Dual Panel1Doding ni Doding humbani Raja Salomo.
Sihol ni Uhur ni Tunangan hubani Siparunjuk
2Sai isummah ma ahu marhitei summah ni pamanganni! Ai mantinan do holongmu ase anggur.
3Morum do minakmu, goranmu songon minak na misbou na niuseihon; halani ai do ase rosuh anak boru mangidah ham.
4Togu ham ma ahu, papodas hita ma! Iboan raja ai ma ahu hu kamarni. Marolob-olob do hanami anjaha marmalas ni uhur mangidah ham, ipuji hanami do holong ni uhurmu lobih humbani anggur, patut do holong uhur ni sidea bamu.
5Birong do ahu namin, tapi jenges do, ale boru Jerusalem, songon tenda ni halak Kedar, songon tirei ni si Salomo.
6Ulang ma mapas pangkawahnima bangku, halani na birong ai rupangku, ai mata ni ari do na manlulus ahu. Manggila do anak ni inang bangku, isuruh sidea do ahu manjaga pohon anggur; tapi pohon anggurhu sandiri, seng hujaga.
7Pabotohkon ma bangku, ham haholongan ni uhurhu, ija do ham marmahan, ija ipasaran ham hulananmu tongah arian? Ai mase ma songon halak na mampar-ampar ahu i lambung ni hulanan ni hasomanmu?
8Anggo seng ibotoh ham ai, ham ale si jengesan i tongah-tongah ni anak boru, irikkon ham ma bokas ni biribiri ai, anjaha parmahan ma hambingmu i lambung ni tenda ni parmahan.
Parsahapan ni Tunangan ampa Hinaholonganni
9Usih do ham, ale hinasiholan ni uhurhu, bani huda na manarik gareta ni Parao.
10Jenges do huyummu marnah ugas-ugas, anjaha borgokmu marsinongkok mutiha.
11Sinongkok omas paulionnami ope bamu, marsimatah bani pirak.
12Sanggah hundul raja ai mangan, muap do misbou ni minakku.
13Haholongan ni uhurhu sasangkutan mir do ai bangku, tibal bani tontonku.
14Haholongan ni uhurhu satandan bunga henna do ai bangku, na dob tubuh i pohon anggur En-Gedi.
15Tongon, jenges do rupamu, ale hinasiholanku, jenges tumang do ham, songon asas do matamu.
16Tongon jenges do ham, ale haholonganku, jenges tumang do ham. Marbunga-bunga simaratah do podomanta.
17Hayu ares do tiang ni rumahta, anjaha dingdingni ilampis bani hayu maranti.