Dual PanelPuji-pujian bani Jahowa halani Pambahenan-Ni
1Haleluya! Pujionku do Jahowa humbani gok ni uhurhu, i lolouan ni halak parpintor ampa bani partumpuan.
2Banggal do pambahenan ni Jahowa, patut sidingaton ni sagala na mangkarosuhkon-Si.
3Hamuliaon pakon hasangapon do pambahenan-Ni, anjaha hapintoron-Ni totap do ronsi sadokah ni dokahni.
4Ipajongjong do pardingatan bani halongangan-Ni; paridop ni uhur anjaha pardear layak do Jahowa.
5Ibere do sipanganon bani na mangkabiari-Si, idingat do padan na binahen-Ni ronsi sadokah ni dokahni.
6Hagogohan ni pambahenan-Ni ipatugah do bani bangsa-Ni, marhitei na mambere bani sidea pusaka ni sipajuh begu-begu.
7Hasintongan pakon hapintoron do pambahenan ni tangan-Ni, tarhatengerhon do sagala titah-Ni;
8totap do ai ronsi sadokah ni dokahni, sidalankonon ibagas hasintongan ampa hapintoron.
9Domma itongos haluahon bani bangsa-Ni, ipatotap do padan-Ni ronsi sadokah ni dokahni, na pansing janah majombut do goran-Ni.
10Biar mangidah Jahowa do parmulaan ni hauhuron, dapotan pangarusion na madear do sagala na mandalankonsi; totap do barita-Ni ronsi sadokah ni dokahni.