Dual PanelPamilih ni Jahowa bani si Daud ampa Sion
1Doding laho tangkog. Mardingat ma Ham, ale Jahowa, bani si Daud, ampa bani haganup halojaonni,
2na dob marbulawan bani Jahowa, na dob marpadan bani Parkuasa ni Jakob:
3Tongon, seng masukanku lampolampo ni rumahku, seng naikanku iananku modom,
4tongon, seng lopasonku matangku tartunduh, atap tarpitpit langkop ni matangku,
5paima jumpah ahu sada ianan bani Jahowa, sada rumah bani Parkuasa ni Jakob.
6Tongon, domma ibogei hita pasal poti parpadanan ai i Eprata, domma dapot hita ai i talun Jaar.
7Masuki hita ma rumah-Ni, manrogop ma hita bani sidogeian ni nahei-Ni.
8Jongjong ma Ham, ale Jahowa, laho ma Ham bani ianan parsaranan-Mu, Ham pakon poti hagogohon-Mu.
9Malim-Mu marpakeian hapintoron do, anjaha hinaholongan-Mu marsurak-surak.
10Halani si Daud juakjuak-Mu, ulang ma tulakkon Ham bohi ni na mininakan-Mu.
11Domma marbija Jahowa bani si Daud, tongon, seng mangeluk Ia hunjai, “Humbani ginompar-Mu do pahundulon-Ku bani paratas-Mu.
12Anggo iramotkon anakmu padan-Ku ampa hasaksian-Ku na Huajarhon bani sidea, anak ni sidea pe hundul do bani paratasmu sadokah ni dokahni.”
13Tongon, domma ipilih Jahowa Sion, ipindo uhur-Ni do marhundulan ijai:
14On do parsaranan-Ku ronsi sadokah ni dokahni, ijon do Ahu sihol marianan, in do Huharosuhkon.
15Parbohalanni sai pasu-pasuon-Ku do, halak na masombuhni pabosuron-Ku do bani ruti.
16Malimni bahenon-Ku do marpakeian haluahon, na hinaholonganni marolob-olob ibagas malas ni uhur.
17Ijai patubuhon-Ku do sada tanduk bani si Daud, pasirsiron-Ku sada suluh bani na mininakan-Ku.
18Munsuhni bahenon-Ku do marhiou habadoron, tapi bani uluni marlinang-linang do sortalini.