Alkitab Mobile SABDA
[VER] : [SIMALUNGUN]     [PL]  [PB] 
 <<  Markus 15 >> 

Jesus i Lobei ni si Latus

1Jadi siangkonsi ari mambahen parriahan ma sintua ni malim rap pakon pangintuai-pangintuai, sibotoh surat ampa Sanhedrin. Isangkut sidea ma Jesus lanjar iboan, ipadas hubani si Latus.

2Isungkun si Latus ma Ia, “Atene, raja ni halak Jahudi do Ham?” Jadi nini ma mambalosisi, “Songon na hinatahonmu ai ma tongon!”

3Buei do tukas-tukas ni sintua ni malim hu Bani.

4Jadi iulaki si Latus ma manungkun-Si, “Ai seng balosan-Mu ai? Tonggor ma buei ni tukas-tukas ni sidea ai dompak Ham!”

5Tapi aha pe lang ibalosi Jesus, pala longang uhur ni si Latus.

6Tapi sanggah ari pesta, somal do ipaluah bani sidea sada halak na tartutup domu hubani pangindoan ni sidea.

7Anjaha adong ma sada halak na margoran si Barabas, na rap tartutup pakon halak panggeori, na mambunuh jolma sanggah na geor ai.

8Jadi naik ma halak na mabuei ai mangindohon, ase ibahen bani sidea songon na somal.

9Balos ni si Latus hubani sidea, “Dear do uhur nasiam, ase hupaluah bani nasiam Raja ni Jahudi in?”

10Ai ibotoh, halani subil ni uhur do, ase iondoskon sintua ni malim Ia.

11Tapi ijuljul sintua ni malim ai ma halak na mabuei ai, ase si Barabas ipaluah bani sidea.

12Jadi nini si Latus ma use mambalosi sidea, “Anggo sonai, aha ma ipindo uhur nasiam sibahenon-Ku bani halak, na ginoran on: Raja ni Jahudi?”

13Idilohon sidea ma, “Parsilangkon ma Ia!”

14Jadi nini si Latus ma, “Ai aha do na jahat ibahen?” Tapi lambin igogohi sidea ma mandilohon, “Parsilangkon ma Ia!”

15Tapi halani sihol mambuat uhur ni halak na mabuei ai si Latus, gabe ipaluah ma si Barabas, dob hona lonsingan, iondoskon ma Jesus, ase iparsilangkon.

Hona Pahiri Jesus

16Tentara ai pe iboan ma Ia hu emper paruhuman ai (ai ma Pretorion), anjaha ipatumpu sidea ma ganup pasukan tentara ai hujai.

17Isorungkon sidea ma hu Bani baju sigerger, anjaha idandan ranting-ranting na marduri-duri bahen sortali, lanjar inahkon sidea ma ai bani ulu ni Jesus.

18Dob ai roh ma sidea marsombah-Si, nini ma, “Tabi ma Bamu, Raja ni Jahudi!”

19Ipukuli ma ulu-Ni bani tolong, itijuri ma Ia, anjaha manrogop ma sidea laho manombah-Si.

Jesus Iparsilangkon

20Ase dob ipahiri-hiri sidea Ia, itanggali sidea ma hun Bani baju sigerger ondi, anjaha isorungkon ma pakeian-Ni hinan. Dob ai iboan ma Ia hu darat, laho mamparsilangkon-Si.

21Jadi ipaksa sidea ma sada halak, na montas hunjai roh hun jumani, laho mamorsan silang ai, ai ma si Simon na hun Kirene, bapa ni si Alexander ampa si Rupus.

22Iboan sidea ma Ia hu Golgata (artini Partangkurakan).

23Ibere sidea ma hu Bani anggur na marsaor mir, tapi seng ijalo.

24Dob iparsilangkon sidea Ia, ibagi sidea ma hiou-Ni, marjomput na sinurat do sidea, laho mambagi ai.

