Dual PanelTonggo Mangkopkop Sion
1Tonggo ni sada halak na madoyuk ibagas hagelokkonni, anjaha iuseihon tangisni ai i lobei ni Jahowa. (102-2) Ham Jahowa, tangihon ham ma tonggongku, sai das ma Bamu dilo-dilongku.
2(102-3) Ulang lingodkon Ham bohi-Mu humbangku sanggah hasosakanku. Paeleng Ham ma pinggol-Mu hu bangku; sanggah hudilo Ham, balosi Ham ma ahu podas.
3(102-4) Ai magou do ari-ari ni goluhku songon timus, anjaha gara do holi-holingku songon parapuyan.
4(102-5) Mosog do pusu-pusungku anjaha melus songon poyon-poyon, gabe lupa ahu mangan sipanganonku.
5(102-6) Halani gogoh ni pangorongku, longkot do holi-holingku bani hulingkulingku.
6(102-7) Songon onggang na i halimisan ahu, songon langkupa i tongah-tongah ni na mareong.
7(102-8) Seng ra tarpodom ahu, songon manuk-manuk na punjung bani tayub do ahu.
8(102-9) Manipat ari do ahu irisai munsuhku, halak na manggila dompak ahu, mamapai marhitei goranku.
9(102-10) Hupangan do abuan songon ruti, anjaha husaorhon do iluhku bani siinumonku.
10(102-11) halani ringis-Mu pakon gila-Mu; iangkat Ham do ahu, dob ai iambalhon Ham.
11(102-12) Songon halinoh na manabad do goluhku, anjaha melus do ahu songon poyon-poyon.
12(102-13) Tapi anggo Ham Jahowa, sadokah ni dokahni do marparatas, anjaha goran-Mu tardingat do marsundut-sundut.
13(102-14) Jongjongkon Ham ma, maidop ma uhur-Mu bani Sion, ai domma jumpah panorangni mangkaholongisi, tongon, domma das panorang na binuhul hinan.
14(102-15) Ai holong do uhur ni juakjuak-Mu bani batuni, anjaha pusok uhurni mangidah parreongni.
15(102-16) Jadi habiaran ni bangsa parbegu ma use goran ni Jahowa, ampa raja-raja na i tanoh on hamuliaon-Mu,
16(102-17) anggo ipajongjong Jahowa ma use Sion, ipataridahkon diri-Ni ibagas hamuliaon-Ni;
17(102-18) idompakkon diri-Ni bani tonggo ni halak na so mardiha-diha, anjaha seng mapas uhur-Ni bani elek-elek ni sidea.
18(102-19) Suratkon ma ai bani sundut na roh, anjaha bangsa na sihol jadi ope, pujion ni ma Jahowa,
19(102-20) halani marpanatap do Ia dompak toruh humbani ianan na ma pansing na gijang ai, marpanatap Jahowa hun nagori atas hu tanoh on,
20(102-21) laho manangihon hoih-hoih na tartutup, laho paluahkon halak na dob ondos hu hamatean,
21(102-22) ase ibaritahon halak goran ni Jahowa i Sion ampa puji-pujian-Ni i Jerusalem,
22(102-23) bani na martumpu ijai bangsa-bangsa ampa harajaon laho mambalosi Jahowa.
23(102-24) Ia do na mamonggolhon gogohku i tongah dalan, anjaha ipapondok do ari-aringku.
24(102-25) Ningku, “Ham Naibatangku, ulang alop Ham ahu bani partongahan ni goluhku, Ham pargoluh na marsundut-sundut.
25(102-26) Sapari Ham do na pajonamkon tanoh on, anjaha jadi-jadian ni tangan-Mu do sagala langit.
26(102-27) Haganupan ai laho salpu do, tapi totap do anggo Ham; laho buruk do ai haganup songon hiou, songon sabei-sabei igantih Ham sidea, jadi masab ma sidea.
27(102-28) Tapi anggo Ham totap do, seng marpunsa tahun-Mu.
28(102-29) Sai sonang do marianan ginompar ni juakjuak-Mu, anjaha totap do i lobei-Mu ginompar ni sidea.”