Dual PanelTonggo Mangindo Panramotion Marimbang Parjahat
1Bani pambobai koor. Psalm humbani si Daud. (140-2) Sai paluah Ham ma ahu, ale Jahowa, humbani jolma parjahat; humbani halak sipangodoh-odoh, sai parorot Ham ma ahu,
2(140-3) ai ma halak, na mamingkiri hajahaton ibagas uhurni, na patubuh-tubuhkon hamunsuhon ari-ari.
3(140-4) Iaroti sidea do dilahni songon ulog, bisa ni ulog darih do i toruh ni bibir ni sidea. Sela.
4(140-5) Sai parorot Ham ma ahu, ale Jahowa, dompak tangan ni parjahat, anjaha ramotkon Ham ma ahu humbani halak sipangodoh-odoh, na mamingkiri ase jiris naheihu.
5(140-6) Halak sigijang uhur manaon siding bangku, ipaherbang do puhot bani dalanku, anjaha inahkon sidea do tirangkap i dalan padapot ahu. Sela.
6(140-7) Ningku do bani Jahowa, “Naibatangku do Ham, tangar Ham ma, ale Jahowa, sora ni elek-elekku.”
7(140-8) Ham Jahowa, Tuhanku, pangurupi na margogoh bangku, Ham do na mangondingi ulungku bani ari parporangan.
8(140-9) Ulang ma palopas Ham, ale Jahowa, sura-sura ni parjahat, ulang ma pasaud Ham riah ni sidea. Sela.
9(140-10) Ulang ma mandirgak ulu ni halak na manginggoti ahu, sai mangonai ma bani sidea hajahaton ni bibir ni sidea.
10(140-11) Sai mangkadabuh ma narnar bani sidea; sai madabuh ma sidea hubagas lubang, ase ulang tarjongjongkonsi be.
11(140-12) Halak sipanukas-nukasi, sai ulang ma totap i nagori on; Halak sipangodoh-odoh, sai hamagouan ma na mardakdak sidea.
12(140-13) Tongon, hubotoh do, Jahowa do na pasintongkon uhum bani halak na madoyuk, anjaha na mamintori halak na masombuh.
13(140-14) Tongon, sai pujion ni halak parpintor do goran-Mu, anjaha halak sibujur uhur do marianan i lobei-Mu.