Alkitab Mobile SABDA
[VER] : [SIMALUNGUN]     [PL]  [PB] 
 <<  Keluaran 7 >> 

Tanda Halongangan na Binahen ni si Musa pakon si Aron i Lobei ni Parao

1Jadi nini Jahowa ma dompak si Musa, “Tonggor ma, domma Hupabangkit ho gabe Naibata ni Parao anjaha si Aron abangmin gabe nabimu.

2Hatahon ma haganup na dob Huparentahkon in bam; anjaha abangmu si Aron ma padaskon ai hubani Parao, ase ipalopas laho halak Israel hun tanohni.

3Tapi pahengkengon-Ku ma uhur ni Parao, anjaha age pe Hupabuei tanda pakon halongangan-Ku i tanoh Masir,

4seng tangihonon ni Parao hanima; jadi honahonon-Ku ma tangan-Ku hu Masir anjaha padaraton-Ku ma balang-Ku, bangsang-Ku halak Israel hun tanoh Masir marhitei uhum banggal.

5Jadi botohon ni halak Masir ma Ahu do Jahowa, anggo Hupagostong tangan-Ku dompak Masir anjaha Hupadarat halak Israel hun tongah-tongah ni sidea.”

6Jadi ibahen si Musa pakon si Aron ma songon na pinarentahkon ni Jahowa hubani sidea; sonai do ibahen sidea.

7Ualuh puluh tahun ma umur ni si Musa anjaha umur ni si Aron ualuh puluh tolu tahun, sanggah na marsahap ai sidea pakon Parao.

8Dob ai nini Jahowa ma dompak si Musa pakon si Aron,

9“Anggo ihatahon Parao bannima, ʻPatuduhkon hanima ma marhitei sada tanda halongangan,ʼ jadi hatahon ma hubani si Aron, ʻBuat ma tungkotmin, gijigkon ma in hu lobei ni Parao, ase gabe ulog in.ʼ”

10Dob ai iparayak si Musa pakon si Aron ma Parao, ibahen sidea ma songon na pinarentahkon ni Jahowa. Igijigkon si Aron ma tungkotni ai hu lobei ni Parao pakon hu lobei ni juakjuakni, jadi gabe ulog ma ai.

11Dob ai idilo Parao ma halak paruhur pakon datu. Jadi sidea pe, datu ni Masir, ibahen ma sonai marhitei tabas ni sidea.

12Ipanggijigkon sidea bei ma tungkotni, jadi gabe ulog ma ai; tapi ibondut tungkot ni si Aron ma tungkot ni sidea ai.

13Gabe hengkeng ma uhur ni Parao, seng itangihon sidea songon na dob hinatahon ni Jahowa hinan.

Uhum na Parlobei: Bah Gabe Daroh

14Dob ai nini Jahowa ma dompak si Musa, “Na hengkeng do uhur ni Parao, manjua do ia palahohon bangsa in.

15Laho ma ho girah sogod hubani Parao, sanggah laho ia hu bah; jumpahkon ma ia hu topi ni bah ai, anjaha jolom ma ibagas tanganmu tungkot na dob gabe ulog ai.

16Hatahon ma hu bani, ʻJahowa, Naibata ni halak Heber do na marsuruh ahu hu bamu mangkatahon: Lopas ma bangsang-Ku laho, ase iidangi Ahu i halimisan; hape tonggor ma, seng itangihon ho ronsi nuan.ʼ

17Sonon do nini Jahowa, ʻBotohonmu ma marhitei tanda on, Ahu do Jahowa; tonggor ma, libaskonon-Ku ma tungkot na ibagas tangankon hu bah na i Bah Nil in, jadi mubah ma in gabe daroh,

18jadi matei ma nidurung na ibagas Bah Nil in, gabe marbau ma Bah Nil in anjaha gigian halak Masir manginum bah hun Bah Nil in.ʼ”

19Dob ai nini Jahowa ma dompak si Musa, “Hatahon ma bani si Aron, ʻBuat ma tungkotmin, pagostong ma tanganmin hu atas ni ganup bah na i tanoh Masir, hu atas ni bah banggal ni sidea, bah angkatan ni sidea, bongbongan ni sidea, bah na ipatumpu sidea, ase gabe daroh haganup,ʼ ase daroh ma jumpah i sab tanoh Masir, ibagas ansubah ampa ibagas gusi.”

20Jadi ibahen si Musa pakon si Aron ma songon na tinitahkon ni Jahowa, iangkat ma tungkot ai hu atas, ilibas ma bah na i Bah Nil ai i lobei ni Parao pakon i lobei ni juakjuakni, jadi salih ma ganup bah na i Bah Nil ai gabe daroh.

21Matei ma dengke na i Bah Nil, anjaha marbau ma Bah Nil ai, gabe lang tarinum halak Masir be bah hun Bah Nil; anjaha sab do daroh ai bani haganup tanoh Masir.

22Tapi ibahen datu ni Masir do homa sonai marhitei tabas ni sidea, gabe lanjar hengkeng ma uhur ni Parao, seng itangihon sidea, songon na hinatahon ni Jahowa hinan.

23Marhusor ma Parao laho mulak hu rumahni, anjaha seng homa iparuhurhon ai.

24Jadi inggot Bah Nil ma ihurak ganup halak Masir bah bahen inumon, ai seng tarinum sidea bah hun Bah Nil.

25Pala do gok pitu ari dokahni ai, dob na ilibas Jahowa bah Nil ai.


  Share Facebook  |  Share Twitter

 <<  Keluaran 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran