Dual PanelSi Paulus i Lobei ni Gubernur Feliks
1Ase dob salpu lima ari, tuad ma si Ananias, sintua ni malim ai, rap pakon deba pangintuai ampa sada siparhata, na margoran si Tertullus; jadi ipadas sidea ma pangaduanni pasal si Paulus bani gubernur ai.
2Jadi dob idilo ia, ihatahon si Tertullus ma pangaduanni, nini ma,
3“Paboa na dapotan damei na buei do hanami marhitei usahamu, anjaha marhitei panarihonmu buei ma tambah hadearon bani bangsa on, pasal ai iakui hanami do tongtong atap ija-ija pe marhasoman tarima kasih banggal, ham Feliks, na pinarsangapan.
4Tapi ase ulang madokahtu hanami patangi-tangionmu, hupangindo ma bamu, ase ra ma ham, domu hubani rosuh ni uhurmu, manangihon hanami tongkin.
5Jumpah hanami do halak on songon sampar ampa panggeori bani haganup halak Jahudi i sab dunia on, anjaha pambobai ni sekte Nasarani do ia.
6Iuji do homa pabutakkon Rumah Panumbahan, halani ai do, ase itangkap hanami ia, ase iuhumi hanami ia domu hubani titahnami.
7Tapi roh ma Kapiten Lisias, anjaha ibuat ma ia marhasoman paksa hun bennami,
8anjaha iparentahkon sagala sipangadu roh mangadap ham. Anggo isungkun ham ia, boi do botohonmu, paboa sintong do pangaduannami in.
9Halak Jahudi pe dihut do mambahen pangaduan, anjaha ionjolhon sidea do, paboa sonai do tongon parkara ai.”
Balos ni si Paulus
10Jadi dob ihilaphon gubernur ai tanganni mangkatahon, ase marsahap ia, gabe nini si Paulus ma mambalosi, “Halani hubotoh, domma dokah ham panguhum bani bangsa on, hinsah do uhurhu mansahapkon hata pangapition bani diringku.
11Boi do patangkasonmu, paboa sapuluh dua ari ope salpu, dob tangkog ahu hu Jerusalem laho martonggo.
12Seng dong jumpah sidea ahu marsual pakon atap ise pe, barang manlutui halak na mabuei, age i Rumah Panumbahan, age i Rumah Parguruan barang ibagas huta pe.
13Anjaha seng tarbuktihon sidea bamu pasal pangaduan ni sidea ai dompak ahu.
14Tapi pasal on huakui do bamu, na hubalosi do Naibata ni ompung, mangihutkon podah ai, na ginoran ni sidea sekte, anjaha huhaporsayai do haganup na tarsurat bani titah atap marhitei nabi-nabi pe.
15Na marpangarapan do ahu bani Naibata, paboa mulak manggoluh parpintor ampa pargeduk, songon na niarapkon ni sidea ai.
16Halani ai do mambahen huhabujurhon, ase maruhur na borsih ahu tongtong i lobei ni Naibata ampa i lobei ni jolma.
17Tapi dob salpu piga-piga tahun, roh ma ahu mamboan sibere-bere ampa galangan bani bangsangku.
18Anjaha sanggah na hudalankon ai, dob salosei pangurasion, jumpah piga-piga halak Jahudi na hun Asia ma ahu, tapi seng adong marhasoman halak na mabuei barang ibagas na geor pe.
19Sidea do na patut mangadap ham laho mangaduhon, anggo adong pangaduan ni sidea dompak ahu.
20Age sidea on pe ihatahon ma barang aha do salahku jumpah sidea, sanggah na jongjong ahu i rapot bolon ai.
21Pitah hata on do na husahapkon, sanggah na jongjong ahu i tongah-tongah ni sidea, ʻHalani parpuhoon humbani na matei do, ase jongjong ahu i lobei ni paruhuman nasiam sadari on.ʼ”
22Tapi ilalab-lalabi si Feliks ma sidea, halani torang tumang do ibotoh pasal podah ai, nini ma, “Dob tuad pe Kapiten Lisias, ase huputuskon parkara nasiam on.”
23Jadi iparentahkon ma hubani kopala ni tentara, ase itahan si Paulus, tapi bebas otik, anjaha seng bulih larangon hasomanni marugas bani.
24Dob salpu piga-piga ari, roh ma si Feliks ampa parinangonni si Drusilla, boru Jahudi; isuruh ma na mangalopi si Paulus, laho mambogei hatani pasal haporsayaon bani Kristus Jesus.
25Tapi sanggah na marsahap ia pasal hapintoron, na manrajai diri ampa uhum magira, mabiar ma si Feliks, gabe nini ma, “Mulak ma ho lobei; anggo adong panorangku use, hudilo pe ho.”
26Mangarap do ia, ra si Paulus mambere duit bani, halani ai gati do isuruh na mangalop si Paulus, lanjar marsahap-sahap pakonsi.
27Tapi dob salpu dua tahun, roh ma si Porkius Festus manggantih si Feliks. Anjaha halani sihol do uhurni mambuat uhur ni halak Jahudi, gabe ipaturut si Feliks ma si Paulus tartahan.