Doding Puji-pujian ampa Tonggo Elek-elek
1Sada doding. Psalm humbani si Daud. (108-2) Sirsir do uhurhu, Ham Naibata, sihol do ahu mandoding, Sihol do ahu mamuji-muji. Puho ma ale tonduyhu,
2(108-3) puho ma ale arbap pakon husapi, sihol puhoanku do buha siang ari.
3(108-4) Sihol pujionku do Ham, ale Jahowa, i tongah-tongah ni bangsa-bangsa, sihol dodingkononku do Ham i tongah-tongah ni marga-marga.
4(108-5) Ai gijangan do marimbang langit idop ni uhur-Mu, anjaha hasintongan-Mu das do ronsi hombun.
5(108-6) Patimbul Ham ma diri-Mu mangatasi langit, Ham Naibata, anjaha hu sab tanoh on hamuliaon-Mu,
6(108-7) ase maluah halak na hinaholongan-Mu. Paluah Ham ma marhitei tangan siamun-Mu, anjaha balosi Ham ma ahu.
7(108-8) Domma marsahap Naibata ibagas rumah-Ni na ma pansing: Sihol do Ahu marsurak-surak, sihol do bagion-Ku Sikem, anjaha pamah Sukot sibaron-Ku.
8(108-9) Ahu do simada Gilead, Ahu do simada Manase; Efraim ai ma tangkuluk bani ulung-Ku, anjaha Juda tungkot ni harajaon-Ku.
9(108-10) Moab ai ma mangkuk parburihan-Ku, hu Edom husampakkon sipatung-Ku, marsurak hamonangan do Ahu pasal Palistim.
10(108-11) Ise do nani mambobai ahu hu huta na toguh ai? Ise do manaruhkon ahu das hu Edom?
11(108-12) Ai lang Ham do, ale Naibata, na dob manulak hanami, anjaha lang ra Ham luar, ale Naibata, mangkasomani hanami?
12(108-13) Bere Ham ma pangurupion bennami, dompak imbangnami, ai soya-soya do pangurupi ni jolma.
13(108-14) Marhasoman Naibata tardalankon hita do horja habanggalon, anjaha Ia sandiri do manrojati imbangta.