Dual PanelPuji-pujian bani Habanggalon ni Naibata
1Doding puji-pujian ni si Daud. Sihol do patimbulonku Ham, ale Naibatangku, Raja in, anjaha sihol pujionku do goran-Mu lalab ronsi sadokah ni dokahni.
2Ganup ari do pujionku Ham, anjaha pasangaponku do goran-Mu lalab ronsi sadokah ni dokahni.
3Banggal do Jahowa, anjaha sipujian tongon, seng tardodou hatimbulon-Ni.
4Marsipatugahan do sundut-sundut pasal pambahenan-Mu, anjaha ipatugah do horja-Mu na banggal in.
5Hinajenges ni hamuliaon-Mu do isahapkon sidea, anjaha halongangan-Mu do na hupingkir-pingkiri.
6Hagogohon ni halongangan-Mu do ihata-hatahon sidea, anjaha habanggalon-Mu do ibaritahon sidea.
7Pardingatan bani buei ni dear layak-Mu do patugah-tugahon ni sidea, anjaha hapintoron-Mu do olobkononni.
8Paridop ni uhur anjaha parholong atei do Jahowa, nanget manringis anjaha parontou ni uhur banggal.
9Pardear layak do Jahowa bani haganup anjaha holong do atei-Ni bani ganup jadi-jadian-Ni.
10Ham do ipuji sagala jadi-jadian-Mu, ale Jahowa, anjaha hinalongan-Mu do pasangapkon Ham.
11Hamuliaon ni harajaon-Mu do ibaritahon sidea, anjaha kuasa-Mu do isahapkon,
12laho pabotohkon bani anak ni jolma hagogohon-Mu, pakon hamuliaon ampa hasangapon-Mu.
13Harajaon-Mu ai ma harajaon sisadokah ni dokahni, anjaha panggomgomion-Mu marsundut-sundut do.
14Jahowa do manatang ganup halak na sihol jurgang, anjaha ipajongjong do halak na dob ipatunduk.
15Ganup do mata mangkawah dompak Ham, anjaha Ham do na mambere sipanganonni bani panorangni.
16Ham do na mambuha tangan-Mu, anjaha Ham do na pabosur sura-sura ni sagala na manggoluh.
17Pintor do Jahowa bani sagala dalan-Ni, anjaha paridop ni uhur bani sagala jadi-jadian-Ni.
18Dohor do Jahowa bani sagala na mandilo-Si, bani haganup na mandilo-Si ibagas hasintongan.
19Sura-sura ni na mangkabiari-Si isuhuni do, itangar do doruh-doruh ni sidea anjaha ipaluah do sidea.
20Jahowa do na manramotkon sagala ma mangkaholongi-Si, tapi sagala halak parjahat iboiskon do.
21Puji-pujian bani Jahowa do sahapkonon ni pamanganku, anjaha sagala na manggoluh ipuji ma goran-Ni na pansing in, lalab ronsi sadokah ni dokahni.