Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 36 >> 

Si Besaleel pakon si Aholiab Mamungkah Horja ni Sidea

1Jadi ibahen si Besaleel pakon si Aholiab ma ampa haganup paramangon, na pentar maruhur, na dob manjalo uhur hapentaran pakon hapandeian humbani Jahowa, ase ibotoh mangkorjahon haganup horja pajongjong ianan na pansing ai, romban hubani haganup na tinonahkon ni Jahowa.

2Ai domma idilo si Musa hinan si Besaleel pakon si Aholiab ampa haganup dalahi na pentar maruhur na dob manjalo uhur hapentaran humbani Jahowa pakon haganup na tarojur uhurni roh mangkorjahon horja ai.

3Jadi ijalo sidea ma humbani si Musa haganup galangan ai, na binoban ni halak Israel laho manumpaki horja bani ianan na pansing ai; tapi sai inunut sidea ope ganup sogod mamboban guguan rosuh ni uhurni.

4Jadi roh bei ma haganup halak na pentar laho mangkorjahon haganup horja bani ianan na pansing in, ganup humbani horja na nihorjahon ni sidea bei.

5Nini sidea ma hubani si Musa, “Mabahattu do guguan na binoban ni bangsa in, lobih humbani na porlu pakean hubani horja na tinonahkon ni Jahowa sibahenon in.”

6Jadi ihatahon si Musa ma martingting i parsaranan ai, “Ulang be sai inunut hita Paramangon age parinangon mambere guguan hubani ianan na pansing in! Jadi iparontihon bangsa ai ma mamboban,

7ai domma sungkup parugas bani haganup horja sihorjaonkon ai, pala lobih.”

Ipajongjong Lampolampo na Pansing

8Jadi ipauli sagala halak na pentar maruhur humbani sihorjahon horja ai ma lampolampo ai humbani sapuluh tirei, na binahen humbani hiou silopak na alus na niangkup pakon humbani bonang simahonda, sigerger anjaha na gerger sahalian, margambaran herub na tinonun, humbani kaen na jenges do ipauli ai;

9ganjang ni ganup tirei ai dua puluh ualuh asta, anjaha bolagni ompat asta, sisada sibaran do ganup tirei ai.

10Anjaha ipadomu ma lima tirei ai, na sada hubani na sada nari, anjaha na lima nari use ipadomu na sada hubani na sada nari.

11Anjaha ibahen ma tali panangkutan na mahonda hu bibir ni tirei na parlobei ai bani pardomuanni, lanjar sonai do ibahen bani bibir ni tirei na paduahon ai bani pardomuanni.

12Lima puluh tali panangkutan ibahen bani tirei na sada, anjaha lima puluh tali panangkutan ibahen bani ujung ni tirei ai bani pardomuanni na paduahon ai; patontang do tali panangkutan ai na sada hubani na sada nari.

13Ibahen ma lima puluh hait-kait omas, anjaha ipadomu ma tirei na sada hubani na sada nari marhitei hait-kait ai, gabe sada lampolampo ma ai.

14Ibahen ma homa tirei humbani ambulu ni hambing bahen langit-langit i atas ni lampolampo ai, sapuluh sada tirei sisonai ibahen.

15Ganjang ni ganup tirei tolu puluh asta, anjaha bolag ni ganup tirei ompat asta, sisada sibaran do tirei na sapuluh sada ai.

16Ipadomu ma pulig lima tirei, anjaha pulig tirei na onom nari.

17Ibahen ma lima puluh tali panangkutan bani bibir ni tirei na parujung bani pardomuanni, anjaha lima puluh tali panangkutan bani bibir ni tirei na sada nari, bani pardomuanni na paduahon.

18Ibahen ma lima puluh hait-kait tombaga, laho padomuhon lampolampo ai gabe sada.

19Ibahen ma use tutup bani lampolampo ai humbani bobak ni biribiri tunggal na sinolop, i atas ni ai use bobak ni hambing.

20Ibahen ma papan ni lampolampo ai humbani hayu nangka, jongjong ibahen.

21Sapuluh asta ganjang ni papan ai anjaha tongah dua asta bolag ni sada papan.

22Ganup papan mardua pasi, ase boi parapaton na sada hubani na sada nari, sonai ma ganup papan ni lampolampo ai ibahen.

23Sonon ma ibahen papan bani lampolampo ai. Dua puluh papan hampit dangsina.

24Ibahen do ompat puluh onjolan pirak i toruh ni na dua puluh papan ai, dua bei onjolan i toruh ni sada papan bani pasini na dua ai, pakon dua onjolan i toruh ni papan na legan bani pasini na dua ai.

25Bani na salopah nari hampit utara ibahen ma dua puluh papan,

26rap pakon onjolan pirak na ompat puluh ai, dua onjolan bei i toruh ni sada papan.

27Hubani pudi-pudi ni lampolampo ai hampit hasundutan ibahen do onom papan.

28Ibahen ma dua papan hu suhi-suhi ni lampolampo ai hampit pudi.

29Jadi dua lapis ma ai hun toruh mardomu i atas pinadomu ni sada langgu; sonai ma ibahen haduasi bani na dua suhi-suhi ai.

30Ase ualuh papan ma ijai rap pakon onjolan pirakni; sapuluh onom bueini, dua bei i toruh ni sada papan.

31Ibahen ma ransang-ransang humbani hayu nangka, lima hubani papan na salopah ni lampolampo ai,

32lima ransang-ransang hubani papan na salopah nari ni lampolampo ai, anjaha lima ransang-ransang hubani papan ni lampolampo ai hampit hasundutan.

33Ibahen ma ransang partongah-tongah bani partongahan ni papan ai, torus hun suhi-suhi na sada hu suhi-suhi na sada nari.

34Ilampis ma papan ai bani omas, pinggol-pinggolni pe omas do ibahen bahen panjolom ni ransang-ransang ai, anjaha ilampis do ransang-ransang ai bani omas.

35Ipauli ma sada tirei humbani bonang na mahonda, na gerger pakon na gerger sahalian pakon humbani hiou silopak na alus na niangkup; margombaran herub do ibahen ai, na tinonunkon jenges hujai.

36Ibahen ma ompat tiangni humbani hayu nangka na nilapis pakon omas, hait-kaitni omas, anjaha ituang ma ompat onjolanni humbani pirak.

37Ibahen ma homa tirei bahen tutup ni labah ni lampolampo ai humbani bonang na mahonda, na gerger, na gerger sahalian pakon humbani hiou silopak na alus na niangkup, tonunan sampurborna,

38pakon tiangni na lima ai ampa hait-kaitni; ilapis ma uluni pakon ransang-ransangni bani omas, tapi onjolanni na lima ai humbani tombaga do.


  Share Facebook  |  Share Twitter

 <<  Keluaran 36 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran