Dual PanelTonggo Mangindo Haluahon ampa Panogu-noguon
1Psalm ni si Daud. Ham Jahowa, tangihon Ham ma tonggongku, tangar Ham ma elek-elekku; romban hubani hasintongan ampa hapintoron-Mu, balosi Ham ma ahu.
2Ulang ma boan Ham juakjuak-Mu hu paruhuman, ai seng dong halak na manggoluh pintor i lobei-Mu.
3Ai iparburu munsuh do tonduyhu, idogei-dogei do goluhku hu tanoh; inahkon do ahu bani ianan na golap, songon halak na dob dokah matei.
4Mandatei do tonduyhu ibagas diringku, jorgong do pusu-pusungku ibagas.
5Hudingat do ari na dob salpu, hupingkiri sagala pambahenan-Mu, anjaha ipahusor-husor uhurhu do jadi-jadian ni tangan-Mu.
6Hupaherbang do tanganku hu Bamu, siholan do tonduyhu Bamu songon tanoh horah-horah. Sela.
7Oloskon Ham ma mambalosi ahu, ale Jahowa, madotei do tonduyhu; ulang ma ponopkon Ham bohi-Mu bangku, ase ulang usih songon halak na manuruk tanoman ahu.
8Patangarhon Ham ma bangku sogod-sogod idop ni uhur-Mu, Bamu do ahu martenger ni uhur. Pabotohkon Ham ma bangku dalan na patut sidalananku, ai Bamu do hudompakkon tonduyhu.
9Paluah Ham ma ahu humbani munsuhku, ale Jahowa, Bamu do ahu maporus.
10Ajari Ham ma ahu, mambahen harosuh-Mu, ai Ham do Naibatangku; Tonduy-Mu na madear in ma manogu ahu bani dalan na hornop.
11Halani goran-Mu, ale Jahowa, pagoluh Ham ma ahu; halani hapintoron-Mu, paluah Ham ma tonduyhu humbani hasosakan.
12Halani idop ni uhur-Mu, boiskon Ham ma munsuhku, anjaha ripaskon Ham ma sagala na manosak-nosak tonduyhu, ai juakjuak-Mu do ahu.