25Pukul siah do iparsilangkon sidea Ia.

26Tarsurat do i atas-Ni pasal halani, ase iuhum ia, ai ma, “Raja ni Jahudi.”

27Rap pakon Jesus adong do iparsilangkon dua halak panrampok, sada hampit siamun-Ni, na sada nari hampit sambilou-Ni.

28Gabe jumpah ma na hinatahon ni surat in, “Tarhira do Ia bani halak parjahat.”

29Jadi irisai sagala na montas ai ma Ia, iupir-upirhon sidea ma uluni, lanjar nini bei, “Pe Ho, na sihol parsedahon rumah panumbahan in, anjaha pajongjongkonsi use ibagas tolu ari!

30Paluah ma diri-Mu, anjaha susur ma Ho tongon humbani hayu parsilang in!”

31Sonai homa do pangapasi ni sintua ni malim ampa sibotoh surat, nini ma, “Ia halak na legan ipaluah, hape diri-Ni sandiri seng tarpaluah-Si.

32Ale Kristus, Raja ni Jahudi! Susur ma Ho tongon humbani hayu parsilang in, ase ididah hanami, ase porsaya hanami!” Anjaha hasoman-Ni na tarsilang ai pe mangapasi do.

Parmatei ni Jesus

33Mulai pukul sapuluh dua das hu pukul tolu sogop ma na golap hu sab tanoh in.

34Anjaha pukul tolu gogoh ma Jesus mandilohon, “Eloi, Eloi, lama sabakhtani!” Artini, “Ale Naibatang-Ku, Naibatang-Ku, mase ma tadingkonon-Mu Ahu?”

35Mambogei ai nini halak na jongjong ai ma, “Bogei ma, idilo do si Elias!”

36Jadi laho ma sada halak mambuat limut, isornobkon ma ai bani na migar, anjaha ilongkotkon ma ai bani tolong laho mambere-Si minum. Nini sidea ma, “Torih hita ma, atap roh do si Elias patuadkon-Si!”

37Marsora na gogoh ma Jesus, jadi rotap ma hosah-Ni.

38Marigat ma tirei na i rumah panumbahan ai, bolah dua hun datas hu toruh.

39Dob ididah kopala ni tentera, na jongjong ijai, sonai parmatei-Ni, nini ma, “Tongon do Anak ni Naibata halak on!”

40Manatap-natap do humbani na daoh piga-piga naboru songon si Maria Magdalena, si Maria inang ni si Jakobus siposonan, ambah ni ai inang ni si Josep, ampa si Salome.

41Sanggah i Galilea ope Ia, domma iirikkon sidea Ia, laho marugas hu Bani. Buei do parinangon na legan na tangkog pakon-Si hu Jerusalem.

Tartanom Jesus

42Jadi dob bod ari, anjaha halani parugasonkon ma ai, ai ma ari marayak ari Sabat,

43roh ma si Josep par Arimatea, pagori ni pangadilan tinggi, sada halak na sangap, na paima-imahon Harajaon ni Naibata, ibaranihon ma dirini laho hu lobei ni si Latus mangindo bangkei ni Jesus.

44Longang do si Latus manangar na dob matei Jesus, gabe idilo ma kopala ni tentara ai anjaha isungkun ma ia, atap na dob dokah ma Jesus matei.

45Ase dob ibotoh pasal ai humbani kopala ni tentara ai, iondoskon ma bangkei ni Jesus bani si Josep.

46Iboli si Josep ma hiou linen na alus, anjaha ipasusur ma bangkei ai humbani parsilang ai. Ibaluti ma Ia bani hiou linen ai, anjaha ipatibal hubagas tanoman na dob iliang, dob ai igulang ma sada batu bani babah ni tanoman ai.

47Ididah si Maria Magdalena ampa si Maria inang ni si Joses do, atap huja do Ia itibalhon.


  Share Facebook  |  Share Twitter

 <<  Markus 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel