Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 103 >> 

Puji-pujian bani Jahowa, Paridop Uhur in

1Humbani si Daud. Puji ma Jahowa, ale tonduyhu, anjaha humbani gok ni uhurhu mamuji goran-Ni na pansing in!

2Puji ma Jahowa, ale tonduyhu, anjaha ulang ma halupahon ganup dear layak-Ni!

3Ia do na manasap sagala dousamu, anjaha na pamalumkon sagala naboritmu;

4na paluahkon goluhmu humbani hamagouan, na mansortalihon bam dear layak ampa idop ni uhur,

5na pabosurhon sura-suramu marhitei na madear, ase mulak bayu haposoonmu songon manuk-manuk nanggordaha.

6Jahowa, na mambahen hapintoron, anjaha na pasintongkon uhum bani halak na hona dorun,

7Ia do na pabotohkon dalan-Ni bani si Musa, hubani anak ni Israel pambahenan-Ni.

8Paridop ni uhur anjaha pardear layak do Jahowa, nanget manringis anjaha paridop ni uhur banggal.

9Seng torus Ia manggila, anjaha seng marah Ia ronsi sadokah ni dokahni.

10Seng ibahen hu banta romban hubani dousanta, anjaha seng ibalaskon banta romban hubani hajahatonta.

11Tapi songon gijang ni langit hun tanoh on, sonai do banggal ni idop ni uhur-Ni bani sagala na mangkabiari-Si.

12Songon daoh ni hapoltakan humbani hasundutan, sonai do ipadaoh panlanggaronta hun banta.

13Songon idop ni uhur ni bapa bani niombahni, sonai do idop ni uhur ni Jahowa bani sagala na mangkabiari-Si.

14Ai ibotoh do sonaha tompanta, idingat do, orbuk do anggo hita.

15Ia jolma in, songon poyon-poyon do, marbunga do ia songon bunga na i talun;

16montas honsi logou seng dong be ia, anjaha seng natandai be iananni.

17Tapi anggo idop ni uhur ni Jahowa totap do ronsi sadokah ni dokahni bani sagala na mangkabiari-Si, anjaha hasintongan-Ni marnini marnono,

18bani na manramotkon padan binahen-Ni, pakon na mardingat parentah-Ni laho mandalankon ai.

19Domma ipajonam Jahowa paratas-Ni i surga, anjaha panggomgomion-Ni manrajai haganup.

20Puji ma Jahowa, nasiam sagala malekat-Ni, nasiam, sagala puanglima na margogoh, sipasaud hata-Ni!

21Puji ma Jahowa, nasiam sagala bala-Ni, nasiam sagala siparugas Bani, sipasaud harosuh ni uhur-Ni!

22Puji ma Jahowa, ale jadi-jadian-Ni, bani ganup ianan ni harajaon-Ni! Puji ma Jahowa, ale tonduyhu!


  Share Facebook  |  Share Twitter

 <<  Mazmur 103 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran