anak ni lombu pakon dua biribiri tunggal na so martikas;

2pakon ruti na so niigaran, ruti gemong na so niigaran na niagu pakon minak pakon lopat na so niigaran na marlapu minak. Maningon humbani itak na alus paulionmu in.

3Nahkon ma ai hubagas sada raga anjaha ibagas raga ai ma ai galangkon rap pakon anak ni lombu pakon biribiri na dua ai.

4Boan ma si Aron pakon anakni ai dohor hu labah ni lampolampo partumpuan ai, anjaha paridi ma sidea bani bah.

5Anjaha buat ma pakean ai, sorungkon ma ai hubani si Aron, baju-baju parbagas, baju-baju pardarat, baju epod pakon tutup tonton ai, anjaha gonditkon ma bani gondit ni baju epod ai.

6Nahkon ma gotong ai hu atas ni uluni anjaha longkotkon ma sortali hapansingon ai hubani gotong ai.

7Buat ma minak siminakkonon ai anjaha useihon ma ai hubani uluni laho mamminakisi.

8Hatahon ma homa anakni ai roh hun dohor anjaha sorungkon ma baju parbagas ai hubani sidea;

9gonditkon ma gondit ai hubani sidea, hubani si Aron pakon hubani anakni ai, anjaha tangkuluk ai longkotkon ma hubani ulu ni sidea; jadi ondos ma hamalimon ai hubani sidea marhitei aturan sisadokah ni dokahni. Sonin ma parpabangkitmu bani si Aron pakon anakni ai.

10Dob ai boban ma lombu jonggi ai hu lobei ni lampolampo partumpuan ai. Itampeihon si Aron pakon anakni ai ma tanganni hu atas ni ulu ni lombu jonggi ai.

11Anjaha bunuhon ma lombu jonggi ai i lobei ni Jahowa, bani labah ni lampolampo partumpuan ai.

12Buat ma deba humbani daroh ni lombu jonggi ai, daiskon ma ai hubani tanduk ni anjapanjap ai marhitei jari-jarimu; tapi duruskon ma daroh na teba ai bani nahei ni anjapanjap ai.

13Buat ma ganup taboh-taboh panutup ni bituha pakon harambuyan na tampei hubani atei-atei pakon hubani piah-piah na dua ai ronsi taboh-taboh na longkot hujai anjaha tutung ma ai i atas anjapanjap ai.

14Tapi anggo daging ni lombu jonggi ai, hulingkulingni pakon ginagatni maningon tutungonmu do ai pakon apuy i darat ni parsaranan ai; ai ma na gabe galangan pardousaon.

15Dob ai buat ma biribiri tunggal na sada ai, hatahon ma si Aron pakon anakni manampeihon tangan ni sidea hu atas ulu ni biribiri tunggal ai.

16Dob ai sayat ma biribiri tunggal ai, buat ma darohni anjaha pispiskon ma ai hubani anjapanjap ai inggot.

17Dob ai toktoki ma biribiri tunggal ai, burihi ma bituhani pakon naheini anjaha nahkon ma ai bani gorini pakon hubani uluni,

18anjaha tutung ma ganup biribiri tunggal ai i atas ni anjapanjap ai; galangan situtungon ma ai bani Jahowa, uap na misbou, galangan marhitei apuy hubani Jahowa.

19Dob ai buat ma biribiri tunggal na sada nari, anjaha itampeihon si Aron pakon anakni ai ma tangan ni sidea hubani ulu ni biribiri tunggal ai.

20Sayat ma biribiri tunggal ai, buat ma deba darohni, anjaha daiskon ma ai hu pinggol siamun ni si Aron pakon hu pinggol siamun ni anakni ai, hubani ompuompu ni tangan siamun pakon hubani ompuompu ni nahei siamun ni sidea; dob ai pispiskon ma daroh ai hubani anjapanjap ai inggot.

21Dob ai buat ma deba humbani daroh na i atas ni anjapanjap ai pakon humbani minak siminakkonon ai anjaha pispiskon ma ai hubani si Aron pakon hubani pakeanni, hubani anakni ampa hubani pakean ni anakni ai, ase pansing si Aron pakon pakeanni ai, pansing pakon anakni ronsi pakean ni anakni ai na rap pakonsi.

22Anjaha maningon buatonmu do homa taboh-taboh ni biribiri tunggal ai, taboh-taboh ni ihurni, taboh-taboh panutup ni bituhani, harambuyan na tampei hubani atei-ateini pakon piah-piah na dua ai ampa taboh-taboh na longkot hujai, ronsi hae-hae lobei hampit siamun, ai biribiri tunggal paondoskon jabatan do ai,

23sada ruti, sada ruti gemong na maragu minak, sada lopat humbagas raga isian ni ruti na so niigaran na i lobei ni Jahowa;

24nahkon ma ganupan ai hu tangan ni si Aron pakon hu tangan ni anakni ai, anjaha itatang ma ai bahen galangan tatangan i lobei ni Jahowa.

25Dob ai buat ma ai hun tangan ni sidea, anjaha tutung ma ai bahen dahupa i atas anjapanjap ai tambah ni galangan situtungon bahen uap na misbou i lobei ni Jahowa; galangan marhitei apuy ma ai bani Jahowa.

26Dob ai buat ma tonton ni biribiri tunggal paondoskon jabatan hubani si Aron anjaha tatang ma ai bahen galangan bani Jahowa; ai ma na gabe rupeimu.

27Sonin ma urasonmu tonton galangan tatangan pakon hae-hae lobei bahen galangan tatangan na tinatang anjaha na niangkat humbani biribiri tunggal paondoskon jabatan hubani si Aron pakon hubani anakni ai.

28Maningon gabe aturan na hot ma ai hubani halak Israel, bani si Aron pakon bani anakni ronsi sadokah ni dokahni, ai parbagianan ni malim do ai sigalangkonon ni halak Israel humbani galangan pardameian ni sidea; galangan ni sidea do ai bani Jahowa.

29Ia pakean ni si Aron na pansing ai, ondos bani anakni ma ai use, sipakeion sanggah mamminaki ampa mangondoskon jabatan hubani sidea.

30Maningon pitu ari dokahni pakeionni pakean ai, atap ise humbani anakni si Aron na gabe malim gantihni, anggo sihol masuk ia hubagas lampolampo partumpuan ai laho marugas ibagas ianan na pansing ai.

31Maningon buatonmu ma biribiri tunggal paondoskon jabatan ai, anjaha lompah ma dagingni ibagas ianan na mapansing ai.

32Anjaha maningon panganon ni si Aron pakon anakni ai ma juhut ni biribiri tunggal ai rap pakon ruti na ibagas raga ai, bani labah ni lampolampo partumpuan ai.

33Maningon panganon ni sidea do galangan, na mangadongkon pardearan, laho paondoskon jabatan ai bani sidea pakon papansingkon sidea; tapi anggo halak parluar seng bulih panganonni ai, ai na pansing do ai.

34Anggo adong na teba humbani juhut paondoskon jabatan ai, barang humbani ruti das ronsi patarni, maningon tutungonmu do na teba ai bois ibagas apuy; seng bulih panganon ai, ai na pansing do ai.

35Sonin ma sibahenonmu hubani si Aron pakon anakni ai, songon na dob hutonahkon ai bam; pitu ari dokahni mangondoskon jabatan ai bani sidea.”

Pasal Galangan Ari-ari

36“Anjaha ganup ari maningon sayatonmu do sada lombu bahen galangan pardousaon laho pajongjong pardearan. Maningon urasonmu do homa anjapanjap ai marhitei galangan pardearan sigalangkononmu i atasni, anjaha maningon minakanmu do ai laho papansingkonsi; sagala na manjolom anjapanjap ai gabe pansing ma.

37Pitu ari dokahni bahenonmu galangan pardearan i atas anjapanjap ai. Maningon papansingonmu ai ase gabe pansing sahalian ai.

38On do na maningon galangkononmu i atas ni anjapanjap ai: Dua anak ni biribiri na marumur satahun ganup ari torus.

39Sada biribiri galangkononmu sogod, anjaha biribiri na sada nari galangkononmu malele bod.

40Anjaha hasoman ni biribiri na parlobei ai maningon bahenonmu satumba nitak marsaor minak na giniling saparompat hin, ambah ni saparompat hin anggur bahen galangan siinumon.

41Ia anak ni biribiri na sada nari sigalangkononmu malele bod, songon panggalangkonmu bani galangan sipanganon pakon galangan siinumon sogod ma panggalangkononmu ijai bahen uap na misbou ampa galangan situtungon bani Jahowa.

42Ai ma galangan situtungon na tongtong bani ginomparnima bani labah ni lampolampo partumpuan ai i lobei ni Jahowa; hujai do jumpahkonon-Ku hanima ase marsahap Ahu pakon ho ijai.

Bagah-bagah ni Naibata

43Ijai ma Ahu sihol marjumpah ampa halak Israel, jadi gabe pansing ma ianan ai marhitei hamuliaon-Ku.

44Papansingon-Ku ma lampolampo partumpuan ai pakon anjapanjap ai; papansingon-Ku ma homa si Aron pakon sagala anakni gabe malim Bangku.

45I tongah-tongah ni halak Israel do Ahu marianan, ase Ahu gabe Naibata ni sidea.

46Ase ibotoh sidea Ahu do Naibata ni sidea na mambobahon sidea luar hun tanoh Masir, ase marianan Ahu i tongah-tongah ni sidea; Ahu do Jahowa, Naibata ni sidea.”


  Share Facebook  |  Share Twitter

 <<  Keluaran 29 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran