Alkitab Mobile SABDA
[VER] : [SIMALUNGUN]     [PL]  [PB] 
 <<  Kisah Para Rasul 8 >> 

Si Saulus Marburu Halak Kristen

1Ia si Saulus rosuh do uhurni pasal pambunuhon ai. Jadi masa ma bani panorang ai pangayak-ayakon banggal dompak kuria na i Jerusalem. Haganup sidea, merap ma hu nagori Judea ampa Samaria, sobali apostel-apostel ai.

2Itanom halak na daulat maruhur ma si Stepanus, anjaha tangis tumang do sidea halani ai.

3Ia si Saulus, iparseda do kuria ai; imasuki do rumah-rumah, anjaha isarad ma hunjai dalahi ampa naboru laho padaskon hu tutupan.

Horja ni si Pilippus i Samaria

4Ia halak na merap ai, isiar sidea ma sab tanoh ai lanjar mangambilankon Ambilan Na Madear.

5Anjaha si Pilippus pe tuad ma hu huta Samaria, iambilankon ma bani sidea Kristus in.

6Jadi dob ibogei na mabuei ai ambilan ni si Pilippus, anjaha ididah homa tanda-tanda na binahenni ai, sauhur ma sidea marimbagaskonsi.

7Ai buei do humbani na setanon luar tonduy na mabutak marhasoman sora na mardilo-dilo. Buei do homa na oyangon ampa na tempang ipamalum.

8Jadi malas tumang ma uhur ni sidea na sahuta ai.

Si Simon Parsibalik Mata

9Tapi adong do ibagas huta ai hinan sada halak na margoran si Simon, parsibalik mata, na paoto-otohon halak Samaria ai, ai ihatahon na lobih do ia.

10Jadi haganup ma na etek na magodang porsaya bani, nini sidea, “On ma hagogohon ni Naibata, na ginoran, ʻTang na Banggal!ʼ”

11Ase ipairik-irik sidea pe ia, halani na dob dokah do sidea ipaoto-oto marhitei parsibalik-mataonni ai.

12Tapi dob porsaya sidea bani na niajarhon ni si Pilippus, ai ma pasal Harajaon ni Naibata ampa Goran Jesus, gabe tardidi ma sidea dalahi ampa naboru.

13Si Simon pe porsaya ma, anjaha dob tardidi ia, sai ipairik-irik ma si Pilippus, longang tumang ia mangindah tanda ampa hagogohon na banggal, na masa ai.

14Anjaha dob ibogei apostel-apostel na i Jerusalem, na dob ijalo halak Samaria ai hata ni Naibata, isuruh sidea ma si Petrus ampa si Johannes marayak sidea.

15Tuad ma sidea anjaha itonggohon ma sidea ase ijalo sidea Tonduy Na Pansing,

16ai seng ope sogop Tonduy Na Pansing atap bani ise pe sidea, pitah tardidi ope sidea hubagas goran ni Tuhan Jesus.

17Jadi itampeihon apostel ai ma tanganni bani sidea, gabe ijalo sidea ma Tonduy Na Pansing.

18Dob ididah si Simon, apostel ai mambere Tonduy Na Pansing marhitei na manampeihon tangan, roh ma ia mamboan duit bani sidea,

19nini ma, “Bere nasiam ma homa kuasa na sonin bangku, ase manjalo Tonduy Na Pansing halak, anggo hutampeihon tanganku bani.”

20Jadi nini si Petrus ma hu bani, “Magou ma ho rap pakon pirakmin, ai iagan ho gakni tarboli sibere-bere ni Naibata marhitei duit!

21Seng parrupei atap marhak ho bani kuasa on, ai seng pintor uhurmu dompak Naibata.

22Ai pe, paubah ma uhurmu humbani hajahatonmin, dob ai pindo ma humbani Naibata, andohar boi tarsasap tahi-tahi ni uhurmin.

23Ai huidah gok pogu na paet ampa jorat hagedukon do ho.”

24Jadi nini si Simon ma marbalos, “Tonggohon nasiam ma ahu hubani Tuhan in, ase ulang mangonai bangku na hinatahonmu ai.”

25Ase dob isaksihon anjaha ihatahon sidea hata ni Tuhan in, mulak ma sidea hu Jerusalem, lanjar mangambilankon Ambilan Na Madear bani buei huta ni Nagori Samaria.

Tardidi Parpangkat na Hun Etiopia

26Tapi iparsahapkon malekat ni Tuhan in ma si Pilippus, nini ma, “Jongjong ma ho, laho ma ho marayak tongah ari hu dalan ai, tuadan hun Jerusalem hu Gaza. Ia dalan ai lungun do.”

27Jadi jongjong ma ia lanjar misir. Anjaha tonggor ma, adong do ijai sada halak Etiopia, sada pegawai istana, manteri ni Kandake, raja naboru ni Etiopia, siramotkon haganup artani. Na laho do ia hu Jerusalem martonggo,

28anjaha na mulak ma ia nuan, hundul ibagas garetani mambasa buku ni Nabi Jesayas.

29Ihatahon Tonduy in ma hubani si Pilippus, “Laho ma hujai, dohori ma gareta ai!”

30Laho ma si Pilippus, ibogei ma ia mambasa surat ni Nabi Jesayas. Nini ma, “Iarti ham do na binasamu in?”

31Jadi nini ma, “Sonaha ma boi huartihon in, anggo seng dong na patorangkonsi bangku.” Lanjar iojur ma si Pilippus naik, hundul i lambungni.

32Ia hata ni surat, na binasani ai, ai ma, “Itogu do Ia songon biribiri hu panayatan anjaha songon anak ni biribiri, na sipsip i lobei ni sipangguntingisi, sonai do Ia seng ibuha pamanganni.

33Ibagas hadorunon salosei do uhum na bani ai. Ise ma na boi mangkira ginomparni? Ai tarangkat do goluhni hun tanoh on.”

34Dob ai nini pagawei istana ai ma hubani si Pilippus, “Husungkun ma ham, ise do na hinatahon ni nabi ai ijin? Pasal dirini do atap pasal halak na legan do?”

35Dob ai marsahap ma si Pilippus marbona humbani hata ondi, ibaritahon ma bani pasal Jesus.

36Anjaha sanggah na mannunuti dalan ai, das ma sidea hubani sada bah; jadi nini pagawei ai ma, “Andon ma bah! Adong ope na manlanglangi ase tardidi ahu?”

37Jadi nini si Pilippus ma, “Anggo na porsaya do ham humbani gok ni uhurmu, dear do!” Ibalosi ma ia, “Na porsaya do ahu, Anak ni Naibata do Jesus Kristus!”

38Ihatahon ma marsaran gareta ai, gabe tuad ma sidea haduasi, si Pilippus ampa parpangkat ai hu bah ai, lanjar ididi ma ia.

39Tapi sanggah na tangkog ai sidea humbani bah ai, jadi iluahon Tonduy ni Tuhan in ma si Pilippus, gabe seng ididah parpangkat ai be ia; marmalas ni uhur ma ia mannunuti sidalanni.

40Ia si Pilippus, i Asdod do ia jumpah; sanggah na montas ai ia, iambilankon do Ambilan Na Madear bani ganup huta-huta ai ronsi na das ia hu Kesarea.


  Share Facebook  |  Share Twitter

 <<  Kisah Para Rasul 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel