Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 38 >> 

Ipauli Anjapanjap Panggalangan pakon Parugasni

1Ipauli ma anjapanjap panggalangan ni galangan situtungon humbani hayu nangka, lima asta ganjangni, lima asta bolagni, ase marompat suhi do, anjaha tolu asta gijangni.

2Ibahen ma ompat tandukni bani suhi-suhini na ompat ai, sada do ai pakon tandukni ai, anjaha ilampis do ai pakon tombaga.

3Anjaha ipauli ma ganup parugas na porlu bani anjapanjap ai: Parabuanni, suyuk-suyukni, mangkukni, garpuni pakon parapuyanni, humbani tombaga do ganup ipauli parugasni ai.

4Ibahen ma bani anjapanjap ai sada hondor-hondor humbani jala-jala tombaga na iangit, i toruh ni topini das hubani parsitongahan ni anjapanjap ai.

5Ituang ma ompat pinggol-pinggol hubani suhini na ompat ai mardomu hu hondor-hondor tombaga ai bahen panurukan ni lanja-lanja ai.

6Ipauli ma lanja-lanja ai humbani hayu nangka anjaha ilapis do ai bani tombaga.

7Anjaha ipamasuk ma lanja-lanja ai hubagas pinggol-pinggol na i lambung ni anjapanjap ai, ase boi usungon ai marhitei ai; marruang do anjapanjap ai ipauli humbani papan.

Parpauli bani Tong Parburihan

8Ipauli ma tong parburihan ai humbani tombaga, onjolanni pe humbani tombaga do, ai ma humbani sormin ni puang-puang parugas, na marugas bani labah ni lampolampo partumpuan ai.

Parpauli bani Alaman pakon Tireini

9Ipadear ma alamanni, bani lopah pardangsina, “Tirei ni alaman ai saratus asta ganjangni humbani hiou silopak na alus na niangkup,

10dua puluh tiangni anjaha onjolanni dua puluh humbani tombaga, tapi hait-kait ni tiangni ampa ransang-ransangni pirak do.”

11Bani lopah parutara, “Saratus asta ganjang ni tirei ai, tiangni dua puluh, onjolanni dua puluh, humbani tombaga, tapi hait-kait ni tiangni ampa ransang-ransangni pirak do.”

12Bani lopah parhasundutan, “Lima puluh asta ganjang ni tireini, tiangni sapuluh, anjaha onjolanni sapuluh, tapi anggo hait-kait ni tiangni ampa ransang-ransangni pirak do.”

13Lima puluh asta do bolag ni alaman ai hampit hapoltakan.

14Sapuluh lima asta ganjang ni tireini bani salopah ni horbangan ai, tolu tiangni anjaha tolu onjolanni.

15Bani na salopah nari pe sonai do, “Bani hadua lopah ni horbangan ai dong do tirei sapuluh lima asta ganjangni, tolu tiangni anjaha tolu onjolanni

16Ganup tirei ni alaman ai inggot humbani hiou silopak na alus na niangkup do.

17Tombaga do onjolan ni tiang ai, tapi anggo hait-kaitni pakon ransang-ransangni pirak do, marlapis pirak do uluni, anjaha marransang-ransang pirak do ganup tiang ni alaman ai.

18Tapi anggo tirei ni labah ni horbangan ai tonunan sampurborna do, humbani bonang na mahonda, na gerger, na gerger sahalian pakon humbani hiou silopak na alus na niangkup; ganjangni dua puluh asta, gijangni pakon bolagni lima asta do mangihutkon sibaran ni tirei ni alaman ai.

19Humbani tombaga do tiangni na ompat ai pakon onjolanni na ompat ai; hait-kaitni, lampis ni uluni pakon ransang-ransangni pirak do.

20Ganup paku hubani ianan na pansing ai pakon hubani alaman ai inggot humbani tombaga do.”

Buei ni Guguan

21On ma buei ni na pinalaho hubani ianan na pansing ai, lampolampo partumpuan ai, na binilang mangihutkon parentah ni si Musa hubani horja ni halak Levi, binobahon ni si Itamar, anak ni Malim Aron.

22Si Besaleel, anak ni si Uri, ai ma anak ni si Hur, marga Juda, mangkorjahon haganup na tinonahkon ni Jahowa hubani si Musa

23Hasomanni ai ma si Aholiab, anak ni si Ahisamak, marga Dan, sada tuhang anjaha sipartonun hiou na mahonda, na gerger, na gerger sahalian pakon hiou silopak na alus na niangkup do ia.

24Haganup omas na pinakei hubani horja laho paulihon ianan na pansing ai, ai ma omas humbani galangan ai, dua puluh siah talenta pakon pitu ratus tolu puluh sekel do, mangihutkon sekel bani ianan na pansing ai.

25Anjaha pirak na roh humbani kuria ai, humbani sagala na tarbilang saratus talenta pakon saribu pitu ratus pitu puluh lima sekel do mangihutkon sekel bani ianan na pansing ai.

26Sabeka ganup halak, ai ma satongah sekel mangihutkon sekel bani ianan na pansing ai; humbani ganup halak na masuk bilangan, olat ni na marumur dua puluh tahun hu atas, tumpu onom ratus tolu ribu lima ratus lima puluh halak bueini.

27Bois do saratus talenta pirak ituang bahen onjolan ni ianan na pansing ai pakon onjolan ni tirei ai, saratus talenta hubani na saratus onjolan ai, ase sada talenta bani sada onjolan.

28Tapi humbani sisaribu pitu ratus pitu puluh lima sekel pirak ai ipauli ma hait-kait bani tiang ai, ilampis ma uluni pakon ransang-ransangni.

29Anjaha buei ni guguan tombaga ai pitu puluh talenta dua ribu ompat ratus sekel do.

30Ipauli ma hunjai onjolan ni labah ni lampolampo partumpuan ai, anjapanjap tombaga ai pakon hondor-hondor tombagani ampa haganup parugas ni anjapanjap ai.

31Sonai homa onjolan ni alaman ai inggot pakon onjolan ni horbangan ni alaman ai ronsi haganup pasuk-pasuk ni ianan na pansing ai pakon haganup pasuk-pasuk ni alaman ai inggot.


  Share Facebook  |  Share Twitter

 <<  Keluaran 38 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran