Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 31 >> 

Ipabangkit Naibata Tukang-Ni: Si Besaleel pakon si Ahaliab

1Dob ai nini Jahowa ma dompak si Musa,

2“Tonggor ma, domma Hudilo sahalak na margoran si Besaleel, anak ni si Uri, ai ma anak ni si Hur humbani marga Juda.

3Domma pala Hugoki uhurni bani Tonduy ni Naibata, pakon hapentaran, torus ni uhur ampa habotohon bani haganup horja ai,

4laho mamingkiri hatukangon na laingan, manukangi omas, pirak pakon tombaga,

5homa manguhir anjaha mamijor batu intan, manukangi hubani situkangon na marbagei-bagei ai.

6Anjaha tonggor ma, domma Hupabangkit hasomanni, ai ma si Ahaliab, anak ni Ahisamak humbani marga Dan; domma Hubere homa hapentaran hubagas uhur ni ganup halak na pentar laho mangkorjahon haganup na dob Hutonahkon ai bam,

7lampolampo partumpuan, poti parpadanan ampa tutup pardearan na i atasni ai, pakon haganup parugas ni lampolampo ai,

8meja ai ampa parugasni, parsuluhan na humbani omas pitah ai ampa ganup parugasni, pakon anjapanjap pardahupaan ai.

9Sonai homa anjapanjap panggalangan ni galangan situtungon ampa parugasni haganup, pakon tong parburihan ampa onjolanni,

10pakean tohonan pakon pakean na pansing bani Malim Aron ampa pakean ni anakni laho mangkorjahon hamalimon ai,

11ronsi minak pamminaki pakon dahupa na misbou hubani ianan na pansing ai; hombar hubani ganup na huhatahon ai hubam, sibahenon ni sidea ai.”

Iparatah Use Titah Pasal Ari Sabat

12Dob ai nini Jahowa ma dompak si Musa,

13“Hatahon ma hubani halak Israel, ʻManingon papansingonnima do Sabat-Ku, ai ai do tanda ni parpadanan Bangku pakon bannima ronsi bani ginomparnima, ase ibotoh hanima, Ahu do Jahowa na papansingkon hanima.

14Maningon papansingonnima do Sabat ai, ai na pansing do ai bannima; ganup na pabutakkon ai, maningon marutang hosah ia; barang ise na mangkorjahon horja ijai maningon rotaponkon do hosahni hun tongah-tongah ni bangsani.

15Onom ari do horjaonkon horja, tapi ari papituhon ai, ari parsaranan na pansing ma ai bani Jahowa; barang ise na marhorja bani ari Sabat ai, maningon marutang hosah ia.

16Halani ai maningon papansingon ni halak Israel do ari Sabat ai anjaha papansingon ni sidea torus marsundut-sundut, gabe padan na totap sadokah ni dokahni.

17Gabe tanda ma ari Sabat ai Bangku pakon bani halak Israel sadokah ni dokahni, ai ibagas na onom ari do itompa Jahowa langit pakon tanoh on, tapi bani ari papituhon ai marsaran ma Ia anjaha pahosahkon.ʼ”

Ijalo si Musa Dua Batu Panuratan

18Jadi dobkonsi Jahowa marsahap pakon si Musa i atas Dolog Sinai, ibere ma bani dua batu panuratan ni hasaksian ai, na sinurat marhitei jari-jari ni Naibata.


  Share Facebook  |  Share Twitter

 <<  Keluaran 31 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran