Dual PanelPasal Parrumahtanggaon
1Ase dob ipaujung Jesus parsahapan ai, itadingkon ma Galilea, gabe das ma Ia hu tanoh Judea, na i dipar ni Bah Jordan.
2Buei tumang do halak na mangirikkon-Si, anjaha ipamalum ma sidea ijai.
3Jadi roh ma halak Parisei hu Bani, nini sidea ma manlajou-Si, “Ai bulih do sirangkonon ni sada dalahi parinangonni, asal adong atap aha halani?”
4Jadi nini ma mambalosi sidea, “Ai seng ibasa hanima, paboa na humbani mulani do itompa Panompa in sidea dalahi pakon naboru, anjaha ihatahon,
5ʻHalani ai tadingkonon ni dalahi do bapani pakon inangni, laho padomuhon dirini hubani jolmani, anjaha gabe sadaging do sidea na dua ai?ʼ
6Ase seng be dua sidea ai, tapi sada daging do. Ai pe, na dob pinadomu ni Naibata, seng bulih sirangon ni jolma.”
7Jadi nini sidea ma hu Bani, “Anggo sonai, mase ma ititahkon si Musa bereon surat sirang laho mansirangkon?”
8Nini ma dompak sidea, “Halani hengkeng ni uhur nasiam do, mambahen na ilopas si Musa nasiam paulakkon parinangon nasiam; tapi seng sonai anggo humbani mungkahni.
9Huhatahon ma bani nasiam: Barang ise na mansirangkon parinangonni, anggo seng halani parbangkison, gabe ibuat na legan, parbangkis do ia ai.”
10Jadi nini susian ai ma dompak-Si, “Anggo sonai do hape ruhut ni parrumahtanggaon, rahanan ma ulang mompo.”
11Tapi nini ma dompak sidea, “Seng haganup halak tarbahen manjalo hata on, pitah haondosanni do hansa.
12Ai adong do jolma na so boi mompo, sonai humbani partubuhni; adong deba, na kinasihkon ni halak na legan, anjaha adong deba nari, na pakasihkon dirini halani Harajaon nagori atas ai. Barang ise na boi manjalo hata ai, ijalo ma!”
Jesus Huan-huan ni Dakdanak
13Dob ai iboan halak ma dakdanak hu Bani, ase itampeihon tangan-Ni bani sidea, anjaha itonggohon sidea. Tapi ipinsang susian ai ma sidea.
14Tapi nini Jesus ma, “Paturut hanima ma roh dakdanak in hu Bangku, ulang langlangi, ai bani sisonin do Harajaon nagori atas ai.”
15Jadi dob itampeihon tangan-Ni bani sidea, misir ma Ia hunjai.
Garama na Bayak
16Dob ai roh ma sada halak manjumpahkon-Si, nini ma, “Guru, aha do na madear sihorjahononku, ase dapot ahu hagoluhan sisadokah ni dokahni?”
17Tapi nini ma hu bani, “Mase ma ahu sungkunonmu pasal na madear? Sada do hansa paruhur na madear. Anggo sihol masuk ho hu hagoluhan, dalankon ma titah in!”
18Nini ma dompak-Si, “Na ija?” Gabe nini Jesus ma, “Ulang ho mamunuh! Ulang ho marbangkis! Ulang ho manangko! Ulang ho ra manaksihon hata na so tongon!
19Pasangap amangmu pakon inangmu! Anjaha: Haholongi ma hasomanmu songon dirimu!”
20Nini anak garama ai ma hu Bani, “Domma hudalankon haganupan ai. Aha ope hahuranganku?”
21Jadi nini Jesus ma hu bani, “Anggo sihol uhurmu gok dear ho, laho ma, jual ma haganup na dong bam, pambere ma bani na masombuh, ase mararta ho i nagori atas. Dob ai roh ma ho mangirikkon Ahu!”
22Mambogei hata ai anak garama ai, laho ma ia ibagas pusok ni uhur, ai buei do artani.
23Jadi nini Jesus ma dompak susian-Ni ai, “Payah do halak na bayak masuk hubagas Harajaon nagori atas in.”
24Huhatahon ma use hu bennima, “Urahan do masukan ni unta pinggol ni jarum, ase halak na bayak masuk hu Harajaon nagori atas in.”
25Mambogei ai susian ai, tarsonggot tumang ma sidea, nini ma, “Ise mando maluah, anggo sonai?”
26Jadi ikawahkon Jesus ma sidea, nini ma dompak sidea, “Marhitei jolma, seng boi ai, tapi marhitei Naibata haganupan do boi.”
Pasal Upah ni Susian
27Dob ai nini si Petrus ma mambalosi-Si, “Ia hanami, haganup do itadingkon hanami laho mangirikkon Ham, aha ma ulih bannami?”
28Jadi nini Jesus ma hubani sidea, “Na sintong do hatang-Kon bennima: Magira, bani habayuon ai, bani na hundul Anak ni Jolma in bani paratas hasangapon-Ni ai, dihut ma hanima hundul ijai bani sapuluh dua paratas, laho manguhumi halak Israel, na sapuluh dua marga in.
29Anjaha barang ise na manadingkon rumahni, saninani, botouni, bapani, inangni, niombahni barang jumani halani goran-Ku, manjalo ma ai marlompit-lompit, ambahni ai teanonni ma hagoluhan sisadokah ni dokahni.
30Tapi buei do na parlobei hinan gabe parpudi, anjaha na parpudi hinan gabe parlobei.”