Dual Panel1Ia ahu bunga na i Saron do, silundat na i habungan.
2Songon silundat i tongah-tongah ni duri-duri, sonai do tongon hinasiholan ni uhurhu i tongah-tongah ni anak boru.
3Songon hayu untei manis i tongah-tongah ni hayu harangan, sonai do tongon haholonganku i tongah-tongah ni garama. Marosuh do uhurhu hundul bani linggomni, anjaha mantin do buahni bani tolonanku.
4Iboan do ahu hubagas rumah anggur ai, anjaha tandani bangku ai ma holong.
5Ipargogohi do ahu marhitei kuei buah anggur, ipahisar marhitei untei manis; tongon, boritan do ahu halani sihol ni uhurhu.
6Tangan sambilouni mangkalang ulungku, tangan siamunni manrohop ahu.
7Hupabija ma nasiam, ale boru Jerusalem, bani ursa ampa bani balua boru-boru na i talun. Ulang ma iganggu atap ipuhoi nasiam na marsihaholongan paima sombuh uhurni.
8Tangar, sora ni haholonganku! Tonggor ma roh do ia, marlintun-lintun bani dolog-dolog, manlumpat-lumpat bani buntu-buntu.
9Usih do haholonganku bani balua atap ursa na maposo. Tonggor ma, jongjong do ia i lopah ni tembok ni rumahnami, mangkawah humbani jandela, manorih-norih humbani jaring-jaring.
10Marsahap ma haholonganku, nini hu bangku, “Jongjong ma ham, ale hinasiholanku, eta ma, ale botou na majenges!
11Tonggor ma, domma salpu musim borgoh, lopus anjaha salpu musim udan.
12Martumbori ma bunga-bunga i ladang, domma jumpah panorang mandoding-doding, anjaha sora ni anduhur ginti tarbogei do bani tanohta.
13Hayu ara pe marmabeian ma buahni, hayu anggur marbungai anjaha misbou uapni. Jongjong ma ham, ale hinasiholanku, eta ma, ale botou na majenges!”
14Ale asasku, na marianan bani rigat ni dolog batu, bani parponopan na i salahsah, pataridahkon ham ma rupamu bangku, pabogeihon ma soramu, ai dear do soramu, jenges do rupamu.
15Tangkapi galot in, galot na etek-etek in, na mansedai pohon anggur, ai domma marbungai pohon anggurta.
16Haholongan ni uhurhu, ahu do simadasi, anjaha ia simada ahu, ia do na marmahan i tongah-tongah ni bunga silundat.
17Paima marombus logou sogod-sogod, anjaha lintun na golap, roh ma ham, ale haholonganku, usih bani balua ma ham atap bani ursa na maposo i atas ni dolog rium-riuman.”