Dual PanelPodah ni Tuhan Jesus Manlawan Titah-titah na Binahen ni Halak Parisei
1Jadi roh ma Parisei pakon sibotoh surat hun Jerusalem marayak Jesus, nini sidea ma,
2“Mase ma ilanggar susian-Mu adat na humbani ompung nalobei? Seng iburihi sidea tanganni laho mangan.”
3Jadi nini Jesus ma mambalosi sidea, “Mase ma ilanggar nasiam titah ni Naibata, halani mardingat adat nasiam ai?
4Naibata do mangkatahon, ʻPasangap bapamu pakon inangmu!ʼ ambahni ai, ʻNa mamurai bapani atap inangni, maningon do sipamateion!ʼ
5Tapi nasiam mamodahkon, ʻBarang ise na mangkatahon bani bapani atap inangni, na sahira pamberengku bamu, dearan ma nagalangkon ai!ʼ
6Halak ai, seng pala be pasangaponni bapani atap inangni. Isedai nasiam do titah ni Naibata halani adat nasiam.
7E nasiam sipakulah-kulah! Sintong do panjahaion ni si Jesayas pasal nasiam, na mangkatahon,
8ʻIpasangap pamangan ni bangsa on do Ahu, tapi anggo uhur ni sidea daoh do hun Bangku.
9Tapi soya do parpasangap ni sidea Bangku, ai podah ni jolma do ipodahkon sidea.ʼ”
10Jadi idilo ma halak na mabuei ai, nini ma hubani sidea, “Bogei anjaha parimbagaskon nasiam ma!
11Seng gabe butak jolma halani na masuk humbani pamanganni, tapi na luar humbani pamanganni ai do pabutakkonsi.”
12Dob ai iparayak susian-Ni ai ma Ia, nini ma, “Domma ibotoh Ham, na dob marah do Parisei ai mambogei hata ai?”
13Tapi nini ma mambalosi, “Siorbaton do sagala suan-suanan, na so sinuan ni Bapa na i nagori atas ai.
14Paturut hanima ma sidea, pambobai na mapitung do sidea manogu na mapitung. Tapi anggo na mapitung manogu na mapitung, tarrobung ma sidea haduasi.”
15Nini si Petrus ma mambalosi-Si, “Patorang Ham bennami limbaga ai!”
16Jadi nini Jesus ma, “Ai seng iarusi hanima ope homa?
17Ai seng ibotoh hanima, sagala na masuk hubagas pamangan, laho hubagas boltok, dob ai mandarat bani ianan na suhi?
18Tapi na luar hun pamangan humbagas uhur do ai roh, anjaha ai do na pabutakkon jolma.
19Ai humbagas uhur do tubuh pingkiran na jahat, pamunuhon, parbangkison, parriah-riahon, panangkoon, hata ladung ampa panreheion.
20Sisonai do na pabutakkon jolma, tapi mangan seng marburih, seng butak jolma halani ai.”
Haporsayaon ni Sada Boru Kanaan
21Dob ai misir ma Jesus hunjai, laho hu nagori Tirus pakon Sidon.
22Jadi roh ma sada boru Kanaan hun nagori ai mardilo-dilo, “Idop ma uhur-Mu bangku, Tuhan, Anak ni si Daud! Parah do iahap borungku, iarsik-arsik setan.”
23Tapi seng ibalosi, sangkababah hata pe lang. Jadi roh ma susian-Ni ai hu Bani, nini ma, “Palao Ham ma ia, ai sai iirikkon do hita anjaha dilo-dilo.”
24Tapi nini ma mambalosi, “Pitah hubani biribiri na magou humbani ginompar ni halak Israel do Ahu isuruh.”
25Jadi idohori naboru ai ma Ia, isombah ma Ia lanjar ihatahon, “Tuhan, urupi Ham ahu!”
26Tapi nini ma mambalosi, “Seng patut nabuat ruti humbani dakdanak, laho mamberehon ai bani baliang.”
27Balos ni puang-puang ai, “Tongon, Tuhan, tapi ipangan baliang do rimah-rimah na matektek humbani meja ni tuanni.”
28Nini Jesus ma mambalosisi, “Inang, banggal do haporsayaonmu, saud ma songon na pinindomu ai! Jadi jorgit ma boruni ai humbani panorang ai nari.”
Ipamalum Buei na Boritan
29Dob misir hunjai, das ma Jesus hu Tao Galilea, jadi tangkog ma Ia bani sada dolog, lanjar hundul ijai.
30Jadi roh ma buei tumang halak hu Bani mamboan halak na repat, na tempang, na mapitung, na longah ampa buei na legan ope, anjaha iparpatibal ma sidea i lobei ni nahei ni Jesus, gabe ipamalum ma sidea haganup.
31Jadi longang ma halak na mabuei ai, halani ididah, marsahap do na longah, malum na martikas, mardalan na repat, anjaha marpangidah na mapitung, gabe ipuji sidea ma Naibata ni Israel.
Itamuei Ompat Ribu Halak
32Tapi idilo Jesus ma susian-Ni ai hu lobei-Ni, nini ma, “Maidop do uhur-Hu mangidah na mabuei on, ai adong ma tolu ari sidea rapkon Ahu, anjaha seng dong sipanganon bani sidea, anjaha seng ra Ahu palaohon sidea sonin loheian, ase ulang tompas sidea i tongah dalan.”
33Jadi nini susian-Ni ai ma hu Bani, “Hunja ma buatonta ruti i halimisan on sungkup pabosur halak na sain bueini?”
34Nini Jesus ma hubani sidea, “Ai adong do piga ruti isimpan hanima?” Jadi nini sidea ma, “Pitu ruti ampa dengke otik.”
35Jadi isuruh ma na mabuei ai hundul bani tanoh,
36ibuat ma ruti na pitu ai ampa dengke ai, anjaha dob ihatahon tarima kasih, ipartopik ma ai, anjaha iberei bani susian-Ni ai, ase susian-Ni ai mamberei halak na mabuei ai.
37Jadi mangan ma sidea haganup ronsi bosur; lanjar ipatumpu sidea ma teba-tebani, gok pitu bantei.
38Ia buei ni na mangan ai, adong do ompat ribu halak dalahi, sobali naboru pakon dakdanak.
39Jadi dob isuruh mulak halak na mabuei ai, naik ma Ia hu parau, anjaha laho ma hu Nagori Magdala.