Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 33 >> 

Pusok ni Uhur ni Bangsa ai

1Nini Jahowa ma dompak si Musa, “Laho ma ho tangkog hunjon, ho pakon bangsa na dob niarahkonmin luar hu tanoh na dob Hubulawankon hubani si Abraham, si Isak pakon si Jakob, sanggah na Huhatahon: Hubani ginomparmu do bereon-Ku in.

2Husuruh pe sada malekat mambobahon ho, anjaha Huusir pe halak Kanaan, Amori, Heti, Peresi, Hewi pakon Jebusi.

3Ia ma mambobahon ho hu tanoh habaoran ni dadih pakon manisan ni huramah; ai seng tarbahen Ahu tangkog rap pakon hanima, ai bangsa na hengkeng maruhur do hanima, ase ulang siap holi hanima Hubahen i tongah dalan.”

4Jadi dob ibogei bangsa ai hata na koras ai pusok ma uhur ni sidea; sada pe lang na mamahei ugasni.

5Ai domma ihatahon Jahowa hinan hata-Ni hubani si Musa, “Hatahon ma hubani halak Israel: Bangsa na hengkeng maruhur do hanima, ambit tongkin gelah Ahu tangkog pakon hanima, maningon siap do hanima bahenon-Ku. On pe itanggal bei ma ugas-ugasni humbani dirini, ase Hubotoh aha sibahenon-Ku bannima.”

6Jadi itanggali halak Israel ma ugas-ugas ni sidea bei humbani Dolog Horeb nari.

Si Musa Marsahap Dumpar Bohi ampa Naibata Ibagas Lampolampo

7Jadi ibuat si Musa ma lampolampo ai, ipajongjong ma ai i darat ni parsaranan ai, daoh hun parsaranan ai; ibahen ma goranni Lampolampo Partumpuan. Barang ise na sihol mangindahi Jahowa, maningon luar ia laho hu Lampolampo Partumpuan ai, na i darat ni parsaranan ai.

8Anggo luar si Musa laho hu lampolampo ai, jongjong bei ma haganup bangsa ai, jongjong ganup i labah ni lampolamponi bei anjaha ituludkon ma si Musa, paima masuk ia hubagas lampolampo ai.

9Anggo masuk ma si Musa hubagas lampolampo ai, turun ma hombun na jongjong ai, lanjar jongjong bani labah ni lampolampo ai, jadi marsahap ma Naibata pakon si Musa.

10Ase anggo ididah ganup bangsa ai ma hombun na jongjong ai, jongjong bani labah ni lampolampo ai, jongjong ma ganup bangsa ai anjaha marsombah, ganup bani labah ni lampolamponi.

11Jadi marsahap ma Jahowa pakon si Musa dumpar bohi songon sada halak na marsahap hubani hasomanni; dob ai mulak ma use si Musa hu parsaranan ai. Tapi anggo si Josua, juakjuakni, anak ni si Nun, anak garama ai, seng meret ia hun tongah-tongah ni lampolampo ai.

12Dob ai nini si Musa ma dompak Jahow, “Tonggor ma, domma ihatahon Ham hu bangku: Arahkon ma bangsa on tangkog, tapi seng ipatugah Ham hu bangku, atap ise suruhon-Mu hasomanku, age pe domma ihatahon Ham: Hutanda do ho pakon goranmu, anjaha domma jumpahan idop ni uhur ho i lobei-Hu.

13Sonari pe, anggo tongon ma na dob jumpahan idop ni uhur ahu i lobei-Mu, pabotohkon Ham ma hu bangku jabolon-Mu, ase hutandai Ham, paboa na dob jumpahan idop ni uhur ahu i lobei-Mu; anjaha tonggor ma, rayat-Mu do bangsa on.”

14Jadi nini m, “Bohing-Ku ma hasomanmu mardalan anjaha arahkonon-Ku ma ho hu hasonangan.”

15Nini si Musa ma dompak Jahowa, “Anggo seng bohi-Mu mambobahon hanami, ulang ma arahkon Ham hanami tangkog hunjon.

16Ai marhitei aha ma boi botohon, na dob dapotan idop ni uhur ahu i lobei-Mu, ahu pakon bangsa-Mu? Ai lang marhitei humbani na hinasomanan-Mu hanami mardalan, gabe marhasurungan ahu pakon rayat-Mu humbani ganup bangsa na i atas tanoh on?”

17Dob ai nini Jahowa ma dompak si Musa, “Age hata na hinatahonmondi bahenon-Ku do in, halani na dob jumpahan idop ni uhur ho i lobei-Hu anjaha Hutanda ho pakon goranmu.”

18Nini si Musa ma, “Pataridahkon Ham ma bangku hamuliaon-Mu.”

19Jadi nini Jahowa ma, “Pabontaskonon-Ku ma ganup hatunggungon-Ku hun lobei ni bohimu, anjaha dilohonon-Ku goran ni Jahowa i lobeimu: maridop ni uhur do Ahu hubani siidopan-Ku anjaha marontou ni uhur do Ahu hubani siontouan-Ku.”

20Tapi nini ope, “Seng tarbahen ho anggo mangidah bohing-Ku, ai seng dong jolma na mangidah Ahu lanjar manggoluh.”

21Nini Jahowa ma, “Tonggor ma, adong do sada ianan i Lambung-Ku, hajongjonganmu i atas dolog batu ai,

22anjaha sanggah mamontas hamuliaon-Ku, nahkonon-Ku ma ho hubagas rigat ni dolog batu ai, anjaha rongkobon-Ku ho bani tangan-Ku, paima lopus Ahu;

23dob ai Hutarik ma tangan-Ku gabe idahonmu ma Ahu hun pudi; tapi bohing-Ku seng boi idahon.”


  Share Facebook  |  Share Twitter

 <<  Keluaran 33 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel