Dual PanelPardingatan bani Panorang Hamarsikon na i Babel
1I topi ni bah na i Babel, ijai do hundul-hundul anjaha tangis hanami, sanggah mardingat hanami bani Sion.
2Bani hayu baringin na ijai ai, igantungkon hanami do husapinami.
3Ai ijai do ipindo na manaban hanami pabogeihononnami dodingnami, anjaha halak na mangarsik-arsik hanami mangindo doding malas uhur, “Dodingkon hanima ma bennami sada doding Sion!”
4Sonaha ma boi dodingkononnami doding bani Jahowa i tanoh ni halak na legan?
5Anggo lupa ahu bam, ale Jerusalem, age melus ma tanganku siamun;
6longkot ma dilahku bani langit-langitku, anggo lang huingat ho, anggo lang Jerusalem hubahen i atas ni ganup malas ni uhur.
7Ingat Ham ma, ale Jahowa, ginompar ni Edom, na mangkatahon bani ari partaban ni Jerusalem, “Parseda, parseda ma, das bani palas-palasni!”
8Ale boru Babel, ho na parsedahon! Martuah ma halak na mambalaskon bam, sagala na binahenmu bennami.
9Martuah ma halak na manangkap anakmu, anjaha na manampakkon ai bani dolog batu.